აღნიშნულ ფაქტზე წუხელ მთელი ღამის განმავლობაში იკითხებოდნენ კუდ-ისა და სოდ-ის მაღალჩინოსნები _ გიორგი ყავლაშვილი და ლევან ქარდავა.
ინფორმაცია ბიძინა ივანიშვილის დაცვის წევრის, ბესო სურმავას გაუჩინარების შესახებ, საზოაგდოებისთვის პირველად „გურია ნიუსის“ საშუალებით გახდა ცნობილი.
ქრონოლოგიურად გთავაზობთ დეტალებს ბესო სურმავას გატაცებასთან დაკავშირებით, რომელსაც “გურია ნიუსი” სისტემატურად აშუქებდა.
ბესო სურმავას მეუღლემ მაკა ლობჟანიძემ 27 სექტემბერს, “გურია ნიუსთან” საუბრისას განაცხადა, რომ მისი მეუღლის ადგილსამყოფელი უცნობია.
მისივე ინფორმაციით, ის სამართალდამცველებს ჰყავდათ აყვანილი.
დაკავების მიზეზი ლობჟანიძისთვის უცნობი იყო. ამბობდა, რომ მიმართვა, რომელიც დღის მეორე ნახევარში გავრცელდა და “youtub” – ზე აიტვირთა, რომელშიც მისი მეუღლე ბიძინა ივანიშვილის მაკომპრომიტირებელ მასალებზე საუბრობდა, ძალდატანების შედეგია იყო.იგივეს ამბობდა სურმავას ცოლისძმა:
_ ბესო ამ დილით აიყვანეს სამართალდამცავებმა. ის მორიგეობიდან სახლში ბრუნდებოდა და გზიდან გაუჩინარდა. ამ დროისთვის, დაზუსტებით შემიძლია გითხრათ, რომ მიმართვა, რომელიც გავრცელდა, ბესოს პოლიციაში ჩააწერინეს “სკაიპის” მეშვეობით და გეტყვით, რომ ბესოს არანაირი მაკომპრომიტირებელი მასალები და ჩანაწერები არ ჰქონია _ ეს ყველაფერი სამართალდამცავების ნამოქმედარია”
გავრცელებულ ჩანაწერზე მაშინ, კომენტარი ბიძინა ივანიშვილმაც გააკეთა:
_ ეს არის ახალი ფაბრიკაცია. ჩემი დაცვის თანამშრომელი რაღაცით დააშინეს, ამათ ასეთი მეთოდები აქვთ. ის არაფერ შუაშია და არავითარი დავალება მას არ ჰქონდა. ამის დატვირთვა არის ერთადერთი _ როგორმე გადაფარონ თემა იმ მკვლელობების, იმ წამებების, რაც ციხეებში ხდებოდა. ამიტომ, ნებისმიერ ინფორმაციას ყრიან იმისთვის, რომ როგორმე მოსახლეობამ დაიწყოს ამაზე საუბარი. როგორმე “რუსთავი 2”-მა, პირველმა არხმა, “იმედმა”, “რეალტივიმ” მოახერხონ და გადაფარონ ის დანაშაულებრივი ქმედებები, რაც ქართულ ციხეებში ხდებოდა და რასაც სააკაშვილი უკვეთავდა. ცდილობენ, გადაფარონ ის სირცხვილი, რაც ჩვენ ვნახეთ. მთელ მსოფლიოში თავი მოგვეჭრა. კიდევ ერთხელ გავიმეორებ, რომ ეს არის ჩვეულებრივი ფაბრიკაცია ერთადერთი მიზნით _ როგორმე გადაფარონ თემა, ფაქტები, რეალობა, რომელიც არავის ეჭვქვეშ არ დაუყენებია, _ განაცხადა ივანიშვილმა ჟურნალისტებთან საუბრისას.
სურმავას მეუღლე ეჭვობდა, რომ მისი ქმარი ხონში დააკავეს. ბესო სურმავას სიძე, ნიკა სანოძე კი, რომელიც მაშინ “ქართული ოცნების” მაჟორიტარობის კანდიდატი იყო ხონში, ჩვენთან საუბრისას აცხადებდა, რომ მისი ცოლისძმა ხონში არ დაუკავებიათ. დააკავეს თბილისში და ხონში საიდან აღმოჩნდა, არ იცოდა.
