2006 წლის 6 სექტემბერს ქართველმა სამართალდამცავებმა სახელმწიფო გადატრიალების აღკვეთის შესახებ განაცხადეს. დააკავეს იგორ გიორგაძის 69 მომხრე, რომლებსაც მიტინგზე ხალხის მობილიზება, პროვოკაციის მოწყობა და სტრატეგიულად მნიშვნელოვანი ობიექტების დაკავება და თვით ადამიანების სიკვდილიც კი ჰქონდათ დაგეგმილი. საბოლოოდ საქმე 14 დაკავებულის მიმართ წარიმართა, მაია ნიკოლეიშვილი, რომელმაც “დანაშაული” აღიარა და სხვებიც დაადანაშაულა, მალევე გაათავისუფლეს, ძებნაში მყოფ გელა არჩვაძეს სასამართლომ დაუსწრებლად შეუფარდა 7 წელი, ხოლო დანარჩენი 12 სხვადასხვა ციხეებში გაამწესეს. ამ დროისათვის ათმა მათგანმა უკვე დატოვა საპატიმრო ადგილი, დანარჩენი ორი _ კახა ქანთარია და რამაზ სამნიძე კი ციხეს სავარაუდოდ დღეს ან ხვალ დატოვებენ.
როგორც ადვოკატი გელა ნიკოლაიშვილი აცხადებს, ეს საქმე მთლიანად ცრუ მოწმეების ჩვენებებზე აიგო და აქედან გამომდინარე მათ აღიარებას დღეს დიდი მნიშვნელობა აქვს: “პაპუნა შონიამ 6 ნოემბერს გააკეთა განცხადება და მისი ეს ჩვენება ვიდეოზეც ჩავწერეთ, გუშინწინ მაია ნიკოლეიშვილმაც გამოთქვა სიმართლის თქმის სურვილი. ასევე სხვა მოწმეებსაც მოვუწოდებ, აღიარონ რომ ზეწოლით დააწერინეს ჩვენებები, თორემ მათ მიმართ აუცილებლად აღიძვრება საქმე”, _ განაცხადა დღევანდელ პრესკონფერენციაზე გელა ნიკოლaიშვილმა. მისი თქმით, ის იგორ გიორგაძის მომხრეებს მაშინაც იცავდა,, როდესაც დღევანდელ ხელისუფლებაში მყოფი ზოგიერთი ჩინოვნიკი და არასამთავრობო ორგანიზაცია ტაშით შეხვდა მათ დაკავებას.
პარტია “სამართლიანობის” ზუგდიდის ოფისის ყოფილმა ხელმძღვანელმა პაპუნა შონიამ დღევანდელ პრესკონფერენციაზე განაცხადა, რომ ყველაფერი, რაც გამოძიების დროს დაწერა და ილაპარაკა, ტყუილია: “6 სექტემბერს ზუგდიდის პოლიციამ ოფისი გამაღებინა და დაიწყეს ჩხრეკა, რას ეძებდნენ არ ვიცი, მერე წამიყვანეს პროკურატურაში, სადაც მითხრეს რომ ხელი უნდა დამედო ჩემი შვილის ნათლია რეზო გულიასთვის. მე უნდა მეთქვა რომ რეზო გულიამ სახელმწიფო გადატრიალებაში ჩემი ჩაბმა სცადა. ცრუ ჩვენების მიცემაზე უარი განვაცხადე. თანამშრომლებმა ავტომატი გადატენეს , მომაბჯინეს და დამემუქრნენ, თუმცა ტყუილის დაწერა მაინც ვერ მაიძულეს,” _ განაცხადა შონიამ.
ამის შემდეგ შონია თბილისში ე.წ. მოდულის შენობაში ჩამოჰყავთ და აიძულებენ გადატრიალების ორგანიზებაში თემურ ჟორჟოლიანი და მაია თოფურია ამხილოს: “ვუთხარი, ჟორჟოლიანს საერთოდ არ ვიცნობ და ხელი როგორ დავადო-მეთქი. მაშინ თოფურიას დაადე, რა ენაღვლება მაგას, იგორ გიორგაძის ახლობელია და უშველისო. ამის შემდეგ ყავა მოვითხოვე, დავლიე თუ არა საშინლად ვიგრძენი თავი.”
