სახელმწიფო მინისტრმა ამ საკითხსა და ზოგადად 11-12 დეკემბერს ჟენევაში გამართულ მოლაპარაკებებზე მთავრობის სხდომის დასრულების შემდეგ ისაუბრა.
შვეიცარიაში გამართულ შეხვედრაში საქართველოს ახალი მთავრობა მონაწილეობას პირველად იღებდა. მოლაპარაკებების მეორე რაუნდი, სადაც ჰუმანიტარული საკითხები განიხილებოდა, აფხაზმა, ოსმა და რუსმა მონაწილეებმა დროზე ადრე დატოვეს. შესაბამისად, აფხაზებმა და ოსებმა ვერ მოისმინეს ის კონკრეტული წინადადებები, რომლებიც ჟენევაში მათთვის ქართული მხარეს უნდა გაეცნო. “გვსურს, რომ მკვდარი წერტილიდან დავძრათ ახალგორის რაიონის გაზმომარაგების საკითხი. ამას აუცილებლად გავაკეთებთ. გვინდოდა, მათთან გვემსჯელა, ტექნიკური თუ სხვადასხვა ფორმებით, როგორ შეიძლება ეს გაკეთდეს. შემდეგი ნაბიჯი კი იქნება მთელი შიდა ქართლის სარწყავი წყლით მომარაგების პრობლემის მოგვარება, მაგრამ სამწუხაროდ, აფხაზი და ოსი მონაწილეები ჟენევაში გარკვეული საშინაო დავალებით ჩამოვიდნენ. მათ არ გაითვალისწინეს, რომ ჯობდა, ახალ ხელისუფლებასთან უფრო მეტი კონსტრუქციული ნაბიჯები გადაედგათ,” – ამბობს პაატა ზაქარეიშვილი.
რეინტეგრაციის საკითხებში სახელმწიფო მინისტრი აცხადებს, რომ დემარშის მეთოდი საქართველოსთვის მიუღებელია. “ჩვენ არავის ვახვევთ თავს პოლიტიკას, არც დემარშებს ვაწყობთ, მაგრამ დემარშები სხვებისგანაც მიუღებელია, მითუმეტეს პირველ შეხვედრაზე. აშკარად გარკვეული ნერვიულობა ჩანდა. ძნელია ახსნა, თუ რატომ არ უნდა ადამიანს შენთან კონკრეტულ თემებზე საუბარი, როცა გაზის საკითხზე წლების განმავლობაში ლაპარაკობდნენ. აშკარად ვგრძნობ, რომ მათ ჯერ ახალ ხელისუფლებასთან ურთიერთობის სტრატეგია ჩამოყალიბებული არ აქვთ, რაც თავისთავად საინტერესო რეაქციაა. ამდენი ხანი, ისინი კომფორტულად გრძნობდნენ თავს, რადგან სააკაშვილი მათ არ ესაუბრებოდა. იცოდნენ, რომ დისტანცია იზრდებოდა, მაგრამ როცა ჩვენ დალაპარაკება გადავწყვიტეთ, უცებ თვითონ ჩაიკეტნენ და დისტანციის შენარჩუნება დაიწყეს. რა თქმა უნდა, ეს რთული და გრძელვადიანი საკითხია, მაგრამ მათი რეაქცია კარგი პასუხია იმაზე, რომ ძველ და ახალ მთავრობებს შორის განსხვავება დაინახეს. ეს გვაძლევს საშუალებას, ყველაფერი გავაანალიზოთ და ისეთი ნაბიჯები გადავდგათ, რომელიც ამ დისტანციას კიდევ უფრო შეამცირებს”, _ თქვა პაატა ზაქარეიშვილმა.
