კალაშოვისთვის ურეკში ჩამორთმეული სახლი მისი არ ყოფილა?!

რომელმაც შაქრო კალაშოვის ურეკის სახლის “აღმოჩენისთვის” პრეზიდენტისგან ღირსების ორდენით დაჯილდოებული და შს მინიტრის, ვანო მერაბიშვილის ფავორიტი პოლიცმაისტერის _ გია ურიდიას თანამდებობა შეიწირა. ვწერდით, რომ სწორედ ურიდიას სახელთან იყო დაკავშირებული კურორტზე შაქრო კალაშოვის სახლის აღმოჩენა: _ მაშინ თემა გაპიარდა და “მეტი სიცხადისთვის” “შავ სამყაროსთან მებრძოლ ვარდოსან მთავრობას” რიგითი პოლიციელის სახეც სჭირდებოდა. უბრალოდ, გია ურიდია საჭირო დროს საჭირო კადრი აღმოჩნდა საჭირო ადგილზე, რამაც ის ვანო მერაბიშვილის ფავორიტ პოლიციელად აქცია. ისიც ითქვა, რომ მაშინ, გია ურიდიას ხელმძღვანელობით დაბა ურეკში კრიმინალური დაჯგუფება და კალაშოვის თანამზრახველები დააკავეს, რომლებიც ურიდიას სიჩუმის სანაცვლოდ, ნახევარ მილიონ ლარს სთავაზობდნენ, მაგრამ მან ამაზე უარი თქვა და ინფორმაცია სამინისტროს მიაწოდა (ციტატა “გურია ნიუსში” გამოქვეყნებული წერილიდან).
აღნიშნული წერილის გამოქვეყნებიდან რამდენიმე დღეში ჩვენს ტელეფონზე ზარი გაისმა:
_ მე “გურია ნიუსის” ერთგული მკითხველი ვარ, თქვენი წერილებიც ძალიან მომწონს. საერთოდ, ძალიან ძლიერი გაზეთია, ამიტომაც გირეკავთ…
_ დიდი მადლობა თბილი სიტყვებისთვის, მაგრამ არ მგონია, მხოლოდ ამის სათქმელად რეკავდეთ.
_ თქვენ გეწერათ ურიდიაზე წერილი, პოლიციელზე…
_ დიახ. თქვენ ვინ ბრძანდებით?
_ ამას დიდი მნიშვნელობა არ აქვს, არ მინდა ტელეფონით ამაზე საუბარი _ დღეს ყველას უსმენენ. როცა შევხვდებით, გეტყვით, ვინ ვარ. თქვენი წერილებიდან და საერთოდ გაზეთიდან გამომდინარე, გენდობით. ფაქტობრივად, ხომ ოპოზიციური განწყობის ხართ…
_ არა, ჩვენ ოპოზიციური გამოცემა კი არა, თავისუფალი გაზეთი ვართ და სიმართლეს ვემსახურებით.
_ უკაცრავად, ოპოზიციური კი არა, სიმართლის მწერალი გაზეთი ხართ,-მეთქი, უნდა მეთქვა. მეც გურული ვარ, მაგრამ იმიტომ კი არ გირეკავთ, რომ რაიმე ჩემს სასარგებლოდ დაწეროთ _ უბრალოდ, სიმართლე მინდა იცოდეთ. თქვენ არ იცით სიმართლე, თუ რა მოხდა რეალურად.
_ რა სიმართლეზე საუბრობთ?
_ ის სახლი, რომელიც ვითომ კალაშოვს ჩამოართვეს, სინამდვილეში კალაშოვის არ ყოფილა!
_ ეს უკვე სერიოზული სიახლეა. ამას დაამტკიცებთ?
_ რა თქმა უნდა! ეს სახლი ოზურგეთელ ადამიანს ეკუთვნის, რომელმაც სკოლაც წარჩინებით დაამთავრა, უმაღლესი სასწავლებელიც _ წითელ დიპლომზე, ჰქონდა წარმატებული კარიერა, რუსეთში მუშაობდა, ჩვენი 31-ე საავიაციო ქარხანა რომ არის, იმის მსგავსში. შემდეგ წავიდა ბიზნესში. ურეკის სახლი არის მისი _ ეს კარგად იციან ურიდიამაც და სხვებმაც, მაგრამ ქურდულ სამყაროსთან ბრძოლის საბაბით გააპიარეს, რომ თითქოს სახლი კალაშოვს ეკუთვნოდა.
