სამედიცინო დასკვნაში, რომელსაც ხელს აწერს მედიცინის დოქტორი, #18 მსჯავრდებულთა და ბრალდებულთა სამკურნალო დაწესებულების ქირურგიული განყოფილების ონკოლოგი თეიმურაზ ქემოკლიძე, ვკითხულობთ: “ავადმყოფს ჩაუტარდა მუცლის ღრუსა და გულ-მკერდის ღრუს კომპიუტერული ტომოგრაფიული კვლევები. დაეწყო სიმპტომური მკურნალობა. კლინიკური, ანამნეზიური (თანმხლები დოკუმენტაციით), კომპიუტერული ტომოგრაფიული მონაცემებით უდგინდება მარცხენა ფილტვის კიბო, მეტასტაზები თირკმელზედა ჯირკვალში, ელენთაში, მუცლის წინა კედელში (დაწყლულებით) და ლიმფურ კვანძებში. ზოგადი მდგომარეობა მძიმეა, გამოხატულია სიმსივნური ინტოქსიკაცია. დაავადება IV სტადიისაა, პაციენტი მიეკუთვნება IV კლინიკურ ჯგუფს.”
პატიმრის მეუღლე, საქართველოს პრეზიდენტს მიხეილ სააკაშვილს და საქართველოს სასჯელაღსრულების, პრობაციისა და იურიდიული დახმარების საკითხთა მინისტრს სოზარ სუბარს თხოვს, მის მეუღლეს “შეუმსუბუქონ სასჯელი და საკუთარ სახლში სიკვდილის უფლება მისცენ”…
ი. ჯ. “გურია ნიუსთან” აცხადებს, რომ მისი მეუღლე თაღლითობის მუხლით დაუსწრებლად გაასამართლეს: “მას 3 000 დოლარი ვალად ჰქონდა აღებული. 2008 წელს, თურქეთში სამუშაოდ წასვლა გადაწყვიტა. 2009 წელს, სასამართლომ დაუსწრებლად მიუსაჯა 9 წელი და 6 თვე. შემდეგ მოხდა ისე, რომ ჩემი მეუღლე თურქეთში გახდა ცუდად. იქ დაუდგინდა კიბოს მე-4 სტადია ფილტვზე. ფილტვიდან მეტასტაზები გასული იყო მთელ შინაგან ორგანოებზე. მძიმე ავადმყოფია და ძალიან ცუდად იყო. თქვა, მე თვითონ ჩავბარდებიო.
13 ოქტომბერს, სარფში, თვითონ ჩაბარდა. იქვე, ჩაბარების დროს, სპაზმები დაეწყო, ცუდად გახდა და სასწრაფოს გამოუძახეს. ბადრაგის თანხლებით გაგვაგზავნეს ბათუმის ონკოლოგიურში, მაგრამ გვითხრეს, წინასწარ შეთანხმებული არ არის და აქ ვერ მიგიღებთო. იქედან გაგვიშვეს ბათუმის რესპუბლიკურ საავადმყოფოში. იქ მითხრეს, ანალიზები უნდა ავუღოთ დიაბეტზე, სისხლზე და ა.შ. მე უარი განვაცხადე, რა ანალიზის აღება ჭირდება, აგერ მაქვს თურქეთში გაკეთებული ანალიზის პასუხები და ექიმების დასკვნა-მეთქი. იქედან ბადრაგის თანხლებით წამოვიყვანეთ და გამომძიებელთან წავედით. იქ დაკითხეს და ბათუმის ციხეში გაგვიშვეს. სანამ ციხეში მივიდოდით, პატრულის მანქანაში ისევ ცუდად გახდა…
ციხეში რომ მივედით, მთელი სამედიცინო პერსონალი და ხელმძღვანელობა გარეთ გამოვიდა. ყველანაირი პირველადი დახმარება გაგვიწიეს, მაგრამ მაინც მძიმე სიტუაცია ჰქონდა. ციხის უფროსმა განაცხადა, _ ამ პატიმარს არ მივიღებ, ასეთი მძიმე ავადმყოფი პატიმარი რომ მომიკვდეს, პასუხისმგებლობა მე დამეკისრებაო. დარეკეს გლდანში, უთხრეს, რომ ვაკეს-საბურთალოს რაიონიდან ძებნილი ჩაბარდა, მაგრამ არის მძიმე ავადმყოფი, კიბოთი დაავადებული და უნდა გამოვაგზავნოთ თბილისშიო. ერთ საათში მოვიდა რეანომობილი და გადმოიყვანეს გლდანის ციხეში. ძალიან მძიმე მდგომარეობა გვაქვს. რა თქმა უნდა, ტკივილდამაყუჩებელს არ უკეთებენ. პარასკევს ვიყავი პაემანზე და მითხრა, ფსიქიატრიულში გადამიყვანესო. მერე, ისევ ქირურგიულში გადაუყვანიათ. თავიდან, რეანიმაციულში იყო მიყვანილი. რატომ გადაიყვანეს ფსიქიატრიულში, არ ვიცი.
ეს ადამიანი ციხეს არაფერში გამოადგება და სასჯელს რომ მოიხდის, ამაზეც ზედმეტია საუბარი. უმძიმესი მდგომარეობა აქვს. დღეები აქვს დათვლილი. სტამბულიდან რომ წამოვიყვანე, იქ ექიმებმა სიცოცხლის გარანტია მაქსიმუმ სამი კვირა მოგვცეს. უკვე კვირანახევარი გავიდა, რაც ეს ადამიანი ჩაბარდა. ჩემი თხოვნაა, 4 წლის შვილი გვყავს და მის შვილთან ახლოს მაინც დალიოს სული.
სანამ აქ ჩამოსვლას გადავწყვეტდით, ჩემმა მეუღლემ ივლისის თვეში, საქართველოს პრეზიდენტს გამოუგზავნა თხოვნის წერილი, სადაც ეწერა: მე ჩავიდინე დანაშაული და თაღლითობა. მისჯილი მაქვს 9 წელი და 6 თვე. ძალიან გთხოვთ, შემიწყალეთ. მინდა, ჩემს მიწაზე და ჩემს შვილთან დავლიო სულიო”.
როგორც პატიმრის მეუღლე აცხადებს, წერილის გაგზავნიდან 10 დღის შემდეგ უთხრეს, რომ შსს-ში გადაიგზავნა თქვენი წერილიო. დღემდე არანაირი პასუხი არ მიუღია და არც იმის სჯერა, რომ ვინმემ საერთოდ წაიკითხა ეს წერილი.
“დახმარებას ვთხოვ ყველა სამართალდამცავი ორგანოს წარმომადგენელს, ქალბატონ თეა წულუკიანს, ქალბატონ ეკა ბესელიას, პროკურატურას… გაითვალისწინეთ ჩემი მეუღლის ჯანმრთელობის მდგომარეობა და გთხოვთ, მიეცით ჩემს მეუღლეს ოჯახში სიკვდილის უფლება,” _ ამბობს პატიმრის მეუღლე.