საბოლოოდ პაპუნა შონიამ მაინც დაწერა პროკურატურისთვის სასურველი ჩვენება, თუმცა გამომძიებლისთვის არ დაუმალავს, რომ სასამართლოში იტყოდა სიმართლეს.
“როდესაც საქმის სასამართლოში განხილვა დაიწყო, შონიას დაემუქრნენ. მას საქართველო დროებით უნდა დაეტოვებინა. სხვათა შორის მას ფულიც კი მიუტანეს სახლში გაჩუმების სანაცვლოდ, რაზედაც შონიამ უარი თქვა,” _ აცხადებს ადვოკატი ნიკოლაიშვილი.
შონიამ მართლაც დატოვა ქვეყანა, თუმცა წასვლამდე აღიარებითი ჩვენება დაწერა, ნოტარიუსს დაამტკიცებინა და საკუთარ დას გელა ნიკოლაიშვილთან გაატანა.
მოსამართლე მამუკა ნოზაძემ შონიას ჩვენება არ მიიღო, მისი თქმით გაურკვეველი იყო ნოტარიულად დამტკიცებული ჩვენების ავტორის ვინაობა.
დღევანდელ პრესკონფერენციაზე ციხეებიდან სხვადასხვა დროს გათავისუფლებულმა ეწ გიორგაძის მომხრეებმა იმ პროკურორების, მოსამართლეებისა და გამომძიებლების გვარებიც ჩამოთვალეს, რომლებმაც მათი თქმით პასუხი უნდა აგონ გაყალბებული საქმის წარმოებისათვის: “დღეს ეს ადამიანები აღარ უნდა მოხვდნენ სხვადასხვა თანამდებობებზე, მათ ადვოკატობის უფლებაც კი არ უნდა მიეცეთ”, _ აცხადებენ ყოფილი პოლიტპატიმრები.
პრესკონფერენციას ირინა სარიშვილიც დაესწრო. ის აცხადებს, რომ არ ეთანხმება იუსტიციის მინისტრ თეა წულუკიანის ინიციატივას, სტრასბურგიდან ქართული საქმეების წამოღების შესახებ: “ასე მარტივი არ არის სხვისი საქმეების გამოთხოვა. წულუკიანი ვერ გამოითხოვს ამ საქმეებს, თუ ამაზე არ იქნება ჩვენი კეთილი ნება. ეს კეთილი ნება იქნება მაშინ თუ ჩვენ დავინახავთ რომ ამ ხელისუფლების პირობებში შესაძლებელია სამართლიანობის აღდგენა. ჯერჯერობით, დასკვნების გამოტანას არ ვჩქარობთ იქედან გამომდინარე რომ დღევანდელი ხელისუფლება იმ ხელისუფლების ოპოზიციაში როცა იყო, ძალიან აქტიურ მონაწილეობას იღებდა ჩვენი საზოგადოებისგან იზოლაციის პროცესში და ტაშითაც კი შეხვდნენ ჩვენს არაადამიანურ დაპატიმრებას, მათი გვარები დღეს ყველას ახსოვს,” _ განაცხადა სარიშვილმა “გურია ნიუსთან” საუბარში.
ირინე სარიშვილი აღნიშნულ საქმის ყველა ცრუ მოწმეს, რომლებმაც პროკურატურასთან ითანამშრომლეს, აღიარებისკენ მოუწოდებს: “პაპუნა შონიას აღიარებით რეს სიურპრიზი არ მიგვიღია, იმიტომ რომ დიდი ხანია ვიცოდით მისი სურვილის შესახებ. რაც შეეხება მაია ნიკოლაიშვილს, ეს სულ სხვა თემაა, რადგან ფაქტობრივად სწორედ მისი ჩვენება გახლდათ ჩვენი დაპატიმრების და საზოგადოებისაგან ჩვენი იზოლირების საფუძველი პირველ ეტაპზე. ეს იქნება მაია თუ სხვა , ყველას ძალიან კარგად უნდა ახსოვდეს რომ ცრუ მოწმის აღიარება თუ ნებაყოფლობით ხდება ეს, ამსუბუქებს მის მდგომარეობას, თუმცა იურიდიულად ის მაინც აგებს პასუხს,” _ განაცხადა სარიშვილმა.
