ვახტანგ მაისაია კარცერში 40 დღის განმავლობაში ჰყავდათ, ჯერ მოდულში, შემდეგ კი გლდანის 8 საპყრობილეში ცემით და წამებით აიძულებდნენ ჯაშუშობაში გენერალი ნაირაშვილი და სხვა მეტნაკლებად ცნობილი პირები ემხილებინდა. მას ასევე სთხოვდნენ მუხროვანის ამბოხი და 9 აპრილის მიტინგი რუსული სპეცსამსახურებისთვის დაებრალებინა. მოდულში ყოფნის დროს, მაისაისას რამდენიმე წუთის განმავლობაში ესაუბრა იმდროინდელი შინაგან საქმეთა მინისტრი ვანო მერაბიშვილი.
“ვახტანგს აქვს ნაშრომი, სადაც ის ვარაუდობს, რომ ვანო მერაბიშვილის ბელორუსიაში ვიზიტი საეჭვოდ დაემთხვა ამ ქვეყანაში გრუ-ს მაღალჩინოსნების ვიზიტს. ვახტანგი ასევე ვარაუდობდა, რომ მერაბიშვილს რუსეთთან ბიზნეს ინტერესები აკავშირებდა. მერაბიშვილის მხრიდან ვახტანგზე ფიზიკური ზეწოლა არ ყოფილა, უბრალოდ, აინტერესებდა ვინ მიაწოდა ინფორმაცია ბელორუსიაში მისი ყოფნის შესახებ,“ _ ამბობს ელენე მაღრაძე “გურია ნიუსთან“ საუბარში.
ვახტანგ მაისაიას საქმე დღემდე გრიფით საიდუმლოა, გათავისუფლების შემდეგ სამხედრო ექსპერტს უფლება აქვს პროკურატურას გრიფის მოხსნის მოთხოვნით მიმართოს და შემდეგ სრული რეაბილიტაციაც მოითხოვოს, ამ დროისთვის მაისაიას საქმე სტრასბურგის ადამიანის უფლებათა დაცვის სასამართლოშია გაზავნილი. ელენე მაღრაძე ამბობს, რომ, სავარაუდოდ, საქმეს სტრასბურგიდან არ წამოიღებენ.
“საბოლოოდ, ამ გადაწყვეტილებას ჩემი მეუღლე მიიღებს, მაგრამ მე ვფიქრობ, რომ ჩვენი საქმე სტრასბურგში უნდა დარჩეს. ეს იმას არ ნიშნავს, რომ არ ვენდობი ან წულუკიანს ან კბილაშვილს; პირიქით, მათ პროფესიონალიზმსა და პატიოსნებაში ეჭვი არ მეპარება, მაგრამ მინდა, რომ საერთაშორისო დონეზე დადასტურდეს ვახტანგის უდანაშაულობა“
ელენე მაღრაძე თვლის, რომ ამ საქმისთვის საიდუმლო გრიფის მოხსნა საერთაშორისო სკანდალს გამოიწვევს.
“ჩემს მეუღლეს ბრალი ედება არა რუსეთის ჯაშუშობაში, როგორც ეს ტელევიზიით ითქვა, არამედ ნატოს ერთ-ერთი წევრი ქვეყნის _ სლოვაკეთის ჯაშუშობაში. საქმეში ფიგურირებენ სლოვაკეთისა და უკრაინის მოქალაქეები, რომლებიც თითქოსდა თანამშრომლობდნენ რუსეთის სპეცსამსახურებთან.
ვახტანგ მაისაიას ცემისა და წამების ფაქტის გამოძების მოთხოვნით ოჯახმა 2009 წელს მიმართა სასჯელაღსრულების სამინისტროს, თუმცა გამოძიების ვერსიით, სამხედრო ექსპერტმა თვითდაზიანებები მიიყენა.
“ვახტანგი სასტიკად სცემეს, ადგილი ჰქონდა მისი დახვრეტის იმიტაციას, თავზე პოლიეთილენის პარკი ჩამოაცვეს და გუდავდნენ. ჯალათი ყაჭეიშვილი, ვინც ამ ყველაფერს ჩადიოდა, დღეს თავადაც პატიმარია. საქმეში იკვეთება კონტრდაზვერვის სამსახურის გამომძიებლების დანაშაული, რომლებმაც თავიდან ბოლომდე ყალბი საქმე შექმნეს,“ _ ამბობს მაისაიას მეუღლე “გურია ნიუსთან“ საუბარში.
გუშინ, ჟურნალისტებთან შეხვედრის დროს, საქართველოს პრეზიდენტი ვახტანგ მაისაიას პოლიტპატიმართა სიაში მოხვედრის ფაქტს შეეხო.
“მაისაია როდის იყო პოლიტიკოსი ან ვის გსმენიათ მის მიერ გაკეთებული პოლიტიკური განცხადება?!“ _ განაცხადა სააკაშვილმა.
სამხედრო ექსპერტი და ანალიტიკოსი ვახტანგ მაისაია 2009 წლის მაისში ჯაშუშობის ბრალდებით დააკავეს. დღეს ის პარლამენტმა პოლიტპატიმრად სცნო და ციხეს სავარაუდოდ, ახალ წლამდე დატოვებს.
