უფრო მეტიც, მიხელ სააკაშვილის სატელევიზიო გამოსვლას, რომელშიც პრეზიდენტმა აღნიშნა, რომ ისინი ისევ უმრავლესობით მოვიდნენ, “ნაციონალების” ჩოხატაურის ოფისში ტაშის კვრითა და შეძახილებით შეხვდნენ, თუმცა, რამდენიმე საათში ყველაფერი შეიცვალა.
საღამოს 11 საათისთვის, ხელისუფლებამ უკვე დაზუსტებულად იცოდა, რომ წააგო, შესაბამისად საზეიმო აღარაფერი ჰქონდა. ამიტომაც, საარჩევნო შტაბი მალევე დაკეტეს. ამ ფონზე “ქართულმა ოცნებამ” თითქმის მთელი ჩოხატაური სიგნალებით შემოიარა, რამდენიმე ოჯახში ფეიერვერკებიც ისროლეს.
გაცილებით მშვიდი იყო არჩევნების მეორე დღე, თუმცა, უემოციოდ არც მას ჩაუვლია. რიგითი მოსახლეობა აღნიშნავდა, რომ მიუხედავად წინასაარჩევნო პერიოდში არსებული ზეწოლებისა, ხალხის დაშინებისა, როგორც იქნა, მოხერხდა და ხელისუფლება არჩევნების გზით შეიცვალა.
არჩევნების დღეს, გამარჯვებაში დარწმუნებულ საჯარო მოხელეებს დღეს საუბარი აღარ სურთ, არც კამერის წინ და არც კამერის მიღმა.
“გურია ნიუსთან” კომენტარი ორმა საჯარო მოხელემ გააკეთა. საკრებულოს თავმჯდომარის მოადგილის, მიხო უნგიაძის თქმით, არ იცის, რას გააკეთებს მომავალში და ითანამშრომლებს თუ არა ახალ მთავრობასთან: _ ერთს გეტყვით, არჩევნები ჩატარდა დემოკრატიულად, _ ამბობს უნგიაძე.
სამომავლო გეგმებზე საუბარი არ სურს გამგებლის მოადგილეს, დიმიტრი კორიფაძეს. კორიფაძე “ნაციონალური მოძრაობის” შტაბის ერთ-ერთი ხელმძღვანელი იყო და კამპანიასაც ხელმძღვანელობდა. რატომ წააგეს ჩოხატაურში, კორიფაძემ არ იცის. არც ის იცის რას იზამს ხვალ _ დარჩება თუ თანამდებობას დატოვებს: _ ახლა სამსახურში ვარ და ბოდიშს გიხდით, არ მცალია, _ ისე დუმილის უფლებას იყენებს კორიფაძე, თუმცა, არ არის გამორიცხული, მას ისევე მონახოს “საერთო ენა” ახალ ხელისუფლებასთან, როგორც ამას შევარდნაძის და სააკაშვილის ხელისუფლებასთან ახერხებდა.
სხვა საჯარო მოხელეებთან გასაუბრება ჩვენ იმ მიზეზით ვერ მოვახერხეთ, რომ მათ ჩვენთან შეხვედრა არ ისურვეს და თათბირზე ყოფნა მოიმიზეზეს.
საკრებულოს თავმჯდომარე ანტონ ხუნდაძე ვერც სამსახურში ვიპოვეთ და ვერც ტელეფონით დავუკავშირდით _ მთელი დღის განმავლობაში ხუნდაძე მომსახურების ზონიდან იყო გასული. ტელეფონი გამორთული ჰქონდა მუნიციპალიტეტის გამგებელს ლელა იმედაშვილსაც, რომელიც, ჩვენი წყაროს ინფორმაციით, უკვე დაემშვიდობა გამგეობის თანამშრომლებს. სად გააგრძელებს საქმიანობას ჩოხატაურში არჩევნების მოგების მისიით მოვლინებული იმედაშვილი, ჯერჯერობით, უცნობია. ცნობილია ის, რომ მან გუბერნიის დავალება ვერ შეასრულა და მისი თხოვნა ჩოხატაურელი ჩინოვნიკების მიმართ, “ნუ ჩამიყრით წყალში ამდენ მუშაობას”, თხოვნად დარჩა.
