ეკა ვასაძე, მშობელი: ბაღის რემონტი კარგა ხანია დაწყებულია, სარემონტო სამუშაოებს თავბოლო არ უჩანს, მშობლები ვართ გაურკვევლ სიტუაციაში. მაისის თვეში დავტოვეთ ბაღი, გავიდა ამდენი თვე, გვატყუებენ, რომ დღეს გაიხსნება, ხვალ გაიხსნება. 1 ნოემბერს უნდა გახსნილიყო, მაგრამ არც ორშაბათისთვის უჩანს პირი, აღსანიშნავია, რომ მუშები არ ჩანან, მიტოვებულია სამუშაოები, პასუხს ვერავინ გვცემს.
თამილა მამულაშვილი, მშობელი: დამთავრდა მხოლოდ გარე ფასადის რემონტი, შიგნით საშინელი სიტუაციია. როგორც ვიცით, ამაზე გადმორიცხული იყო ძალიან დიდი თანხა, მაგრამ სად წავიდა არ ვიცით.
არც წყალია შიგნით და არც გაზი ჰყავთ შეყვანილი, რომელიც უნდა გაკეთებულიყო. გვითხრეს, რომ ეს დააფინანსა სახელმწიფომ, გაზისა და წყლის გაკეთებისთვის 40 ათასი ლარია საჭიროო, ხოლო ისე 200 ათასი ლარი იყო გამორიცხულიო, ასეთი ინფორმაცია გვაქვს მშობლებს.
ახლა აბრალებენ მუშებს, არ დადიანო. ვართ ასე უყურადღებოდ. უპასუხისმგებლოდ მოგვექცნენ, რაღაც მობილიზაცია გაგვიკეთონ, გადაანაწილონ ეს ბავშვები სხვა ბაღებში, აი რა უნდა ვქნათ, აღარ ვიცით. ორშაბათიდან, ალბათ, სხვა ზომებს მივიღებთ, _აცხადებენ მშობლები “გურია ნიუსთან”.
ოზურგეთის მუნიციპალიტეტის გამგებელი ილია ვაშაყმაძე “გურია ნიუსთან” ამბობს, რომ ბაღი ამ დღებში ფუნქციონირებას დაიწყებს.
ოზურგეთის მუნიციპალიტეტის საკრებულოს სპორტის, განათლების, ჯანდაცვისა და სოციალურ საკითხთა კომისიის თავმჯდომარე ირინა საჯაია ამბობს, რომ ბაღის რემონტთან დაკავშირებული პრობლემები მუშების ბრალია.
_ გვინდა, რომ ორშაბათს გავხსნათ. ვთვლი, რომ ეს არის მშენებლების უპასუხისმგებლობა, დამთავრებულია ყველანაირი სამუშაოები, დარჩენილია მხოლოდ გაზისა და წყლის შეყვანა. ეს დღეები, საკრებულოს თავმჯდომარე და წევრები, ყევლა ვართ ამ პროცესში ჩართული. ვესაუბრეთ მშენებლების უფროსსაც, თუ იმუშავებენ ნორმალურად და კარგად, შეიძლება ორშაბათს გავხსნათ, თუ არადა, შეიძლება რამდენიმე დღე ისევ დააგვიანდეს.
_ და ვინ უნდა აგოს ამ ყველაფერზე პასუხი?
_ თუ საქმეს ვერ მიიყვანენ ბოლომდე, ისევ მათ შეექმნებათ პრობლემა, მე როგორც ვიცი, მიღება-ჩაბარების აქტი არ აქვთ ჩაბარებული და ხელმოწერილი, მაგრამ ეს ჩვენთვის არ არის შეღავათი, _ ამბობს საჯაია.
“გურია ნიუსი” აგრძელებს ამ თემაზე მუშაობას და ვრცელ მასალას ჩვენს ბეჭდურ ვერსიაში იხილავთ.
