დაახლოებით, 2 კვირის წინ, გამგეობის კანცელარიაში დავით ჩხაიძის განცხადება შევიდა. როგორც ჩვენი წყარო ამბობს, “ჩხაიძე საზოგადოებისთვის ნაკლებად ცნობილი პირია. იგი აცანელია და საპარლამენტო არჩევნებში კოალიცია “ქართულ ოცნებას” საორგანიზაციო საქმეებში ეხმარებოდა _ კერძოდ, აცანის ზონაში გეგმავდა და ორგანიზებას უკეთებდა კოალიციის კანდიდატის, თემურ ჩხაიძის შეხვედრებს. დავით ჩხაიძე კოალიციის შტაბში ნაკლებად ჩნდებოდა”.
გამგებლობის სურვილი კოალიცია “ქართული ოცნების” წევრებისა და დეპუტატ თემურ ჩხაიძისთვის მას შემდეგ გახდა ცნობილი, რაც ყოფილმა გვარდიელმა ოფიციალურად განაცხადა ამის შესახებ. მას კონსულტაციები არ ჰქონია არც დეპუტატთან, არც მისი შტაბის წევრებთან თუ პარტიულ ლიდერებთან. ამ ფაქტს დავით ჩხაიძე ასე ხსნის: “მე ვარ დამოუკიდებელი კანდიდატი. არც ერთი პარტიიდან არ ვარ წარდგენილი და არც ვალდებული ვარ, კონსულტაციები მეწარმოებინა ვინმესთან. ამ ხალხმა ვერ გაიგო, რომ წავიდა ის დრო, როცა დირექტივებს ზემოდან იღებდნენ”.
მისი გამგებლად დანიშვნის შესაძლებლობა პირველად “რესპუბლიკური პარტიის” ადგილობრივმა ლიდერმა, რომან ბიწაძემ გაახმოვანა. ეს მანამდე მოხდა, სანამ ჩხაიძე ოფიციალურად შეიტანდა განცხადებას ლანჩხუთის გამგეობაში. მას, მართალია, ახლო მეგობრობა არ აკავშირებდა ბიწაძესთან, მაგრამ ამას ხელი არ შეუშლია პოლიტიკურ თამაშებში გამოწრთობილი “რესპუბლიკელისთვის”, დავით ჩხაიძის კანდიდატურა თავის სასარგებლოდ გამოეყენებინა _ ასეთი აზრია გავრცელებული კოალიციის საარჩევნო შტაბში.
რომან ბიწაძე კატეგორიულად ამტკიცებდა, რომ ლანჩხუთში ვერც ერთ მაღალ თანამდებობაზე ვერავინ დაინიშნებოდა კოალიციაში შემავალი პარტიების ლიდერებთან შეუთანხმებლად. ესენი კი, თავად ბიწაძესთან ერთად, არიან “თავისუფალი დემოკრატებისა” და პარტია “ქართული ოცნების” რაიონული ორგანიზაციების ხელმძღვანელები _ ელგუჯა ჩხაიძე და სოსო ბოლქვაძე. ეტყობა, რომან ბიწაძეს დაავიწყდა, საკუთარი, პრესაში რამდენჯერმე გამოქვეყნებული განცხადება და დავით ჩხაიძის კანდიდატურას ისე დაუჭირა მხარი, თანაგუნდელთა აზრით არც კი დაინტერესებულა.
დავით ჩხაიძემ ჩვენთან საბარში განაცხადა, რომ ვალდებული არ იყო ყველასთვის წინასწარ გაენდო საკუთარი გადაწყვეტილება: “როგორც რომანი მოვიდა და დაინტერესდა, ისე მოსულიყვნენ სხვებიც _ სოსო ბოლქვაძეც და ელგუჯა ჩხაიძეც. მათ არავითარი ინტერესი არ გამოუხატავთ, თორემ ავუხსნიდი, რატომ მივიღე ეს გადაწყვეტილება”, _ თქვა გამგებლობის კანდიდატმა.
ამის შესახებ სოსო ბოლქვაძეს და ელგუჯა ჩხაიძეს ერთნაირი პოზიცია აქვთ: “დავით ჩხაიძე არ არის კოალიციიდან წარდგენილი კანდიდატი. ამიტომ, არ ვართ ვალდებული, მისი შეხედულებებით და მოსაზრებებით დავინტერესდეთ. მას აქვს უფლება თავისი კანდიდატურა წარადგინოს. რატომ უნდა ვაწარმოოთ კონსულტაციები კანდიდატთან, რომელიც ოფიციალურად ჩვენი წარდგენილი არ არის?” _ კითხულობენ ისინი.
