“ნაცმოძრაობის” მიკროკოორდინატორის აღიარება _ “ვინ მოდის და ვინ მიდის, იმას ვამოწმებ”

მაია ქუტიძე საზოგადოებრივი ჯანდაცვის ცენტრის ეპიდემიოლოგი და “ნაცმოძრაობის” აქტივისტია. დღეს ის ქალაქის 60/06 უბანზე მანქანით იყო გაჩერებული და ხელში ამომრჩევლების სია ეჭირა. “გურია ნიუსის” კითხვებზე მან საკმაოდ გულახდილად გვიპასუხა: – “არანაირი სიები, ვინ მოდის და ვინ მიდის, იმას ვამოწმებ…”

_ ანუ მეგობრების სიებია, ახლობლების თუ თანამშრომლების?

_ არა, ჩემი თანამშრომლები არ არიან, ისინი აქ ხომ არ იქნებიან, ისინი სოფლებში არიან. ქალაქშიც არიან, მაგრამ ერთ უბანში ხომ არ ვცხოვრობთ? ჩემი მეზობლები, ვინ მოვიდა და ვინ არ მოვიდა, იმას ვწერ და ვაკეთებ.

_ რამდენი ადამიანი მოვიდა?

_ ზუსტი სია არ მაქვს, ახლა ვაკეთებდი.

“გურია ნიუსის” ვიდეოკამერამ სიაში რამდენიმე ადამიანის სახელი და გვარი დააფიქსირა, რომელიც მაია ქუტიძის სიაში იყო ჩაწერილი, მათ შორის ოზურგეთის სპორტსკოლის დირექტორი გოჩა კვირჩილაძე, ვინმე გიორგი ჩილაჩავა და გულნაზი ყაჭეიშვილი. “გურია ნიუსი” გიორგი ჩალიჩავას ტელეფონით დაუკავშირდა, რომელმაც გაგვიცხადა, რომ თბილისში იყო და ამ სიებთან დაკავშირებით არაფერი იცოდა. სპორტსკოლის დირექტორი ჩვენს სატელეფონო ზარებს არ პასუხობდა.

რაც შეეხება გულნაზ ყაჭეიშვილს, მის ტელეფონზე შვილმა, პაატა ქარჩავამ გვიპასუხა. პაატა ქარჩავას ძმა, ვასილ ქარჩავა მუნიციპალიტეტის გამგეობის წარმომადგენელია.

თვითონ პაატა ქარჩავას სულაც არ გაკვირვებია მიქაუტაძის სიაში რომ დავაფიქსირეთ დედამისის სახელი და გვარი.

_ მაგი “ერთიანი ნაციონალურ მოძრაობის” მიკროკოორდინატორია და იმიტომ ჰყავდა სიაში შეყვანილი, _ გაგვიცხადა ქარჩავამ.

“გურია ნიუსის” ინფორმაციით, მაია ქუტიძე, “ერთიანი ნაციონალური მოძრაობის” მიკრო კოორდინატორია.