მათი რიცხვი განსაკუთრებით წინასაარჩევნოდ გაიზარდა.
როგორც ” გურია ნიუსს” საკრებულოს თანამშრომელმა განუცხადა, იმის გამო, რომ დასაქმებულთა რაოდენობა ეტაპობრივად იზრდებოდა, მათი სახელფასო ფონდი ოზურგეთის მუნიციპალიტეტის ბიუჯეტში წინასწარ გაწერილი არ იყო. აქედან გამომდინარე, პრობლემა შეექმნათ ააიპ-ის თანამშრომლებს, რომლებიც აცხადებენ, რომ ბიუჯეტს ძალიან გაუჭირდა და დეკემბრის თვეში არცერთ აიპი-ში ხელფასი არ დარიგდება. ამ ინფორმაციას რამდენიმე აიპი-ს ხელმძღვანელიც ადასტურებს.
” გურია ნიუსის” ინფორმაციით, წინასაარჩევნოდ დასაქმებული 240 ადამიანის სახელფასო ფონდმა 500 000 ლარი შეადგინა, რამაც ბიუჯეტი, ასე ვთქვათ, აზარალა.
რამდენად კანონიერად გახორციელდა ეს პროცესი და შესრულდა თუ არა წელს ოზურგეთის მუნიციპალიტეტის ბიუჯეტი, ამაზე საფინანსო-საბიუჯეტო სამსახურის უფროსის მოვალეობის შემსრულებელი ლია ქათამიძე ” გურია ნიუსთან” საუბრობს:
_ დღეს ბიუჯეტი 104 პროცენტით არის შესრულებული, კიდევ უფრო მეტს ველოდებით; 2012 წლის ბიუჯეტის საშემოსავლო ნაწილი დღეის მდგომარეობით შესრულებულია მაღალი პროცენტით, ყოველ დღე ველოდებით საგადასახადო შემოსავლებს, უფრო გაიზრდება. ეს რაც შეეხება საშემოსავლო ნაწილს. მეორე ის თემა, რაც, რაღაცნაირად გავრცელდა, რომ, ამ თვეში ხელფასებს ვერ დავარიგებთ, არ არის სწორი. არცერთი აიპი ხელფასების გარეშე არ დარჩება, დეკემბრისთვის ყველა დაფინანსებას მიიღებს. დაიწყება გაცემები 26 დეკემბრიდან 31-ის ჩათვლით. საბიუჯეტო წელი მთავრდება 31 ში და ამ დღესაც გვექნება გადარიცხვები.
_ ანუ, თქვენ აცხადებთ რომ ხელფასები დარიგდება?
_ სრული პასუხისმგებლობით გეუბნებით, რომ ყველა აიპის თანამშრომელი მიიღებს ხელფასს. საბიუჯეტო განაცხადის საფუძველზე მოხდება ეს პროცედურა, ხელმძღვანელები წარმოადგენენ თავიან ხარჯებს და მიიღებენ ხელფასებს.
_ ქალბატონო ლია, 2012 წლის დასაწყისში დაიწყეს მოქალაქეების დასაქმება, რაც უმეტესად აიპ-ებში გახორციელდა და დასაქმებულთა რიცხვმა 240 შეადგინა…
_დიახ.
_ როგორც ვიცით, დასაქმებულთა ხელფასები თავიდან ბიუჯეტში გაწერილი არ იყო, ცვლილება არ შეუტანიათ; აქედან გამომდინარე, შეექმნათ პრობლემა ნოემბრისა და დეკემბრის თვეში…
_ მივხვდი, რასაც გულისხმობთ, მაგრამ ბიუჯეტში ყველა ცვლილების დროს, საკრებულოში შეგვქონდა ბიუჯეტის პროექტი და პერიოდულად ვამატებდით ამ თანხებს. თქვენ ესწრებოდით საკრებულოს სხდომებს, ჩვენ შეგვქონდა საბიუჯეტო ცვლილებები და აიპ-ს შესაბამისად ემატებოდათ თანხები, რომლითაც მოხდა ფინანსური უზრუნველყოფა; მათ შეძლეს ამ ხელფასების დარიგება. ასევე მოხდება ახლა 26 -შიც; შესაბამისად, შეევსებათ თანხები…
_ რამდენად კანონიერია ეს პროცესები?
