რომან ბიწაძე პიროვნულად მხარს დავით ჩხაიძეს უჭერს, რომელმაც უკვე შეიტანა განცხადება გამგებლობაზე. რაც შეეხება სოსო ბოლქვაძესა და ვახტანგ ზენაიშვილს, ისინი ამ საკითხს მკვეთრად ემიჯნებიან და აცხადებენ, რომ კოალიცია ამ ეტაპზე გამგებლის კანდიდატურას არ განიხილავს. “ამ ეტაპზე, საუბარი გამგებლობის კანდიდატებზე, არის არასერიოზული, რადგან საკრებულოს უმრავლესობას “ნაციონალური მოძრაობა” წარმოადგენს და ცენტრიდანაც დირექტივა არ მიგვიღია,” _ აცხადებენ ისინი.
როგორც უკვე გაუწყეთ, ლანჩხუთის საკრებულოში შევიდა დავით ჩხაიძის განცხადება, რომელმაც გამოთქვა სურვილი, შეასრულოს გამგებლის მოვალეობა. ამ ეტაპზე, ამ პოსტს კახაბერ ასკურავა იკავებს და თუ არა პოლიტიკური ნება და ძლიერი პოლიტიკური მხარდაჭერა, ასეთი განცხადების შეტანას აზრი არ აქვს. “გამგებლის არჩევას სჭირდება შესაბამისი პროცედურა. ასევე, მოვალეობის შემსრულებლად დანიშვნასაც. ჩვენ გვყავს მოვალეობის შემსრულებელი კახა ასკურავა. საკრებულოს შესაბამის კომისიაში შესულია დავით ჩხაიძის კანდიდატურა, რომელიც გამოთქვამს მზადყოფნას, დაიკავოს გამგებლის სავარძელი. შესაბამისი პროცედურები ჩატარდება და საკრებულო გადაწყვეტს დაუჭერს თუ არა მის კანდიდატურას მხარს,” _ აცხადებს ლანჩხუთის საკრებულოს თავკაცი რევაზ ჩიტიძე.
გავრცელებული ინფორმაციით, დავით ჩხაიძის კანდიდატურას მხარს კოალიცია “ქართული ოცნება” უჭერდა, თუმცა, ეს ვერსია არ დადასტურდა. მეორე ვერსიით, მას მხარდაჭერა, შესაძლოა, საკრებულოში გამოუცხადონ, რაც იმას ნიშნავს, რომ ლანჩხუთის კანონმდებელ ორგანოში “გადატრიალება” უნდა მოხდეს, რადგან ამ ეტაპზე უმრავლესობას “ნაციონალური მოძრაობა” შეადგენს და ბოლო პოლიტიკურმა მოვლენებმა უმრავლესობის რღვევა ერთ წევრზე, ნუგზარ ხავთასზე, შეაჩერა.
ამასთან დაკავშირებით ჯერ კიდევ დავით ჩხაიძის მიერ განცხადების შეტანამდე სკანდალური განცხადებები გააკეთა ვალოდია წულაძის სახელობის მუზეუმის დირექტორმა, მაია ჩხაიძემ. მისი თქმით, დავით ჩხაიძის სახელი გასული საუკუნის ლანჩხუთში მომხდარ ყველაზე შემზარავ ფაქტთან _ ჯაპანის ტრაგედიასთან ასოცირდება: “1993 წლის 15 სექტემბერს, დავით ჩხაიძე იყო ლოთი ქობალიას ერთ-ერთი საჯარისო ნაწილის მეთაური, ანუ გურიის ბატალიონის უფროსი, რომელსაც ეკისრებოდა პასუხისმგებლობა, რომ კონკრეტულ შემთხვევაში არ დაღვრილიყო არც ერთი ადამიანის წვეთი სისხლი. სამწუხაროდ, მოხდა შემზარავი ფაქტი, რომლის თვითმხილველები ვართ მე და ჩემი ძმა _ იგი იყო 21-ე პოლკის წევრი და აფხაზეთის ტერიტორიული მთლიანობისთვის იბრძოდა, მის გვერდით იყვნენ 17-19-21 წლის პატრიოტი ბიჭები. იმ დღეს დახოცეს დავით ლაპიაშვილი, შოთიკო თავაძე, ვასიკო ხაბულიანი და სხვები. ღამით, ოთხის ნახევარზე, შეიჭრნენ მინდორში, სადაც ამ ბავშვებს ეძინათ და მძინარე ბიჭები ჩახოცეს. ამაზე მეტყველებდა ის ფაქტიც, რომ ყოველ მათგანს ჭრილობა ჰქონდა მიყენებული უკანა მხრიდან. ზოგიერთს კი