გამგეობის ინფრასტრუქტურის სამსახურის თანამშრომელმა გოგი ბოლქვაძემ, რომელსაც გამგეობის დერეფანში გადავაწყდით, არ გამორიცხა, რომ მომავალში შესაძლოა ივანიშვილის მთავრობასთან ითანამშრომლოს, მიუხედავად იმისა, რომ სულ რამდენიმე დღის წინ, საკუთარ სოფელში, კარდაკარ დადიოდა და მოსახლეობას “ნაციონალური მოძრაობის” მხარდაჭერისკენ მოუწოდებდა.
კომენტარის გაკეთება არ ისურვა კულტურის სამსახურის სპეციალისტმა, მამუკა სანიკიძემ. სანიკიძე, რომელიც ერთ-ერთი აქტიური “ნაციონალია”, არ გამორიცხავს რომ მომავალში ახალ ხელისუფლებასთან ითანამშრომლებს.
ერთი სიტყვით, უცნობია, რას გააკეთებენ ადგილობრივი ხელისუფლება და საჯარო მოხელეები, რომლებიც მთელი წინასაარჩევნო პერიოდის განმავლობაში, კარდაკარ დადიოდნენ და მოსახლეობას არჩევნებში მხარდაჭერას სთხოვდნენ. უნდა ითქვას ისიც, რომ მხარდაჭერის შესახებ თხოვნაზე მეტად მოთხოვნა და რიგ შემთხვევაში დაშინების ფაქტებიც იყო. თუმცა, წარსულ გამოცდილებაზე დაყრდნობით, სულაც არ გაგვიკვირდება, თუ ჩოხატაურის ხელისუფლების მაღალ ჩინები საკუთარი უჯრებიდან ივანიშვილის ფოტოებს, “ქართული ოცნების” დროშებს ამოიღებენ და უნამუსოდ იტყვიან, სააკაშვილის დიქტატურის პერიოდში უჯრას გამოვაღებდი, ბატონი ბიძინას სურათს დიდხანს ვუყურებდი და ღმერთს მის გამარჯვებას ვთხოვდიო!!! ფერის შეცვლის ქამელეონისებური თვისება ხომ მათი ცხოვრებისეული კრედოა! არც ის არის გამორიცხული, რომ ისინი კვლავ ვიხილოთ სკამებზე, თუმცა, “გურია ნიუსი” ყველაფერს გააკეთებს იმისთვის, რომ ყველაფერს თავისი სახელი დაერქვას _ ჩვენ ნაციონალური ხელისუფლების პერიოდშიც გვქონდა არაოფიციალური დამამტკიცებელი დოკუმენტები ხალხის ფულის არამიზანმიმართულად ხარჯვისა, ამის შესახებ ვწერდით კიდეც, თუმცა, ოფიციალური მასალების მიღებას ხელისუფლებისგან ვერ ვახერხებდით _ ისინი უარს გვეუბნებოდნენ საჯარო ინფორმაციის გაცემაზე. ახლა “გურია ნიუსი” ამ დოკუმენტების სასამართლოს გზით მიიღებს და მკითხველს არაერთ ჟურნალისტურ გამოძიებას შევთავაზებთ, მოკვლეულ მასალებს კი პროკურატურას გადავუგზავნით რეაგირებისთვის.
რაც შეეხება “ქართულ ოცნებას” აქ სამომავლო გეგმებზე ჯერ ვერ საუბრობენ. საარჩევნო შტაბის ხელმძღვანელის, გოჩა ჯიქიას თქმით, ამ ეტაპზე ემოციების ქვეშ არიან: _ ასეთ შედეგს არ ველოდით. ცოტა გვეშინოდა. არ გვეგონა დაბას, ჩაისუბანს, ფარცხმას თუ ასეთი შედეგით მოვიგებდით. გამარჯვებისთვის თავი ნამდვილად არ დაგვიზოგავს. საკმაოდ დიდ მონსტრს დავუპირისპირდით. ძალიან დიდი ფული ჰქონდა შემოტანილი “ნაციონალურ მოძრაობას” და ვფიქრობდით, რომ ეს არჩევანზე იმოქმედებდა, თუმცა, ასე არ მოხდა და ამისთვის მადლობა გვინდა გადავუხადოთ იმ ამომრჩევლებს, რომლებმაც საქართველოს მომავლის სასარგებლოდ გააკეთეს არჩევანი. რაც შეეხება სამომავლო გეგმებს, ჯერ ვერაფერს გეტყვით, რადგან ამ ეტაპზე ემოციების ქვეშ ვართ, _ გვითხრა ჯიქიამ.
