ვირჯინიის ჯორჯ მეისონის სახელმწიფო მართვისა და პოლიტიკურ მეცნიერებათა უნივერსიტეტის პროფესორი მარკ კატცი ამტკიცებს, რომ “ნებისმიერი ქვეყნის ლიდერის მძიმე მდგომარეობიდან წამიერად გამოყვანაში რუსეთს დიდი გამოცდილება აქვს.” მაგალითად, 2005 წელს ყირგიზეთში მომხდარი “ტიტების რევოლუციის” შემდეგ ყოფილი ლიდერი, ასკარ აკაევი სწორედ ბარვიხაში დაფუძნდა.
როგორც გაზეთი ამტკიცებს, მისი ტელეფონის ნომრის გაგება ვერ მოხერხდა, მაგრამ Bentley -ის ადგილობრივი სალონის გამყიდველი ანნა შკოდა ამბობს, რომ ქალაქში ხშირად ხედავს ყირგიზეთის ყოფილი ლიდერის შვილს – აიდარს. ასკარ აკაევის მემკვიდრე – კურმანბეკ ბაკიევი, რომელიც წინამორბედივით ჩამოაგდეს, ბელორუსიაში გაიქცა.
_ როგორც ჩანს, იმისათვის, ორი ლიდერის მოსკოვში შეხვედრისას უხერხული მდგომარეობა რომ არ შეიქმნას, – ირონიით აღნიშნავს გამოცემა.
სერბიის ყოფილი ლიდერის, სლობოდან მილოშევიჩის ოჯახი: მისი ქვრივი მირა მარკოვიჩი და ძმა – ბორისლავ მილოშევიჩი პოლიტიკური დევნილების სტატუს ატარებენ. ისინიც ბარვიხში, სხვადასხვა სახლებში ცხოვრობენ. ბორისლავის თქმით, თავს კარგად გრძნობენ და მათი “ცხოვრებაც ჩვეულებრივად მიედინება.”
თავის დროზე, მოგვითხრობს The New York Times, რუსეთის ყოფილმა მერმა იური ლუჟკოვმა “მეგობრული ნება გამოხატა” და საკუთარი პირადი თვითმფრინავი ასლან აბაშიძეს იმ დროს გაუგზავნა, როცა ქართული ჯარები ბათუმს უახლოვდებოდნენ. ახლა კი როგორც იტყობინებიან, ასლან აბაშიძეც სწორედ ბარვიხაში ცხოვრობს.
თუმცა, როგორც სტატიაშია აღნიშნული, მოსკოვი არ არის მზად ყველა შეიფაროს. მაგალითად, როცა ერიკ ჰონეკერმა აღმოსავლეთ გერმანიაში ხელისუფლება დაკარგა მეუღლესთან ერთად საბჭოთა კავშირში გადმობარგდა, თუმცა, რაღაც პერიოდის შემდეგ, ბორის ელცინმა მისი უკან ექსტრადირება მოახდინა. ქურთისტანის მუშათა პარტიის ლიდერს აბდულა ოჯალანსაც იგივე ბედი ეწია. 1998 წელს ის სირიიდან მოსკოვში ჩაფრინდა, მაგრამ არ მიიღეს და აფრიკაში გაამგზავრეს, სადაც თურქებმა დააპატიმრეს.
The New York Times-ის აზრით, მოსკოვი სულ უფრო და უფრო იხრება იმ აზრისაკენ, რომ სირიის საკითხის მოსაგვარებლად ბაშადს ქვეყნიდან წასვლის ნებას დართავენ და ბარვიხში დაფუძნდება. აქ, აცხადებს გამოცემა, სიწყნარე და სიმშვიდეა, სირიის ლიდერის ცოლისთვის კი, რომელიც მოდის ცნობილი მოტრფიალეა, საკმაოდ საინტერესო იქნება, რადგანაც ეს ადგილი ლუქსის კლასის ძვირიანი მაღაზიებითაა ცნობილი.
გაზეთის აზრით, ასადს ცოტა დრო აქვს, რადგანაც “მოსკოვი არ აპირებს ფოსტალიონობას” და ლავროვის სიტყვებით, თუკი ასადს ვინმე გარანტიებს შესთავაზებს, მაშინ რუსეთის მონაწილეობის გარეშე მოუწევს ამის გაკეთება.