_ ანუ გინდათ თქვათ, რომ ცნობილ კრიმინალს ურეკის სახლში არანაირი წილი არ ჰქონდა?
_ არანაირი!
_ თქვენ საიდან იცით ეს ყველაფერი?
_ მეც მაქვს ურეკში სახლი და ვიცი დეტალები! თუ შეძლებთ შეხვედრას, უფრო კონკრეტულად გესაუბრებით.
ჩვენ ამ სატელეფონო ზარის ავტორს შევხვდით, რომელმაც კიდევ ერთხელ დაგვიდასტურა, რომ სახლი კალაშოვს არ ეკუთვნოდა. ამის შესახებ იქ ახლოს მცხოვრები ადამიანებიც საუბრობენ, თუმცა, საგაზეთოდ არა! პირად საუბრებში კი გვითხრეს, რომ “კალაშოვის ეგიდით ჩამორთმეული” რამდენიმე ორსართულიანი სახლი ნადგურდება, რადგან ფანჯრები ჩასმული არ აქვს და არც პატრონი ჰყავს არავინ: “რა კალაშოვი, რის კალაშოვი. ეს ადამიანი ურეკში ნამყოფიც არ იქნება! თან, ეს არ არის ისეთი სახლი, რომელზეც ასეთი ხმაურის ატეხვა ღირდეს. ანუ დასაბრალებლადაც არ ღირს! ვინმე დაიჯერებს, რომ ეს ქოხები კალაშოვის იყო? თუმცა, ეს ხელისუფლებამ კარგად “შეფუთა” და გმირიც გამოაცხადა _ პოლიციელი ურიდია. მაშინ ითქვა, თითქოს მან ქრთამი არ აიღო! რისთვის აძლევდნენ ქრთამს, არავინ დაინტერესებულა. არც იმით, რომ დაკავებული “ქრთამის მიმცემები” მალევე გაათავისუფლეს. უბრალოდ, ურიდიაც შეცდომაში ჰყავთ შეყვანილი, თორემ მან კარგად იცოდა, ეს სახლი კალაშოვის რომ არ იყო! უბრალოდ, მაშინ ის გმირად გამოიყვანეს, და მეტი არაფერი” _ გვითხრეს ურეკში.
ჩვენ რამდენიმე ადგილობრივ მცხოვრებთან გადავამოწმეთ ინფორმაცია. ყველა ადსტურებს, რომ ურეკში კალაშოვი არავის უნახავს და სანამ “ნაციონალური ხელისუფლება” არ გააპიარებდა, ჭორის დონეზეც კი არ გაეგოთ კალაშოვის სახლის შესახებ. როგორც გვითხრეს, ამ სახლის ჩამორთმევა ხელისუფლებამ ორი მიმართულებით გამოიყენა _ “ქურდულ სამყაროსთან ბრძოლის” მაგალითად და ქონება, საკმაოდ დიდ ტერიტორიასთან ერთად, ხელში ჩაიგდო.
ჩვენი რესპონდენტის ვინაობას მისივე თხოვნით ამ ეტაპზე არ ვახმაურებთ. მან არ დაგვისახელა ბიზნესმენის სახელი, ვის ნაცვლადაც მეპატრონედ კალაშოვი გამოაცხადეს, თუმცა, დაგვპირდა, რომ ამ საკითხზე ბიზნესმენის ოჯახს დაელაპარაკება და თუ მათი სურვილი იქნება, დოკუმენტებს  ექსკლუზიურად მოგვაწვდის: _ როგორც ვიცი, თავად ბიზნესმენი ახლა უცხოეთშია, ოჯახი კი, სავარაუდოდ, გამწვავებას ერიდება. ყოველ შემთხვევაში, ამდენი წელია, ქონება ჩამორთმეულია კალაშოვის სახელით და სიმართლე არსად არ დაწერილა. თავს ვერ მივცემ უფლებას, მათი ნებართვის გარეშე დავასახელო დეტალები, მაგრამ კიდევ ვიმეორებ _ თუ ოჯახი იქნება თანახმა, თქვენი გაზეთი ამ ინფორმაციას მიიღებს, _ გვითხრა ჩვენმა რესპონდენტმა.
ჩვენ ამ თემას დავუბრუნდებით და დეტალების დაზუსტებას შევეცდებით.