ის თავს კარგად გრძნობს და მადლობას უთვლის შს თბილისის მთავარ სამმართველოსთან შეკრებილ მის მხარდამჭერებს.
“ნაციონალური მოძრაობის” ფეისბუქით დაანონსებული საპროტესტო აქციაზე 700-მდე ადამიანი მივიდა. დეპუტატებმა და ყოფილმა მაღალჩინოსნებმა, მათ შორის პარლამენტის ყოფილმა თავმჯდომარემ დავით ბაქრაძემ აქციის მონაწილეებს სიტყვით მიმართეს და დიქტატურის მოახლოება დააანონსეს.
“ეს არის ნამდვილი დიქტატურის დასაწყისი, მაგრამ მინდა კარგად დაიმახსოვროს ბიძინამ და პატარა ბიძინებმა, რომ არ გვეშინია,” _ განცხადა თენგიზ გუნავამ.
გოკა გაბაშვილის თქმით, ისინი გულხელდაკრეფილი ჯდომას არ აპირებენ და მზად არიან გამოიყენონ ყველა მეთოდი ბიძინა ივანიშვილის რეჟიმის წინააღმდეგ: “ეს იქნება საკრებულოები, მუნიციპალიტეტები, ქუჩა, მიტინგი _ ჩვენ ყველაფერს გამოვიყენებთ და ამას ბოლოს მოვუღებთ.”
პავლე კუბლაშვილის თქმით, “გუშინ ახალმა ხელისუფლებამ დაამტკიცა, რომ ყველაფერზე წამსვლელია”. მისი თქმით, გუშინ პრეზიდენტის ესკორტზე მომხდარი თავდასხმა გუბაზ სანიკიძის მიერ იყო ორგანიზებული. იუსტიციის ყოფილი მინისტრი გიორგი ვაშაძე კი ირწმუნება, რომ ფარულ აუდიო ჩანაწერში ნიკა გვარამია სულ სხვა თემაზე საუბრობს: “სატელეფონო საუბარში, რაც გამოაქვეყნეს ნიკა გვარამიასთან დაკავშირებით, ჯერ ერთი, ის ამბობს, რომ მას დასამალი არაფერი აქვს. მეორეც _ ეს საუბარი ეხებოდა სულ სხვა თემას _ კერძოდ, დაკავებულებისთვის უცხოელი ადვოკატების აყვანას და არა იმ თემას, რაზეც ახლა მიდის გამოძიება. აქედან გამომდნარე, გვარამია დააკავეს იმისათვის, რომ გააჩუმონ “რუსთავი 2”. ამათ “ნაციონალური მოძრაობის” განადგურება კი არა, ქართველი საზოგადოების განადგურება უნდათ,” _ ამბობს ვაშაძე “გურია ნიუსთან” საუბარში.
ვაშაძე ამბობს, რომ ნაციონალური მოძრაობა მუშაობის საგანგებო რეჟიმზე გადადის, რაც ქუჩებში მიტინგების და საპროტესტო გამოსვლების ორგანიზებასაც გულისხმობს. ის დარწმუნებულია, რომ ასობით და ათასობით ადამიანი შეემატება მათ საპროტესტო აქციებს: “ხალხის ძალა არის ყველაზე რეალური ძალა და ჩვენ მის გამოყენებას ვაპირებთ”.
ირმა ნადირაშვილის განხცადებით, ის, რაც ხდება, არის “ჯვაროსნული ბრძოლა დემოკრატიაზე, რათ მიწასთან გაასწორონ ყველაფერი, რაც არ არის მათი კონტროლის ქვეშ. ეს ეხება სასამართლოს, ეს ეხება “ნაციონალურ მოძრაობას” და ეს ეხება, პირველ რიგში, დამოუკიდებელ მედიას.”
“ნაციონალური მოძრაობის” მორიგი აქცია ხვალისთვის თბილისის საქალაქო სასამართლოსთან დაანონსდა, სადაც ნიკა გვარამიას და სხვა დაკავებულებს აღკვეთის ღონისძიებას შეუფარდებენ. აქციის ორგანიზატორებმა მომიტინგეებს მეტი მობილიზაციისაკენ მოუწოდეს და იმედი გამოთქვეს, რომ ხვალ ათჯერ მეტი მხარდამჭერს შეკრებენ.
