ქალბატონი ნუნუ სოციალურად დაუცველ ოჯახს ეკუთვნის და მისი ჩათვლით, ოჯახში ექვსი სული ცხოვრობს. დუხჭირი ცხოვრების გამო, მასთან საცხოვრებლად თავისივე შვილიშვილი გადავიდა. 21 წლის სოფოს ორი შვილი ჰყავს, აქედან უფროსი ბაღში დადიოდა, მაგრამ… თუ რატომ არ დადის 5 წლის ლ.ლ. ახლა საბავშვო ბაღში, “გურია ნიუსთან” მისი ბებია საუბრობს.
ნუნუ გოგუა: _ ბავშვი სექტემბრის თვეში მივიყვანეთ ბაღში, გვითხრეს, არ არის ადგილიო. შევეხვეწეთ, რომ იქნებ, ბავშვი მიეღოთ და გამგემ გვითხრა, თუ ადგილი იქნება, აუცილებლად შემოგითვლითო. სამი-ოთხი დღის შემდეგ შემოგვითვალა, ბავშვის მიყვანასთან დაკავშირებით. მოკლედ, სექტემბერის თვეში მივიყვანეთ. 1 ოქტომბერს ბავშვი ჭინჭრის ციებ-ცხელებით გაგვიხდა ავად, ცუდად იყო. 3 ოქტომბერს შევუთვალე ბაღში, მეზობლის ბავშვის დედას დავაბარე, რომ ავად მყავდა შვილიშილი და ბაღში ვერ მივიდოდა. ამის შემდეგ, ოზურგეთელ ექიმებს ვანახეთ, ბაილეთის ექიმსაც ვანახე, თუმცა უშედეგოდ და წავიყვანეთ ბათუმში. იქ გვითხრეს, რომ ბავშვს ერთთვიანი დიეტა უნდა ჰქონოდა და თანაც _მკაცრი. ჩემი შვილიშვილი მეხუთე წელშია და აქედან გამომდინარე, ვერ წავიყვანე. უკეთესად როგორც კი გახდა, 20 დღის შემდეგ, საბუთი მქონდა მისატანი, დედამისმა წაიყვანა, მიიტანა ეს საბუთი და გამგემ საბუთებიც არ ამოაღებინა, ისე უთხრა, ბავშვი უკვე სიიდან ამოვიღეო. მე არ ვიცოდი ავად თუ იყო და ჩემთვის არავის არ უთქვამს, მომვლელმა და მასწავლებელმა იცოდა და გამგე იძახის, მე არ ვიცოდიო. ჩემს შვილს, 21 წლის გოგოს უთხრა, რომ შენ სათანადოდ შვილს არ მიაქციე ყურადღებაო. რა ექნა? ადგა და წამოიყვანა უენოდ ჩემი შვილიშვილი. ამის შემდეგ ველოდებოდი, იქნებ, შემომითვალოს რამე-მეთქი. 19 ოქტომბერს დავწერე განცხადება, რომ ჩემი შვილიშვილი არაფრის გამო გამოუშვა ბაღიდან, ექიმის ცნობის მიტანამდე. შემდეგ მომივარდა სახლში ეს ადამიანი. ასეთი რა გითხარით, მაგისთვის მე არაფერს მეტყვიანო. საბუთის მიტანისთანავე მომივარდა სახლში. სოციალურად დაუცველი ვართ, მეუღლე მყავს პირველი ჯგუფის ინვალიდი. ჩემი შვილიშვილი ჩემთან ცხოვრობს, რადგან არ აქვს საშუალება და ექვსი სული ერთად ვცხოვრობთ. რა სიტყვები არ გვითხრა, რას ვითხოვდით ასეთს? _ გვითხრა ნუნუ გოგუამ.
“გურია ნიუსი” ბაილეთის საბავშვო ბაღის მენეჯერს ლუიზა ზაქარიაძეს დაუკავშირდა. მან სატელეფონო საუბრის დროს განაცხადა, რომ არანაირი პრობლემა არ აქვს ლ-ს ოჯახთან.
ლუიზა ზაქარიაძე: _ ლ.ლ. ბაღში შარშან, დაჰყავდათ, ორი თვის განმავლობაში. შემდეგ, ბავშვის ჯანმრთელობის ცნობა არ წარმოადგინეს და არ დაჰყავდათ სისტემატურად. აქედან გამომდინარე, ხელშეკრულების მიხედვით, ათის დღის განმავლობაში თუ არ ეცოდინება საბავშვო ბაღის ადმინისტრაციას, რას სჭირს ბავშვს, ცნობა თუ არ მექნება, ავტომატურად ვუშვებთ ბაღიდან. ჩვენ ვაცნობეთ, რა თქმა უნდა, მაკა ჭყონიას. მაგ ქალბატონს შეუძლია, იჩივლოს სასამართლოში, რადგან მე არანაირი კანონი არ დამირღვევია, მაგისგან არანაირი საბუთი არ გვქონდა. სექტემბერში მივიღეთ, თუმცა, ცოტა მოგვიანებით და დავუკავშირდით.
_ შემდეგ რა მოხდა? როგორც ლუკას ბებიამ გვითხრა, ბავშვის ავადმყოფობის შესახებ გამგემ იცოდათ ყველაფერიო.
_ სექტემბრის თვეში რამდენიმე დღით მოვიდა და შემდეგ, 20 ოქტომბრამდე არ გამოჩენილა. არც განცხადება და არც საბუთი არ გვქონდა დაწერილი. მე ვუთხარი, უპასუხისმგებლოდ რატომ მოიქეცით, 24 დღე ბავშვი არ მოსულა _თქო.
_ როგორც გვითხრეს, ბაღში იცოდნენ ბავშვის ავადმყოფობის შესახებ.
_ მეტი რა გითხრათ, ვეღარ ვხვდები. წავიდეს და სასამართლოში განიხილოს ეს საქმე, მასთანაც ვიყავი სახლში და ავუხსენი სიტუაცია. ვუთხარი, რომ მისი შვილიშვილი დაებრუნებინა და ეტარებინა, მეტი რა გამაკეთებინა? _ გვითხრა ლუიზა ზაქარიაძემ.
ა.ი.პ. ოზურგეთის მუნიციპალიტეტის სკოლამდელი საგანმანათლებლო ცენტრის ოფროსის, მაკა ჭყონიას თქმით, მასთან ბაილეთის საბავშვო ბაღის მენეჯერს ახსნა განმარტება უკვე შესულია, სადაც კიდევ ამავე მაღის ოთხი თანამშრომელი აწერს ხელს.
_ არანაირ შეურაცხყოფას ადგილი არ ჰქონია. ქალბატონი ლუიზა, წლების განმავლობაში მუშაობას ბაღის მენეჯერად და მასზე არანაირი პრეტენზია არ შემოსულა. ჩვენთან ასევე შემოსულია ნუნუ გოგუას განცხადება და ის ითხოვს ქალბატონი ლუიზას სამსახურიდან დათხოვას, რაც არის არ არის მართებული, რადგან მას არაფერი გაუკეთებია უკანონოდ, _ გვითხრა მაკა ჭყონიამ.