_ალბათ, საბიუჯეტო პროცესთან მიმართებას გულისხმობთ. თითოეულმა აიპ-იმ თავის ბიუჯეტში გააკეთა კორექტირება და შტატებთან შესაბამისად, ფინანსური უზრუნველყოფაც მოახდინა. ამიტომ, თუ მათ ნოემბერში და დეკემბერში ფინანსური პრობლემები ჰქონდათ, უკვე მუნიციპალიტეტის ბიუჯეტიდან მიიღეს დაფინანსება და მიიღებენ კიდევ, რამაც უზრუნველყო მთელი ამ პრობლემის გადაწყვეტა. ბიუჯეტი ეტაპობრივად იზრდებოდა მთელი წლის მანძილზე. დღეს შემოსულია 3 მილიონ 133 ათასი ლარი, თუმცა გეგმა გვქონდა 2 მილიონ 3 ათას 500. ეს თანხები არა მარტო აიპი-ის ხელფასებს, ასევე სოციალურ დახმარებებში წავიდა. შემოსავლების ზრდის შესაბამისად ხდება აიპ-ების დაფინანსება. მე ყოველდღე ველოდები თანხებს; გვაქვს ინფორმაცია, რომ გადამხდელები შემოიტანენ თანხებს. ასე რომ, არანაირი პრობლემა არ არსებობს, თუ ვინმე დასაქმდა, პირიქით _ კარგია. საიდან გავრცელდა ეს ინფორმაცია, რომ ხელფასებს აიპ-ები ვერ დაარიგებენო, არ ვიცი. თქვენ საიდან გაქვთ ეს ინფორმაცია?
_ ჩვენ გვაქვს ეს ინფორმაცია აიპ-ების თანამშრომლებისგან, სხვათაშორის, ხელმძღვანელებისგანაც კი.
_ მართლა? ხელმძღვანელებისგანაც?
_ რა თქმა უნდა.
_ სტატიას როცა მოამზადებთ, იქნება იმ თანამშრომლების და ხელმძღვანელის სახელი და გვარები, ვინც გეუბნებათ, რომ ხელფასებს ვერ გვირიგებენო? ისინი აფიქსირებენ ღიად თავიანთ სახლს და გვარს?
_ ცხადია, წყაროს არ დავასახელებთ, ვინც ეს ინფორმაცია მოგვაწოდა.
_ის ზუსტი ციფრიც, რომელსაც ასახელებთ 240 ადამიანი დასაქმდაო, საიდან იცით?
_ წყაროს ვერც ამ შემთხვევაში დავასახელებთ, მაგრამ გვაქვს წინასაარჩევნოდ დასაქმებულთა ზუსტი სია, რომელთა სახელფასო ანაზღაურებამ ნახევარი მილიონი ლარი გადასახადების გადამხდელთა ხარჯზე შეადგინა, და ეს ხარჯი წინასწარ არ იყო გათვლილი ბიუჯეტში.
_ რა საინტერესოა! თუმცა, ეს ასეა. მაგრამ საბიუჯეტო პროცესი ამით არ დარღვეულა. თვითონ აიპ-ში მოხდა ამის რეგულირება: მიიღო თანამშრომელი, ბრძანება გააკეთა, ფინანსური უზრუნველყოფა გაკეთდა შიგნითა მუხლობრივი ცვლილებების შედეგად და თუ მას პრობლემა ნოემბერ-დეკემბერში შეექმნა, უკვე ჩვენგან მოხდა თანხების შევსება. იმიტომ, რომ ბიუჯეტი გაიზარდა, დაგეგმილი 2 მილიონი დღეს 3 მილიონზე მეტი გვაქვს.
_ როგორ მოხდა ასე უცებ ბიუჯეტის შევსება და გადაჭარბება?
_ ეს არის სუფთა საგადასახადოს საქმე. ვერც საფინანსო სამსახური და მუნიციპალიტეტი მეწარმეების საქმიანობაში ვერ ჩაიხედავს, მას არ აქვს ამის უფლება. ჩვენ გვაქვს უბრალოდ სტატისტიკა, მეწარმემ 4 წლის მანძილზე რა გადაიხადა. თუმცა, როგორ იხდის მეწარმე გადასახადს, ამაზე ვერ გაგცემთ პასუხს. რატომ გადაიხადა მეწარმემ შარშან ნაკლები და წელს უფრო მეტი, ამის დეტალებზე პასუხს ვერ გაგცემთ, არ ვარ კომპეტენტური.
ეს მობილიზებული თანხები კი გადანაწილდება სოციალურ პროგრამებზე, საახალწლო და სხვა ღონისძიებებზე.
