აღსანიშნავია, რომ მსგავსი სუფრა გამგეობის თანამშრომლებმა რესტორან “ტონუსში” 14 ოქტომბერს, მცხეთობას, გააკეთეს, სადაც პრეზიდენტის მერ ხელფასების ზრდა აღუნიშნავთ. როგორც “გურია ნიუსი” წერდა საქართველოს პრეზიდენტის მიხეილ სააკაშვილის ახალი ბრძანებულებით, საკრებულოს თავმჯდომარეებს, მუნიციპალიტეტის გამგებლებს, საკრებულოს კომისიის თავმჯდომარეებს და არა მარტო მათ, ხელფასები გაეზარდათ.
ეს ბრძანებულება #945 12 ოქტომბერს გამოიცა, არჩევნებიდან 11 დღის შემდეგ. გავრცელებული ინფორმაციით, რადგან მიხეილ სააკაშვილმა და “ერთიანმა ნაციონალურმა მოძრაობამ” არჩევნები წააგეს, ახლა გუბერნიების და თვითმმართველობებში თავიანთი გუნდის წევრების გაძლიერებას იწყებენ.როგორც #945 ბრძანებულებაში წერია, თვითმმართველ ქალაქებში, სადაც საკრებულოს თავმჯდომარის და მერის თანამდებობრივი სარგოს ზედა ზღვარი 2480 ლარით იყო განსაზღვრული, ახლა ხელფასები 2750 ლარი ხდება. რაც შეეხება სხვა საჯარო მოხელეთა აქამდე არსებულ და ახალ თანამდებობრივ სარგოებს, ბოლო მონაცემებით, საკრებულოს თავმჯდომარის მოადგილის თანამდებობრივი სარგოს ზედა ზღვარი იყო -1500 ლარი, გახდა – 2150 ლარი; მერის მოადგილისა იყო – 1250, გახდა – 2050; სამსახურის უფროსის, საკრებულოს აპარატის უფროსის იყო – 900 ლარი, გახდა – 1490 ლარი; თვითმმართველი ტერიტორიული ორგანოს ხელმძღვანელის, თვითმმართველი ერთეულის რწმუნებულის თანამდებობრივი სარგოს ზედა ზღვარი იყო – 800 ლარი, გახდა – 1250 ლარი; საკრებულოს კომისიის თავმჯდომარის, საკრებულოს ფრაქციის თავმჯდომარის იყო – 710 ლარი, გახდა – 1000 ლარი; სამსახურის უფროსის მოადგილის, მერის თანაშემწის, სხვა უფროსი საჯარო თანამდებობის პირთა თანამდებობრივი სარგო იყო – 550, გახდა – 800 ლარი; უმცროსი საჯარო თანამდებობის პირის იყო – 480 ლარი, გახდა – 580 ლარი. მუნიციპალურ ერთეულებში საკრებულოს თავმჯდომარეებისთვის და გამგებლებისთვის განსაზღვრული 2360-2360 ლარიანი ანაზღაურება, 2650 ლარი გახდა. საკრებულოს თავმჯდომარის მოადგილისთვის დადგენილი 1100-ლარიანი თანამდებობრივი სარგო 1900 ლარი გახდა; გამგებლის მოადგილის თანამდებობრივი სარგოს ზედა ზღვარი აქამდე 900 ლარით იყო განსაზღვრული და ის ახლა 1500 ლარია; სამსახურის უფროსის, საკრებულოს აპარატის უფროსის, თვითმმართველი ერთეულის ტერიტორიული ორგანოს ხელმძღვანელის – რწმუნებულის იყო 700 ლარი, გახდა – 1290 ლარი; საკრებულოს კომისიის თავმჯდომარის, საკრებულოს ფრაქციის თავმჯომარის 650-ლარიანი თანამდებობრივი სარგო 1050 ლარამდე გაიზარდა; გამგეობის სამსახურის განყოფილების უფროსის 500 ლარიანი ანაზღაურება 810 ლარი გახდა; გამგებლის თანაშემწისთვის, სხვა უფროსი საჯარო თანამდებობის პირისთვის დადგენილი 450-ლარიანი შრომითი ანაზღაურება 790 ლარამდე გაიზარდა; ცვლილება ამ მიმართულებით მუნიციპალიტეტების წარმომადგენლობით და აღმასრულებელ ორგანოთა უმცროს საჯარო თანამდებობის პირთა შრომით ანაზღაურებასაც შეეხო და მათი 420-ლარიანი ხელფასები 560 ლარამდე გაიზარდა. ეს იმ ფონზე ხდება, როდესაც ოზურგეთში ერჯერადი დახმარებების გაცემა შეწყვეტილია.