კეფა ჰქონდა გახვრეტილი. კეფაგახვრეტილი დათო ლაპიაშვილი ხელში ჩამაკვდა. ამ დროს დავით ჩხაიძე იყო გურიის ბატალიონის უფროსი და მას ეკისრება გარკვეული პასუხისმგებლობა ამ ფაქტთან დაკავშირებით. ამიტომ, მისი კანდიდატურის დასახელება გამგებლის პოსტზე შეურაცხმყოფელია “ქართული ოცნების” იდეალებისთვის. იმის გამო, რომ მე ვიყავი “ქართული ოცნების” მხარდამჭერი, მოვხვდი შმაგი ურატაძის ჩიპზე დასახელებულ ოჯახთა სიაში. ამას მოყვა ის, რომ ჩემი ძმა საშინლად აწამეს, ცემეს და კარცერში მოათავსეს იმის გამო, რომ მე ვიყავი “ოცნების” აქტივისტი. ამ ყველაფერს იმიტომ ვიხსენებ, რომ ამ კოშმარული დღეების გასვლის შემდეგ, მქონდა უკეთესის მოლოდინი. დავით ჩხიაძეს მუდამ თანამდებობა და გავლენები უნდა. გარდაცვლილი ბიჭების ჭირისუფლებიც შეიტანენ განცხადებას გამოძიების დაწყების მოთხოვნით. მე ყველაფერი _ ოჯახი, პატიმარი ძმა, სამსახური გადავდე გვერდზე და ვიდექი იქ, სადაც სიმართლე, პატიოსნება და ქვეყნის მომავალი იყო. ამ დროს ასეთი კანდიდატურის დასახელება, მინიმუმ, შემაშფოთებელია. მე ვფიქრობ, რომ მას ლობირებს და აქეზებს რომან ბიწაძე. ეს არის რომან ბიწაძის “შავი” ოცნება, რომელსაც ასრულება არ უწერია. თუკი ამას რეაგირება არ მოჰყვება, გამგეობის შენობის წინ შიმშილობას გამოვაცხადებ!” _ განაცხადა მაშინ ჩხაიძემ.
აი, რას ამბობს მის ბრალდებებზე “ქართული ოცნების” ლანჩხუთის ოფისის ერთ-ერთი ლიდერი, რომან ბიწაძე:
_ ბატონო რომან, მაია ჩხაიძემ დავით ჩხაიძის შესაძლო გამგებლობას თქვენი “შავი ოცნება” უწოდა…
_ არ მინდა მაგ ადამიანის განცხადებებსა და უსაფუძვლო ბრალდებებზე კომენტარები ვაკეთო.
_ თქვენ ხართ მისი ლობისტი?
_ არა! დავით ჩხაიძე არ არის ის ადამიანი, რომ ვინმეს პროექტი იყოს…
_ თქვენ მხარსაც არ უჭერთ?
_ კი, ბატონო, პიროვნულად მხარს ვუჭერ, ხოლო კოალიცია ვერანაირად დაუჭერს მხარს რომელიმე კანდიდატს, რადგან ეს იქნება საკრებულოზე ზეწოლა და ჩვენ ხელისუფლებაში იმისთვის არ მოვსულვართ, რომ იგივე გავიმეოროთ, რასაც აკეთებდა “ნაციონალური მოძრაობა”. ვინც არ უნდა მისცეს რეკომენდაცია თუ წარდგინება, ეს ჩაითვლება საკრებულოზე ზეწოლად, რადგან ამ ორგანოს გადასაწყვეტია გამგებლის შერჩევა.
_ ბატონო რომან, მაია ჩხაიძე ჯაპანის ტრაგედიას იხსენებს და დავით ჩხაიძეს, მინიმუმ, მორალურ პასუხისმგებლობას აკისრებს…
_ რაც შეეხება ჯაპანის ტრაგედიას, არავინ უარყოფს, რომ მაშინ იქ მოხდა სამწუხარო და ტრაგიკული ფაქტი. იმასაც გეტყვით, რომ იმ პერიოდში მე და დავით ჩხაიძე პოლიტიკურად სხვადასხვა მხარეს ვიდექით, თუმცა, ისიც ვიცი, რომ მას ზემოთ ხსენებული ტრაგედიის დროს არანაირი ხელმძღვანელობა არ ეკისრებოდა _ როგორც ვიცი, მისი მოვალეობა იყო ზვიად გამსახურდიას ხელისუფლების მიერ დაკავებული ქალაქებში წესრიგის დამყარება! როცა ლანჩხუთში მმართველად ბიძინა გუჯაბიძე დაინიშნა, დავით ჩხაიძე 5 დღის მანძილზე იყო ლანჩხუთში და იმ დღეებში წესრიგი დაცული იყო!
