მოქალაქის წერილთან დაკავშირებით, ვერ მოვახერხეთ ბიუროს ხელმძღვანელის გოგი გეგიაძის კომენტარის ჩაწერა _ მასალის მომზადებისას, იგი სამსახურში არ იმყოფებოდა. მასთან დაკავშირება ვერც მის პირად მობილურ ტელეფონზე შევძელით.
მასალის გამოქვეყნების შემდეგ, დაგვიკავშირდა საქართველოს პარლამენტის წევრის თემურ ჩხაიძის ლანჩხუთის ბიუროს ხელმძღვანელი და გვთხოვა, საშუალება მიგვეცა გაზეთის ფურცლებიდან გაეცა პასუხი ტატიანა ოთხმეზურის ბრალდებებზე.
“ტატიანა ოთხმეზური ჩვენთან მოვიდა კონკრეტული თხოვნით. მას დედა ჰყავდა უმძიმეს მდგომარეობაში ბათუმის ერთ-ერთ საავადმყოფოში. იგი დეპუტატისგან ითხოვდა თანხას. მას შემდეგ, რაც ავუხსენით, რომ, ამ ეტაპზე, ჩვენ ვერ მოვახერხებდით ფულადი თანხით დახმარებას, მან მოგვთხოვა კოალიციის შტაბში აუღებელი ხელფასი. როგორ, რა საშუალებით მოვახერხებდით მისთვის ხელფასის მიცემას, როცა მაშინ ჯერ კიდევ არ იყო კოორდინატორების ხელფასები ჩამორიცხული და დეპუტატი ცდილობდა ამ პრობლემის მოგვარება თავის თავზე აეღო. მინდა გითხრათ, რომ არც მე ამიღია ჯერჯერობით ერთი თეთრი. მაშინ გადავწყვიტეთ, ამ საავადმყოფოში მომუშავე ნაცნობის საშუალებით, ცოტა ხნით მაინც შეგვეჩერებინა საავადმყოფოს ადმინისტრაცია და დახარჯული თანხის გადავადებაზე დაგვეთანხმებინა. პაციენტს ჰქონდა სახელმწიფო პოლისი. გაირკვა, რომ პოლისზე დარიცხული თანხიდან – 15 ათასი ლარიდან დახარჯული იყო მხოლოდ 8 ათასი. მას უპრობლემოდ შეეძლო დარჩენილი თანხის საჭიროებისამებრ გამოყენება. მითხარით, ამხელა თანხის პატრონს, ჩვენ რითი უნდა დავხმარებოდით?” _ ამბობს გოგი გეგიაძე.
ამ წერილის ავტორი, ჩვენთან საუბრისას, ხაზს უსვამდა იმ ფაქტს, რომ იგი ითხოვდა დეპუტატის ბიუროს წარმომადგენლებისგან წინასწარ მიეცათ მისთვის კუთვნილი ხელფასის ექვივალენტური თანხა, ხელფასის გაცემის შემდეგ კი, ეს ფული მისი ხელფასიდან გამოექვითათ. ოთხმეზური უმუშევარია, ოჯახი სოციალურად დაუცველია. “გარდა ოპერაციის ფულისა, ყველამ იცის რომ საავადმყოფოში დამატებითი თანხაა საჭირო. მე კი არც ერთი თეთრი არ გამაჩნდა. ამიტომ მივედი მათთან,” _ ამბობს ოთხმეზური.
ბატონი გოგი გეგიაძე კატეგორიულად არ ეთანხმება ოთხმეზურის წერილში გამოთქმულ მოსაზრებას, კოალიციის შტაბის ქონებასთან დაკავშირებით წარმოქმნილი დავის შესახებ. ტატიანა ოთხმეზური თავის ღია წერილში მიუთითებდა, რომ დეპუტატის ბიუროს თანამშრომლები იმ მომენტში, როცა იგი მათგან დახმარებას ითხოვდა, კოალიციის შტაბის ქონების შენახვასთან დაკავშირებით უკმაყოფილებას გამოთქვამდნენ.
გოგი გეგიაძეს ამ საკითხთან დაკავშირებითაც აქვს პასუხი. იგი განმარტავს, რომ ამ ქონებაზე თავადაა პასუხისმგებელი: “მას შემდეგ, რაც რომან ბიწაძე კოალიციიდან წავიდა, ეს კი აგვისტოში მოხდა, შედგა ახალი აქტი, რომლითაც შტაბის ქონებაზე პასუხისმგებლობა მე დამეკისრა. ქონება საიმედოდ უნდა შევინახოთ, მანამ ახალი საარჩევნო შტაბი არ შეიქმნება.”
კიდევ უფრო რომ გაემყარებინა საკუთარი არგუმენტები, გეგიაძემ ტელეფონით კოალიციის ოფისის მენეჯერი ლადო ნანაძე დაგვაკავშირა. ნანაძემ დაადასტურა, რომ რომან ბიწაძის წამოსვლის შემდეგ, შედგა მიღება-ჩაბარების ახალი აქტი, ხოლო მასზე ხელი გეგიაძემ მოაწერა.
გეგიაძე განმარტავს, რომ ამ ეტაპზე, ოფიციალურად არ არის დამტკიცებული ბიუროს ხელმძღვანელად და არც ხელფასს იღებს სამუშაოში, რომელსაც რეალურად ასრულებს.
