მოადგილის წარდგენას დაესწრო შტაბის უფროსი გიგი კალანდაძეც, რომელიც უახლოეს მომავალში საზღვარგარეთ სასწავლებლად გეგმავს წასვლას. ჩვენი წყაროს ინფორმაციით, მისი განცხადება ქვეყნის პრეზიდენტს უკვე მაგიდაზე უდევს, თუმცა, როდის მოაწერს იგი ხელს და როდის გაათავისუფლებს 3 კვირის წინ დანიშნულ შტაბის უფროსს, უცნობია.
აღსანიშნავია, რომ დღევანდელ ბრიფინგზე გენერლებს _ კაპანაძეს და კალანდაძეს განსხვავებული ფერის სამხედრო მუნდირები ეცვათ: ვახტანგ კაპანაძეს წესდებით დადგენილი ქართველი გენერლის ფორმა, ხოლო გიორგი კალანდაძეს _ გაურკვეველი წარმომავლობის სამხედრო მუნდირი. კალანდაძე ბოლო რამდენიმე წელია ატარებს ხუთქიმიან ვარსკვლავს, რაც ამერიკული ვარსკვლავის ანალოგიურია და საქართველოს შეიარაღებულ ძალებში მიღებული არ არის. აღსანიშნავია, რომ პირველად ეს ვარსკვლავი გაერთიანებული შტაბის უფროსის, დევი ჭანკოტაძის სამხრეებზე გამოჩნდა. ამის გამო, სამხედრო მოსამსახურეები გაკვირვებას ვერ მალავდნენ, რადგან ფორმის ჩაცმულობის წესს თავად გენერლები ჭანკოტაძე და კალანდაძე არღვევდნენ. გაურკვეველია, რა მიზეზით თქვეს გენერლებმა უარი ქართულ შვიდქიმიან ვარსკვლავზე და აირჩიეს ხუთქიმიანი, რომელსაც სხვათაშორის, რუსეთის ფედერაციის შეიარაღებული ძალების ყველა კატეგორიის ოფიცერი ატარებს.
ვახტანგ კაპანაძის უკან დიდი გამოცდილება და პროფესიული განათლებაა, მაშინ, როდესაც გიგი კალანდაძემ გენერლის ჩინს უპრეცედენტოდ მოკლე პერიოდში მიაღწია და ბაჩო ახალაიას გადაწყვეტილებით, წელიწადში რამდენჯერმე იღებდა 100-150- ათასლარიან პრემიას.
ჩვენი წყარო, რომელიც სამხედრო საქმის სპეციალისტია და დიდი ხანია ადევნებს მოვლენებს თვალს, ამბობს, რომ “კალანდაძის ადგილი საზღვარგარეთ კი არა, ციხეშია, თუმცა, თავდაცვის სამინისტროში წლების მანძილზე გამეფებულ უკანონობასა და ტერორში მის შესაძლო მონაწილეობის დადგენა გამოძიების პრეროგატივაა“ და გამოძიების დასრულებამდე ვინაობის გამჟღავნებისგან თავს იკავებს.
გაერთიანებული შტაბის მომავალ უფროსს თითქმის უფუნქციოდ დარჩენილი შტაბი ელოდება. ბაჩო ახალაიას კადრების წმენდის პოლიტიკის შემდეგ დეპარტამენტებში თითო-ოროლა ადამიანებიღა დარჩნენ, რომლებიც, რა თქმა უნდა, ვერ ასრულებდნენ მათზე დებულებით დაკისრებულ განსაზღვრულ ამოცანებს.
“გურია ნიუსი” სამხედრო მოსამსახურეებს ესაუბრა, რომლებიც დადებითად აფასებენ მინისტრის გადაწყვეტილებას ვახტანგ კაპანაძის დანიშვნის შესახებ, თუმცა, იმასაც ამბობენ რომ ახალ უფროსს ხელახლა მოუწევს სტრუქტურის აწყობა.
”პირველ ეტაპზე, შეიარაღებულ ძალებში მნიშვნელოვანია შეიცვალოს სამეთაურო რგოლი (საბრძოლო ქვედანაყოფებში), აგრეთვე, მნიშვნელოვანია ხელმძღვანელობის შეცვლა ზემო რგოლებში – გაერთიანებულ შტაბსა და სახმელეთო ჯარების სარდლობაში. აღნიშნულ თანამდებობაზე ადამიანები ბაჩო ახალაიასთან მეგობრობის კრიტერიუმით ინიშნებოდნენ. უმეტესობას არ აქვს არც გამოცდილება და არც შესაბამისი განათლება; ამას ადასტურებს ბოლო წლებში შეიარაღებული ძალების ბრძოლისუნარიანობის დაქვეითება,” – აცხადებენ სამხედრო მოსამსახურეები.
