“გურია ნიუსს” შპს “არსენალი+”-ის დამფუძნებელი მანანა მარიდაშვილი უკავშირდება, რომელიც ოლეგ მელნიკოვს მილიონამდე ლარის მითვისებაში ადანაშაულებს. მას ხელთ აქვს ფირმის დირექტორის – ვიქტორ სურგულაძის ჩანაწერები, საიდანაც ირკვევა, რომ ეს უკანასკნელი, დამფუძნებელთან შეუთანხმებლად, საკუთარი შეხედულებისამებრ ათი ათასობით დოლარს გასცემდა კონსტიტუციური უსაფრთხოების დეპარტამენტის უფროსის ყოფილი მოადგილეზე ოლეგ მელნიკოვზე და “მასტერაზე”.
შპს “არსენალი+” 2006 წლის ივნისში დაფუძნდა და მის საქმიანობას სხვადასხვა ქვეყნებიდან ცეცხლასროლი იარაღის შემოტანა და ადგილობრივ ბაზარზე რეალიზაცია წარმოადგენდა. ჩვენი წყაროს ინფორმაციით, ფირმა შეკვეთებს შინაგან და თავდაცვის სამინისტროებისგანაც იღებდა.
“მე და ჩემს მეუღლეს, ევგენი ხარბედიას იარაღის ბიზნესი ახლა არ დაგვიწყია, მთელ პოსტსაბჭოთა სივრცეში ჩვენ ვიყავით პირველები, ვინც იარაღით ვაჭრობას ლეგალური სახე მისცა. მოვამზადეთ საკანონმდებლო ბაზა, ვთარგმნეთ სხვადასხვა დოკუმენტები და შესაბამისობაში მოვიყვანეთ საერთაშორისო კანონმდებლობასთან. ჩემ მეუღლეს კარგი კონტაქტები ჰქონდა იარაღის უმსხვილეს მწარმოებელ კომპანიებთან და საკმაოდ წარმატებული ბიზნესი ავაწყვეთ. შპს “კავკასიონი“ იყო პირველი, რომელმაც აფხაზეთის ომის დროს იარაღის ლეგალურად შემოტანა დაიწყო”, – ამბობს მანანა მარიდაშვილი “გურია ნიუსთან” საუბარში.
2006 წელს, მარიდაშვილმა და ხარბედიამ ბიზნესის განახლება გადაწყვიტეს. თუმცა, ლიცენზიის მიღების და საქმიანობის გასაგრძელებლად, წილში ოლეგ მელნიკოვის ჩასმა მოუხდათ. სადამფუძნებლო დოკუმენტში მელნიკოვის დედა მაგდანა ბერაძე დაფიქსირდა, ფირმა “არსენალი+”-ს კი, რეალურად მელნიკოვი კურირებდა.
“მთელ დღე ფირმაში იჯდა. გირგვლიანის მკვლელობის შემდეგ “კუდში” არ ცხადდებოდა, თუმცა, ხელფასი მისთვის ყოველთვიურად მოჰქონდათ. გირგვლიანის საქმეზე მელნიკოვის დუმილი რომ ეყიდათ, ხელისუფლებამ მას ჩვენი ფირმის სახით საარსებო წყარო შესთავაზა. სამწუხაროდ, მხოლოდ მოგვიანებით გავიგეთ, რომ ჩვენი ფირმის დირექტორს ვიქტორ სურგულაძეს მელნიკოვისათვის მენეჯერის სტატუსი მიუნიჭებია, რითაც მას ჩვენი ფირმის სახელით ნებისმიერ კომპანიასთან კონტრაქტის დადების უფლება მიეცა,” _ ამბობს მარიდაშვილი.
მისივე თქმით, იარაღის მწარმოებელ კომპანიებთან ურთიერთობას ძველი კონტაქტების წყალობით კვლავ ხარბედია აგვარებდა, მელნიკოვს კი იარაღის გასაღება ევალებოდა. თავდაცვის და შს სამინისტროები მათი უმსხვილესი დამკვეთი იყო. მელნიკოვმა, რომელიც დარწმუნდა, რომ იარაღის ბიზნესით ფულის შოვნა შეიძლებოდა, 2008 წელს, საკუთარ შპს “თრეიდ ალიანს გრუპი” დააარსა, რომლის დირექტორად, კონკურენტი ფირმის “არსენალი+”ის დირექტორი ვიქტორ სურგულაძე დანიშნა, სურგულაძეს მელნიკოვის ფირმაში 50% წილი ჰქონდა.