ერთსაც გეტყვით _ ის აქტიურად უჭერდა მხარს “ქართულ ოცნებას” და სრული უფლება აქვს, ჰქონდეს სურვილი გამგებლობისთვის იბრძოლოს. დარწმუნებული ვარ, მისი მხრიდან, სურვილის უკან დიდი პასუხისმგებლობა დგას!
ამ თემასთან დაკავშირებით საკმაოდ საინტერესო მოსაზრებას აფიქსირებს საქართველოს რესპუბლიკის უზენაესი საბჭოს (ზვიად გამსახურდიას ხელისუფლების) დეპუტატი გია ფირცხალაიშვილი. ლანჩხუთელი ოპოზიციონერი კოალიციის ლანჩხუთელ ლიდერებს, ფაქტობრივად “ნაციონალური მოძრაობის” “თამაშში” მონაწილეობაში ადანაშაულებს, ასევე საუბრობს ვანო მერაბიშვილთან გამართულ შეხვედრის შესახებ, რომელზეც მისი თქმით, ლანჩხუთის გამგებლის საკითხი გადაწყდა. გია ფირცხალაიშვილი აზრით, შეხვედრაზე, რომელსაც, ასევე, მისი თქმით, რევაზ ჩიტიძე და გიორგი გოგუაძე ესწრებოდნენ, მიღებული გადაწყვეტილება იმის მაუწყებელია, რომ “ნაცმოძრაობა” რევანშისთვის ემზადება: “სრული პასუხისმგებლობით შემიძლია განვაცხადო _ ე. წ. ნაცმოძრაობა ემზადება რევანშისათვის და ეს რევანში მაქსიმუმ ხუთ თვეში იგეგმება. ამ გეგმის ერთ-ერთი შემადგენელი ნაწილია 8 ნოემბერს ქ. თბილისში ივანე მერაბიშვილთან ჩატარებული თათბირი, რომელსაც ესწრებოდნენ ლანჩხუთიდან ე. წ. ნაცმოძრაობის ლანჩხუთის რაიონული ორგანიზაციის თავმჯდომარე გიორგი გოგუაძე და ლანჩხუთის მუნიციპალიტეტის საკრებულოს თავმჯდომარე რევაზ ჩიტიძე. ამ შეხვედრაზე გადაწყდა, რომ ლანჩხუთის მუნიციპალიტეტის საკრებულომ ყველა მიზეზის გარეშე მუნიციპალიტეტის გამგებლად უნდა “აირჩიოს” კახა ასკურავა, ანუ ე. წ. ნაცმოძრაობის კადრი. სხვათაშორის, ამ საკითხთან დაკავშირებით მერაბიშვილის პოზიციასთან სრულ შესაბამისობაში მოდის “ქართული ოცნება _ დემოკრატიული საქართველოს” რაიონული ორგანიზაციის საინიციატივო ჯგუფის ხელმძღვანელის ბატონ სოსო ბოლქვაძის, ჩემი მეგობრის, განცხადებაც. საერთოდ გაურკვეველია კოალიციაში შემავალი ერთ-ერთი პარტიის ლიდერის ბატონ ელგუჯა ჩხაიძის პოზიცია, რომელიც თვლის, რომ გამგებლობის პოსტის შესაძლო დაკავებასთან დაკავშირებით, უმჯობესია თავი შეიკავოს და მოვლენებში არ ჩაერიოს, ანუ მუნიციპალიტეტის გამგებლად დარჩეს ე. წ. ნაცმოძრაობის კადრი. ზოგადად მათი შეხედულებები იდენტურია, დაველოდოთ ცვლილებებს გუბერნატორების დანიშვნასთან დაკავშირებით, დაველოდოთ ცვლილებებს “ადგილობრივი თვითმმართველობის შესახებ” საქართველოს ორგანულ კანონში და ა. შ. ჩემს ეჭვებს ამყარებს, აგრეთვე, კახა კუკავას პარტიის ადგილობრივი წარმომადგენლის მაკა კვირკველიას განცხადებებიც. ვფიქრობ, რომ პოლიტიკური კოალიცია “ქართული ოცნების” ლანჩხუთის ოფისში თავი მოიყარეს გაურკვეველი პოლიტიკური წარსულის მქონე მცირე ჯგუფმა, მაგალითად ვ. ზენაიშვილი, რომლებმაც დაბნეულობა შეიტანეს კოალიციის საქმიანობაში, რომელიც შექმნის დღიდან პრაქტიკულად ერთ-ერთი სანიმუშო იყო ქვეყნის მასშტაბით. გამომდინარე აქედან, შესაძლებელია ვივარაუდოთ, რომ ზემოთ დასახელებული პიროვნებები ნებით, თუ უნებლიედ ხდებიან ე. წ. ნაცმოძრაობის მიზნების გახორციელების თანამონაწილეები, მოსახლეობა კი ცვლილებებს ელის,” _ ასეთია გია ფირცხალაიშვილის პოზიცია.