ელგუჯა ჩხაიძე მიიჩნევს, რომ “შესაძლოა, თვითმმართველობის არჩევნებში კოალიციაში შემავალმა პარტიებმა დამოუკიდებლად მიიღონ მონაწილეობა და რომან ბიწაძე წინასწარ უმაგრებს პოზიციებს საკუთარ პარტიას. მას, დავით ჩხაიძის სახით, დასაყრდენი ეყოლება აცანაში, საიდანაც იგი ხმების წამოღებაში დაეხმარება”.
“ქართული ოცნების” შტაბში ამბობენ, რომ რომან ბიწაძე გამუდმებით საუბრობს კოალიციის სახელით, რეალურად კი, როგორც ჩანს, დანარჩენ ლიდერებთან არაფერს ათანხმებს, რაც კარგად ჩანს კონკრეტული მაგალითიდან.
მას შემდეგ, რაც ოფიციალურად გაცხადდა, რომ ჩხაიძეს გამგებლობის ამბიცია აქვს, გამოჩნდნენ პირები, რომლებიც კატეგორიულად ეწინააღმდეგებიან ამ იდეას. ლანჩხუთის კულტურის ცენტრთან არსებული, ვალოდია წულაძის სახელობის თეატრისა და კინოს მუზეუმის დირექტორი, მაია ჩხაიძე დავით ჩხაიძეს კონკრეტულ ბრალდებებს უყენებს. ჩხაიძემ ადგილობრივ პრესაში საინფორმაციო ომიც კი გააჩაღა დავით ჩხაიძის წინააღმდეგ _ 1993 წლის სამოქალაქო ომის დროს, ლანჩხუთის რაიონის სოფელ ჯაპანაში მძინარე მხედრიონელები დახვრიტეს. ამ შემზარავი ისტორიის ორგანიზატორად მაია ჩხაიძე სწორედ დავით ჩხაიძეს ასახელებს, რომელიც მაშინ ეროვნული გვარდიის ლანჩხუთის ნაწილის ხელმძღვანელი იყო.
დავით ჩხაიძე, ყოველგვარი ნერვიულობის გარეშე ცდილობს ამ ბრალდების გაბათილებას: “მაშინ, ზვიად გამსახურდიას კანონიერად არჩეული ხელისუფლების მომხრე და დამცველი ვიყავი და ბანდფორმირებებს ვებრძოდი. ამას სამოქალაქო ომიც კი არ ერქვა _ ეს იყო ბრძოლა კრიმინალურ დაჯგუფებებთან. იმ ქალაქში ვიცავდი წესრიგს, სადაც პირველი პრეზიდენტის ხელისუფლებას ეროვნული გვარდია აღადგენდა. ამ კონკრეტული ფაქტის დროს, ლანჩხუთში საერთოდ არ ვიმყოფებოდი. ჩემი ნაწილი აბაშაში იყო დისლოცირებული”, _ ამბობს ყოფილი სამხედრო. მისთვის ცოტათი ძნელი ასახსნელი აღმოჩნდა, ასე გააფთრებით რატომ უპირისპირდება მას თანასოფლელი და შორეული ნათესავი.
რომან ბიწაძის აზრით, ჩხაიძე დისციპლინირებული და მოწესრიგებული ადამიანია, რომელიც “რკინის ხელით” შეძლებს ლანჩხუთის მართვას.
არის საზოგადოებისთვის საინტერესო კიდევ ერთი საკითხი _ მიუხედავად ათასი მითქმა-მოთქმისა და ბევრი სავარაუდო კანდიდატის დასახელებისა, გამგებლის ვაკანსიის მოსაპოვებლად, არც ერთ მათგანს განცხადება არ შეუტანია. 2 კვირაა, რაც ლანჩხუთის საზოგადოებასა და პოლიტიკურ წრეებში მხოლოდ დავით ჩხაიძის უალტერნატივო და უკონკურენტო კანდიდატურა განიხილება. ლანჩხუთის მაჟორიტარი დეპუტატი, თემურ ჩხაიძეც არაა მოვლენების საქმის კურსში. დავით ჩხაიძის განმარტებით, მართალია, თემური მისი ძმის ახლო მეგობარია და წინასაარჩევნო პერიოდში ერთგულად ედგა გვერდით, მაგრამ მისი გადაწყვეტილების შესახებ დეპუტატისთვის არ უცნობებია.