“როდესაც ამის შესახებ გავიგეთ, სადამფუძნებლო დოკუმენტებში სასწრაფოდ შეიტანეს ცვლილება, ფირმის დირექტორად ჩვენი ფირმის მძღოლი რამაზ ხარაძე დანიშნეს, ხოლო 100% წილის მფლობელად – მისი ცოლი ნინო ხარაძე. მელნიკოვს ფირმიდან წაღებული ფულის უკან დაბრუნება მოვთხოვე, მაგრამ ის უკრაინაში გაიქცა და დღემდე იქ იმყოფება,” _ აცხადებს მანანა მარიდაშვილი.
წყაროსვე ინფორმაციით, მელნიკოვის მეუღლე სვეტლანა ოვჩარენკო უკრაინაში, საბაჟო სამსახურში მუშაობს. უკანასკნელ წლებში, ის რამდენჯერმე იმყოფებოდა საქართველოში, სადაც უძრავი ქონების შეძენით იყო დაინტერესებული.
მარიდაშვილი ვარაუდობს, რომ მელნიკოვმა იარაღის ბიზნესის აწყობა და უძრავი ქონების შეძენა სწორედ მისი ფირმიდან “გადაქაჩული” ფულით მოახერხა. ამაში მას თანამოაზრეები – დირექტორი სურგულაძე და ბუღალტერი ჩხიროძე დაეხმარნენ.
მელნიკოვისა და მისი თანამოაზრეების ფირმიდან გაშვების შემდეგ, მანანა მარიდაშვილმა აუდიტი მოიწვია. მელნიკოვისა და “მასტერას” მიერ მითვისებული 868 000 ლარის გარდა, ფირმას სხვა დანაკლისიც ჰქონდა _ დირექტორი სურგულაძე წლების მანძილზე არ იხდიდა გადასახადებს, რის გამოც, ფირმას სახელმწიფოს მიმართ 400 ათას ლარიანი დავალიანება დაუგროვდა. ამჟამად “არსენალი+” დალუქულია, ბანკის ანგარიში კი – დაყადაღებული. მაღაზიაში უამრავი უნიკალური იარაღი ინახება, რომელიც, დროთა განმავლობაში, მწყობრიდან გამოდის; ფართის მეპატრონე მაღაზიის დაცლას ითხოვს, მაგრამ მეპატრონეს იარაღის სახლში წაღების უფლება არ აქვს. მაღაზიის სპეციფიკიდან გამომდინარე, მეპატრონე ვალდებულია, მუდმივად იქირავოს დაცვა. შსს დაცვის პოლიციის დეპარტამენტისათვის მარიდაშვილს 6 ათას ლარზე მეტი აქვს გადახდილი.
“მიუხედავად იმისა, რომ “არსენალი +”-ს დავალიანება სახელმწიფოს მიმართ 400 ათას ლარზე მეტია, სათანადო ორგანოები ზედმეტად არასოდეს გვაწუხებდნენ. დამირეკავდა საგადასახადო და მეტყოდა, რომ მოდიოდა, მერე სააღსრულებო დამირეკავდა, მაგრამ საბოლოოდ არც ერთი არ მოდიოდა. აღსრულების გაჭიანურებას მელნიკოვის ფაქტორი იწვევდა. მათ იცოდნენ, რომ მე არ გავჩუმდებოდი და ფულის მითვისებაში მელნიკოვს ვამხელდი,” _ ამბობს “არსენალი+”-ის დამფუძნებელი.
2 წლისა და 8 თვის განმავლობაში, მარიდაშვილმა რამდენჯერმე მიმართა პროკურატურას და ყოფილი დირექტორის, ვიქტორ სურგულაძის მიმართ საქმის აღძვრა მოითხოვა.
