ბრალდებულის მამა როლანდ ახალაია ცინიკურს უწოდებს სასჯელაღსრულების სამინისტროს ამ გადაწყვეტილებას და ამავე დროს შიშობს, რომ ამ ციხეში მისი შვილის უსაფრთხოება დაცული ვერ იქნება.
“კანონიერ ქურდებთან რა საქმე აქვს ბაჩანა ახალაიას? ის უნდა იჯდეს სხვა პატიმრებთან და სხვა საპყრობილეში. ჩვენ ვფიქრობთ, რომ ის აქ სპეციალურადაა შემოყვანილი, რათა მოხდეს მასზე ზეწოლა ქურდების მეშვეობით, ჩვენ გვაქვს დაუზუსტებელი ინფორმაცია, რომ ქურდების დავალებით და მოთხოვნით მოხდა მისი აქ გადმოყვანა. მოვითხოვთ ბაჩო ახალაიას დაუყოვნებლივ გადაყვანას სახვა საპყრობილეში და მისი უსაფრთხოების დაცვას,” _ განაცხადა დეპუტატმა როლანდ ახალაიამ “გურია ნიუსთან” საუბარში.
თეა თუთბერიძე კი აცხადებს რომ ქვეყანაში კრიმინალი რეალურად ბაჩო ახალაიამ დაამარცხა და არა “ლამაზად შეღებილ მანქანებში მსხდომმა უნიფორმებში გამოწყობილმა პატრულებმა”: “როგორ ფიქრობთ, ციხეში, სადაც სხედან კანონიერი ქურდები და ავტორიტეტები, იმ ადამიანის გადმოყვანა, რომელმაც მთელ საბჭოთა სივრცეში პირველმა გამოუცხადა ბრძოლა კანონიერ ქურდებს, რას ემსახურება? სწორედ ბაჩო ახალაიას დამსახურებით ჩამოსცილდნენ ეს ადამიანები ციხეების მართვას, სწორედ ბაჩო ახალაიას დამსახურებით ვეღარ მოახერხეს მათ ქვეყანაში დანაშაულის დაგეგმვა. სწორედ ბაჩოს დამსახურებაა, რომ ამ ქვეყანაში შემცირდა დანაშაულის მასშტაბები და არა ლამაზად შეღებილ ავტომანქანებში მსხდომი და ლამაზ უნიფორმებში ჩაცმული პატრულების. მე, რა თქმა უნდა, ამით პატრულის როლს არ ვაკნინებ, მაგრამ რომ არა ბაჩო ახალაია, ამ მანქანებს აგიფეთქებდნენ და დაგიცხრილავდნენ,” _ განაცხადა თუთბერიძემ “გურია ნიუსთან” საუბარში.
პატიმარი ბაჩო ახალაია მონიტორინგის ჯგუფის წევრებმა მოინახულეს. ხათუნა გაგნიძის თქმით, ახალაიამ განაცხადა, რომ ამ ეტაპზე მისი უსაფრთხოება დაცულია, თუმცა გრძელვადიან პერსპექტივაში არ გამორიცხავს ამ მდგომარეობის შეცვლას.
“სართულზე, სადაც ბაჩო ახალაიას საკანია განთავსებული, ორი ფლიგელია. ერთ ფლიგელში იმყოფება მხოლოდ ახალაია, ხოლო გვერდით ფლიგელში რამდენიმე კანონიერი ქურდი. აღნიშნულ დაწესებულებაში სულ 35 პატიმარია და ჩემი ინფორმაციით, აქედან 15 მაინც არის ავტორიტეტი,” _ განაცხადა გაგნიძემ “გურია ნიუსთან” საუბარში.
ახალაიას ოჯახი თვლის, რომ პატიმრის უსაფრთხოება გაცილებით დაცული იყო გლდანის მე-8 დაწესებულებაში, რასაც არ ეთანხმება სასჯელაღსრულების მინისტრი სოზარ სუბარი. მისი განმარტებით ახალაიას მე-7 დაწესებულებაში გადაყვანა მისი უსაფრთხოებისთვის გახორციელდა.
“რა თქმა უნდა, ეს გადაყვანა კანონთან შესაბამისობაშია, მაგრამ მორალურად გაუმართლებელია. წარმოიდგინეთ, რამხელა მორალური სტრესია აქ ყოფნა იმ ადამიანისთვის, რომელიც მთელი ცხოვრება ქურდებს ებრძოდა”, _ აცხადებს ყოფილი “კმარელი” და შს გლდანი-ნაძალადევის სამმართველოს უფროსის ყოფილი მოადგილე გიორგი ონიანი.
ნაციონალი დეპუტატები და ახალაიას ოჯახი მიიჩნევენ, რომ პატიმარ ბაჩო ახალიას უსაფრთხოების უზრუნველყოფა ყველაზე უკეთ მატროსოვის ქუჩაზე განთავსებული დაწესებულებაშია შესაძლებელი _ იქ სასჯელს ყოფილი პოლიციელები და ე. წ. “ციხის ჯალათები” იხდიან.
თეა თუთბერიძე დარწმუნებულია, რომ ახალაიასთვის ეს პატიმრობა დროებითია, რადგან ხელისუფლება მის წინააღმდეგ აღძრულ ვერც ერთ საქმეს ბოლომდე ვერ მიიყვანს.
” გურია ნიუსის” კითხვაზე, რომ სამი ნაწამები პატიმარი უშუალოდ ადებს ხელს ახალაიას, თუთბერიძემ განაცხადა: “სამი პატიმარი კი არა, სამი ათასიც რომ ადებდეს ხელს, მხოლოდ დაზარალებულის ჩვენებით მისი ბრალეულობა ვერ დამტკიცდება. თუმცა, ამ სასამართლოს და ამ პროკურატურის პირობებში ყველაფერი შესაძლებელია. მოსამართლე რომ გყავს მონა, ის იქნება მონა შენს ხელისუფლებაშიც და ახალ ხელისუფლებაშიც”.
ახალაიას მხარდამჭერ აქციას გაერთიანებული შტაბის ყოფილი უფროსი გიგი კალანდაძეც დაესწრო, თუმცა, მას მედიასთან კომენტარი არ გაუკეთებია.