ჩვენ კომენტარისთვის “ქართული ოცნების” ლანჩხუთის ოფისის ხელმძღვანელ სოსო ბოლქვაძეს დავუკავშირდით:
_ ბატონო სოსო, გია ფირცხალაიშვილი, რომელიც აცხადებს, რომ მისი მეგობარი ხართ, გამგებლის საკითხთან დაკავშირებით ხელისუფლების სასარგებლო ქმედებაში გადანაშაულებთ. რა კომენტარს გააკეთებთ?
_ რა კომენტარი გავაკეთო _ მე ხომ არ ვიცი, ზუსტად რას ამბობს?
_ წაგიკითხავთ უშუალოდ თქვენზე რასაც ამბობს (ტექსტს ვუკითხავთ. ავტ.). იგივეს ამბობს ელგუჯა ჩხაიძის და მაკა კვირკველიას შესახებ. მხოლოდ რომან ბიწაძის მიმართ არ გამოთქვამს არანაირ პრეტენზიას.
_ (იცინის) ამბობს, რომანზე არ მაქვს პრეტენზიაო?
_ არა, არ ამბობს, მაგრამ ასე გამოდის. მისი აზრით, თქვენ კახა ასკურავას გამგებლობას უჭერთ მხარს, რითაც “ნაციონალებს” ხელს უწყობთ…
_ მე როდის ვთქვი, ასკურავას ვუჭერ მხარს,-მეთქი? ვინც უნდათ, ის ჰყავდეთ, მაგრამ როცა “ნაციონალები” მართავენ საკრებულოს, მათ მიერ დანიშნული ნებისმიერი გამგებელი იქნება “ნაციონალების”. დღევანდელი მოცემულობა სხვა შანსს არ იძლევა. რას ფიქრობთ, “ნაციონალების” მიერ არჩეული გამგებელი ვისი იქნება? სხვა კომენტარს ვერ გავაკეთებ.
ანალოგიურ პოზიციას აფიქსირებს ლანჩხუთის მაჟორიტარი დეპუტატი თემურ ჩხაიძე. მისი თქმით, ვინც ახლა მათი გვერდის ავლით გამგებლობას მოინდომებს, არის “ნაციონალების” მხარდამჭერი: “ვინც დასახელდა, მათგან არც ერთი არ არის ჩვენი კანდიდატი. გამგებელი ის გახდება, ვისაც ხალხი დაუჭერს მხარს. ამ ეტაპზე კი ჩვენ არ ვაპირებთ, “ნაციონალებმა” დაგვინიშნონ ჩვენს მიერ შერჩეული გამგებელი,” _ ამბობს მაჟორიტარი.
ჩვენთან საუბარში გამგებლის მოვალეობის შემსრულებელმა, კახა ასკურავამ განაცხადა, რომ გია ფირცხალაიშვილის დასახელებული ინფორმაცია, თითქოს მისი გამგებლობა ვანო მერაბიშვილთან შეხვედრაზე გადაწყდა, არის მტკნარი სიცრუე: “ამჟამად გამგებლის მოვალეობას ვასრულებ და სიმართლე გითხრათ, დიდი საჭიროება და საჩქაროდ გადასაწყვეტი სულაც არ არის, რომ გამგებლად დამნიშნონ. ასე რომ, აღნიშნული ინფორმაცია არის მცდარი,” _ გვითხრა კახა ასკურავამ.