“გამოძიების შეგნებულად გაჭიანურება დასტურდება იმითაც, რომ ამ 2 წლის და 8 თვის მანძილზე, შეიცვალა 4 გამომძიებელი და ჩატარდა მხოლოდ სამი საგამოძიებო მოქმედება; აქედან, სამჯერ დავიკითხე მე, რაც შეეხებათ დამნაშავეებს, გამომძიებელი ვერ ბედავდა არათუ მათ დაკითხვას, მათ გამოძახებასაც კი”, _ ამბობს დაზარალებული.
მანანა მარიდაშვილმა 2012 წლის იანვარში მთავარი პროკურორისადმი მიწერილ წერილში, პირველად ახსენა მელნიკოვი, მურთაზ ზოდელავა კი მის მფარველობაში დაადანაშაულა. ძალიან მალე ის მეუღლესთან _ ევგენი ხარბედიასთან ერთად დააპატიმრეს. ცოლ-ქმარმა ციხეში 6 თვე გაატარა.
მანანა მარიდაშვილის ინტერესებს ადვოკატი ალეკო ალადაშვილი იცავს. ის ამბობს, რომ არა ერთი მცდელობის მიუხედავად, ვერ მიაღწია არათუ მელნიკოვის, ფირმის დირექტორ სურგულაძის დაკითხვასაც კი.
“ამდენი ხანია ვითხოვთ სურგულაძის პასუხისგებაში მიცემას გადასახადებისთვის თავის არიდების ბრალდებით, მაგრამ ვერაფერს მივაღწიეთ. შემოსავლების სამსახურის საგამოძიებო დეპარტამენტი ცდილობდა გამოძიების დაწყებას, მაგრამ რამდენჯერაც დაიწყეს, იმდენჯერ შეაჩერა პროკურატურამ. შემოსავლების სამსახური ყოველთვის აწყდებოდა ვიღაცის წინააღმდეგობას და ეს ვიღაც არ შეიძლებოდა ყოფილიყო რიგითი პროკურორი ან მთავარი პროკურორი. გამოძიებას მათზე ზემდგომი ბლოკავდა,” _ ამბობს ალადაშვილი ჩვენთან საუბარში.
დაზარალებულმა მარიდაშვილმა, რამდენიმე დღის წინ, მთავარი პროკურორის არჩილ კბილაშვილის სახელზე საჩივარი შეიტანა: “ამდენი წელია ვერ მივაღწიე სამართალს, რადგან ამ დანაშაულებრივ ჯგუფს ჰყავდა ძლიერი მფარველი დათა ახალაიასა და შსს სხვა მაღალჩინოსნების სახით, რომლებიც მთავარი პროკურატურის ხელმძღვანელობასთან შეთანხმებით ზემოქმედებდნენ გამოძიებაზე, რათა აეცილებინათ პასუხისმგებლობა ცნობილი ოდიოზური პირებისათვის _ კონსტიტუციური უსაფრთხოების დეპარტამენტის ყოფილი თანამშრომლის ოლეგ მელნიკოვისთვის, რომელიც თავისი სამსახურებრივი მდგომარეობის გამოყენებით მფარველობდა შპს “არსენალი+”-ის ყოფილ დირექტორს სურგულაძეს; მასთან ერთად ითვისებდა შპს-ს კუთვნილ თანხებს და სჩადიოდა სხვადასხვა დანაშაულებრივ ქმედებებს, რის შესახებაც გამოძიებას ამომწურავი ჩვენება მივეცი. ეს ის მელნიკოვია, რომელიც იმხილება სანდრო გირგვლიანის მკვლელობის საქმეში დათა ახალაიასთან ერთად . ჩემ მიერ გამოძიებისათვის წარდგენილ დოკუმენტებში ასევე ფიგურირებს ვინმე “მასტერა”, რომელსაც სურგულაძე უხდიდა შპს-ს კუთვნილ თანხებს,” _ წერს მარიდაშვილი პროკურორის სახელზე გაგზავნილ საჩივარში.
ადვოკატი ალადაშვილი ამბობს, რომ ის უახლოეს დღეებში პროკურატურას მიაწვდის ყველა მტკიცებულებას, რაც დიდი ალბათობით, ოლეგ მელნიკოვის მიმართ სისხლის სამართლის საქმის აღძვრის საფუძველი გახდება.