_ ხონში ნამდვილად ჩამოიყვანეს?
_ გვითხრეს, რომ ხონში ჰყავდათ და იქ გააკეთეს ჩანაწერები.
_ მისი ამჟამინდელი ადგილსამყოფლის შესახებ თუ გაქვთ ინფორმაცია?
_ საქმის კურსში არ ვარ საერთოდ. ჯერ ის ხმა, რომელსაც მოვუსმინეთ მისი არ იყო. საერთოდ, მისი გამოცდილების ადამიანი მისი ნებით არ მიდის იქ მისი მდგომარეობის გამო.
_ მდგომარეობაში რას გულისხმობთ?
_ საკმაოდ გამოცდილია იმ სფეროში, რაშიც მოღვაწეობს. დაწყებული სახელმწიფო დაცვიდან, დამთავრებული ბატონი ბიძინას დაცვამდე. ათი წელია, ბატონ ბიძინასთან მუშაობს, ერთგულია, ვაჟკაცია და მისი ნებით არ მივიდოდა და ვითომდა ჩანაწერებს არ მიიტანდა. ამას მისი პიროვნებიდან, ხასიათიდან და ჩვეულებიდან გამომდინარე გეუბნებით.
_ ხმა ახსენეთ, რას ეჭვობთ?
_ ვფიქრობთ, რომ რაღაცის ზემოქმედების ქვეშ იყო. კარგად ვიცნობ, ცოლისძმაა და ენის მოძრაობა, გამომეტყველება… ძალიან ბუნდოვანი სურათია. სავარაუდოდ, ეს გაკეთდა ჩვენ შესაშინებლად და პირველ რიგში, ბატონი ბიძინასთვის ჩრდილის მისაყენებლად. ხონში საკმაოდ კარგი პოზიციები გვქონდა და არ გამოვრიცხავ, რომ ეს ამისთვის გააკეთეს. ჩვენ, სანდო წყარომ გვაცნობა, რომ ხონში ჰყავდათ. დილიდანვე. ხონში პოლიციის პიკაპების მობილიზება შეიმჩნეოდა. თანაც ადგილობრივი პოლიციელები არ იყვნენ. ვფიქრობდით, რომ ეს საარჩევნოდ ხდებოდა და უბნებს აკონტროლებდნენ, თუმცა, მოგვიანებით გაირკვა, რომ მათი რაოდენობა გაზრდილი ჩემი ცოლის ძმის გამო იყო.
უკვე 30 სექტემბერს, “გურია ნიუსთან” საუბრისას მაკა ლობჟანიძე აცხადებდა, რომ მეუღლე ტელეფონით დაუკავშირდა და ესაუბრა, თუმცა მისი ადგილსამყოფელი მისთვის კვლავ უცნობი იყო. ის ეჭვობდა, რომ ბესო სურმავა ფსიქიატრიულ საავადმყოფოში ჰყავდათ მოთავსებული.
_ რაც მე მაინტერესებს და ვეკითხები, პასუხს არ მცემს. მეუბნება, რომ კარგად არის. დიდი ხანი არ ჩერდება. მეუბნება კარგი, მერე დაგირეკავო. ბოლო ინფორმაციით, თითქოს, ფსიქიატრიულ საავადმყოფოში იყო ხონში, ან ფოთში. მოვიკითხეთ, რამდენად სწორი იყო ეს ინფორმაცია, მაგრამ პასუხს არ იძლევიან,” _ განაცხადა მაშინ ლობჟანიძემ.
გაუჩინარებული ბესო სურმავა სახლში მხოლოდ 3 ოქტომბერს გამოჩნდა, სულ 2 საათი გაჩერდა და მეუღლეს განუცხადა, რომ რამდენიმე დღეში დაბრუნდებოდა უკან. მაშინ მას დეტალებზე არ უსაუბრია.
შეგახსენებთ, რომ ხვალ, მთავარ პროკურატურაში, დაკავებული პირების შესახებ მტკიცებულებების ნაწილს გაასაჯაროებენ, არ არის გამორიცხული, ბესო სურმავას გატაცების დეტალებზეც იყოს საუბარი.