როგორც “გურია ნიუსს“ სოფელ ჭანიეთიდან აცნობეს, იქ “დიდ სტუმარს“ ელოდებიან. სავარაუდოდ, ეს “დიდი სტუმარი“ რამაზ ნიკოლაიშვილი უნდა იყოს.
ჩვენი წყაროს ინფორმაციით, დღეს ოზურგეთის მუნიციპალიტეტის საკრებულოს თავმჯდომარემ ალეკო მამეშვილმა ერთგულ დეპუტატებს მოუხმო და თათბირი ჩაუტარა. როგორც წყარო აცხადებს, თათბირზე ერთგულებაზე იყო საუბარი, რომ ისინი ერთი გუნდი არიან და არსად გადასვლას არ აპირებენ. ხელფასის მომატებასთან დაკავშირებით, პრეზიდენტს გურიიდან მადლობა გადაუხადეს, Bბოლოს კი სუფრით დააგვირგვინეს.
აღსანიშნავია, რომ არც თათბირზე და არც სუფრაზე საკრებულოს არცერთი ოპოზიციონერი წევრი არ დაუპატიჟებიათ.
ჩვენ დავუკავშირდით ოზურგეთის მუნიციპალიტეტის სოფლების მაჟორიტარებს. რამდენიმე მათგანმა “გურია ნიუსთან” დაადასტურა, რომ თათბირზეც იყვნენ და სუფრაზეც არიან, თუმცა დაკონკრეტებისგან თავი შეიკავეს, რამდენიმემ მკვახედ გვიპასუხა: _”რაა ეს დაკითხვები, სად ვიმყოფებით, რა ხდება, ვქეიფობთ, რა პრობლემაა? ოზურგეთის მუნიციპალიტეტის საკრებულოს იურისტმა ლაშა თავაძემ ჩვენს სატელეფონო ზარებს არ უპასუხა. ჩვენს ზარებს არც საკრებულოს წევრმა პეტრე სალუქვაძემაც უპასუხა.
დაბა ნარუჯის მაჟორიტარმა დეპუტატმა ვალოდია ბერიძემ “გურია ნიუსს” კითხვაზე _ რატომ იყო დღეს თათბირი და რას აღნიშნავენ სოფელ ჭანიეთში, უპასუხა არ ვიციო.
_ ბატონო ვალოდი, თათბირს ესწრებოდით?
_ კი ბატონო.
_ რასთან დაკავშირებით იყო თათბირი?
_ არ ვიცი.
_ სუფრაზე ბრძანდებით?
_ კი.
_ რას აღნიშნავთ?
_ არ ვიცი.
ყველაზე მეტად ჩვენი დარეკვით სოფელ ჭანიეთის მაჟორიტარი დეპუტატი ავთო სურგულაძე გაღიზიანდა, რომელიც მისი თქმით, ამ დიდ ქეიფზე თამადა იყო.
_ მე თქვენი კითხვა უხერხულად მიმაჩნია. . .
_ ბატონო ავთო, უბრალოდ გეკითხებით რას აღნიშნავთ, როგორც ვიცით ძალიან დიდი სუფრა გაქვთ.
_ ხვალ გაგცემთ პასუხს, ახლა თამადა ვარ ჩემს მეგობრებთან, რას მეკითხებით, ვერ გავიგე.
_ბატონო ავთო, ელოდებით თუ არა რამაზ ნიკოლაიშვილს?
_ საიდან მოგაქვთ ეს ინფორმაციები? ხვალ გნახავთ და გეტყვით პასუხს მაგაზე, _გვითხრა სურგულაძემ.