ჩვენი რესპონდენტი სამხედრო პირები ამბობენ, რომ “აუცილებელია სტრუქტურული ცვლილებების გახორციელება მაღალი რგოლის შტაბებში _ დეპარტამენტებში, სამმართველოებში, რადგან ისინი ბოლო რამდენიმე წელია ვერ ასრულებენ მათზე დაკისრებულ ამოცანებს. 2009 წლიდან, ბაჩო ახალაიამ გაერთიანებული შტაბიდან კვალიფიციური კადრების გაყრა დაიწყო, რის გამოც, დეპარტამენტების ნაწილმა ნორმალურად ფუნქიონირების გაგრძელება ვეღარ მოახერხა“.
იგივე პირები ვახტანგ კაპანაძეს ოპერატიულ-ტექნიკური სამსახურის გაუქმებასაც სთხოვენ. ჩვენი წყაროს თქმით, “აღნიშნული სამსახური ახალაიამ შექმნა და მის ერთადერთ ფუნქციას სამხედრო მოსამსახურეების ფარული მოსმენა და თვალთვალი წარმოადგენდა. სწორედ ამ სამსახურში მიჰყავდათ “ქართული ოცნების” დაკავებული წევრები, და ჯაშუშებად გამოცხადებული სამხედროები, უმონტაჟებდნენ მოსასმენ აპარატურას და დავალებაზე უშვებდნენ”.
წყარო ამბობს, რომ გაერთიანებული შტაბის მომავალ უფროსს საბრძოლო ქვედანაყოფების მეთაურების შეცვლაც მოუწევს: “ბრიგადები და ბატალიონები, ძირითადად, ბაჩო ახალაიას კადრით კომპლექტდებოდა. მეთაურები დაკავებულები იყვნენ ჯარისკაცების ხელფასების დაქვითვით, რითაც მინისტრ ახალაიას ბიუჯეტს ავსებდნენ. აღსანიშნავია, რომ მათი პრემიები დაქვითული თანხის რაოდენობაზე იყო დამოკიდებული.
“გურია ნიუსის“ ინფორმაციით, რომელიც სანდო წყაროს ეყრდნობა, ბრიგადის მეთაურებს დაქვითული ხელფასებიდან ყოველთვიურად 20-30-ათას ლარიანი პრემია ეკუთვნოდათ. სისტემატურმა უმიზეზო და უკანონო დაქვითვებმა შეიარაღებული ძალებიდან კვალიფიციური კადრის წასვლა გამოიწვია. ხშირ შემთხვევაში, დაქვითვა ხელფასის 40-60% აღწევდა და კაპრალს, რომლის ხელფასიც 750 ლარია, 6 თვის მანძილზე, სახლში მხოლოდ 200-250 ლარი მიჰქონდა.
ეს მეთაურები დღესაც თანამდებობებზე რჩებიან, თუმცა, სამხედრო მოსამსახურეებს იმედი აქვთ, რომ შტაბის მომავალი უფროსი საკადრო პოლიტიკას სერიოზულად გადახედავს.
“ასევე უმნიშვნელოვანესია საკადრო პოლიტიკის გატარება სამხედრო პოლიციაში; არა მხოლოდ მაღალჩინოსნის, არამედ ყველა მუშაკის საქმიანობა და მათი ეფექტურობა, მათი რაოდენობა ხელოვნურად გაზრდილია; მარტო სამხედრო პოლიციის დეპარტამენტს ჰყავს იმაზე მეტი მანქანა, რამდენიც სახმელეთო ჯარების სარდლობას და გაერთიანებულ შტაბს ერთად!
გაერთიანებული შტაბი შეიქმნა ნატოს მოთხოვნით და იმ დროისთვის გვყავდა საჰაერო, საზღვაო და სახმელეთო ძალები _ მათი ერთობლიობა წარმოადგენდა გაერთიანებულ ძალებს; აქედან გამომდინარე შეიქმნა გაერთიანებული შტაბი. მაგრამ ამ დროისათვის ჩვენ აღარ გაგვაჩნია საზღვაო ძალები, რადგან ის შსს-ს გადაეცა, და სამხედრო საჰაერო ძალები, რაც სახმელეთო ჯარების დაქვემდებარებაშია; აქედან გამომდინარე, მიზანშეწონილია, რომ ის კვლავ გენერალური შტაბი გახდეს.
ასევე მნიშვნელოვანია სამხედრო მოსამსახურეების სოციალური დაცვა, ომის ვეტერანების, სამხედრო პენსიებით, სადაზღვევო პაკეტით, საცხოვრებელი ფართებით უზრუნველყოფა და სამხედრო მოსამსახურეების ოჯახების უზრუნველყოფა,“ _ ამბობენ ჩვენთან საუბარში სამხედრო მოსამსახურეები.