დავით ჩხაიძე დღემდე ბიძინა ივანიშვილის უსაფრთხოების სამსახურის თანამშრომლად რჩება. მის უშუალო მოვალეობაში შედიოდა იმ ტერიტორიების გარე პერიმეტრის უსაფრთხოება, სადაც პოლიტიკური ლიდერი უნდა ჩასულიყო. მისი თქმით, ივანიშვილთან რამე ურთიერთობა მას არ ჰქონია. მიუხედავად მცდელობისა, ჩვენ ვერ შევძელით, დაგვედგინა ვინ ლობირებს ჩხაიძის კანდიდატურას. მისი ერთადერთი “ლობისტი”, ადგილობრივ დონეზე, რომან ბიწაძე აღმოჩნდა. თავად კანდიდატის თქმით, მას ლობისტი არც სჭირდება. იგი ღრმადაა დარწმუნებული, რომ ბოლოს და ბოლოს, დადგა ის დრო, როცა ადამიანი მხოლოდ თავისი შესაძლებლობების და პიროვნული თვისებების წყალობით დაინიშნება კონკრეტულ თანამდებობაზე და არა ზემოდან დარეკვებით ან ნათესაური კავშირებით.
იმ შემთხვევაში, თუ დავით ჩხაიძე ლანჩხუთის გამგებლად მოგვევლინება, აპირებს ხისტი, მაგრამ სამართლიანი საკადრო პოლიტიკა განახორციელოს. იგი გამორიცხავს, რომ რომელიმე თანამდებობაზე “ჩაწყობით” დანიშნოს კადრი. როგორც თავად გვარწმუნებს, გუნდთან ერთად შეისწავლის ნებისმიერი ადამიანის შესაძლებლობებს და მხოლოდ სამართლიან გადაწყვეტილებებს მიიღებს.
ანალოგიურში გვარწმუნებდა ყოფილი გამგებელიც, მაგრამ მხოლოდ სიტყვებით _ ლანჩხუთში ყველამ კარგად იცოდა, რომ გიორგი გოგუაძის პირადი სურვილის და მხარდაჭერის გარეშე დამლაგებლადაც კი ვერავინ დაინიშნებოდა.
საკადრო პოლიტიკის გარდა, დავით ჩხაიძემ ჩვენთან, ადგილობრივ დონეზე მრეწველობისა და სოფლის მეურნეობის განვითარებაზეც ისაუბრა. მისი აზრით, მარტო აცანიდან წასული იმდენი ცნობილი და შეძლებული ბიზნესმენია ქვეყანაში, მხოლოდ მათი სურვილი საკმარისი იქნება, რომ მცირე საწარმოები ამუშავდეს არამარტო აცანაში, არამედ მთელ ლანჩხუთშიც.
სხვათა შორის, ჩხაიძემ პარლამენტარ მარიკა ვერულაშვილის ქმარი, სოსო ჩხაიძეც ახსენა და არ გამორიცხა, რომ მან აცანაში რაიმე ბიზნესი დაიწყოს. გამგებლობის კანდიდატის ოპონენტის, მაია ჩხაიძის თქმით, სოსო ჩხაიძე დავით ჩხაიძის შვილის ნათლიაა. ამასთანავე, ის არის ემზარ თედორაძის მეჯვარეც. თედორაძე წინა ხელისუფლების დროს აცანის რწმუნებული იყო და “ნაციონალურ” იდეებს ერთგულებას უცხადებდა. კულტურის ცენტრის თანამშრომელი მიიჩნევს, რომ დავით ჩხაიძე ემზარ თედორაძის და ბიზნესმენ სოსო ჩხაიძის ერთობლივი პროექტია, ხოლო პარლამენტარი მარიკა ვერულაშვილი _ ამ პროექტის მხარდამჭერი.
დავით ჩხაიძის ირგვლივ საზოგადოებაშიც არაერთგვაროვანი აზრი ტრიალებს. მას ჰყავს როგორც მომხრეები, ისე _ მოწინააღმდეგეები, რომლებიც არგუმენტებს არ იშურებენ საკუთარი სიმართლის დასამტკიცებლად.
კოალიცია “ქართული ოცნების” ლანჩხუთის ორგანიზაციის ხელმძღვანელი სოსო ბოლქვაძე ამბობს, რომ “ამ ეტაპზე აუცილებელი არ არის ახალი გამგებლის დანიშვნა. ამჟამინდელი მოვალეობის შემსრულებელიც კარგად ართმევს თავს საქმეს. ხოლო თუ მარტში თვითმმართველობის ვადამდელი არჩევნები დაინიშნება, მაშინ ხალხი გამგებელსაც თავად აირჩევს, რაც ყველა გაუგებრობას გააქარწყლებს”.
