თათბირი კი, არც მეტი და არც ნაკლები, საკრებულოს სოციალური კომისიის თავმჯდომარემ, ზაურ ოსეფაიშვილმა ჩაატარა. 
სოციალური საკითხები, როგორც ჩანს, ჩოხატაურში კარგადაა მოგვარებული, რადგან, როგორც შეხვედრაზე მყოფებმა გვითხრეს, საუბრის თემა ოსეფაიშვილის უფლებამოსილებას აშკარად სცილდება:
_ ბატონმა ზაურმა გვითხრა, რომ ერთ-ერთი გაზეთი უნდა გამოვიწეროთ, _ აღნიშნა ერთ-ერთმა დირექტორმა, რომლის ვინაობას შეგნებულად არ ვასახელებთ. მეორე რესპონდენტის თქმით, ოსეფაიშვილმა გუბერნატორის “ავტორიტეტიც” მოიშველია: _ გვითხრა, რომ ამის შესახებ საქმის კურსშია გუბერნატორიც, _ ამბობს წყარო და ამატებს, რომ სოციალურად დაუცველ ბავშვებს ოსეფაიშვილი გაზეთის უფასოდ გადაცემას დაჰპირდა.
გუბერნატორის და კომისიის თავმჯდომარის ინტერესებზე პიარის თვალსაზრისით, თანაც სახელმწიფო რესურსების გამოყენებით, კარგა ხანია საზოგადოებაში ბევრს საუბრობენ. რამდენიმე უაღრესად ავტორიტეტული საერთაშორისო ორგანიზაციის წლიურ ანგარიშში მოხვდა ჩანაწერები, რომლითაც დასტურდებოდა ოსეფაიშვილის მცდელობა დისტრიბუტორების დაშინებითა და მოსყიდვით ხელი შეეშალათ “გურია ნიუსის” გავრცელებისთვის სხვა გამოცემის სასარგებლოდ. ამ მცდელობის მარცხის შემდეგ, როგორც ჩანს, გამოცდილი მეთოდის მოსინჯვა ხდება _ სამწუხაროდ, ხელისუფლება თვლის, რომ სკოლების დირექტორები, მასწავლებლები, ბავშვები და მათი მშობლები ყველაზე მრავალრიცხოვანი სოციუმია, რომელიც მხოლოდ იმისთვის არსებობს, რომ ხელისუფლებიდან წამოსული ყოველგვარი დირექტივა უსიტყვოდ შეასრულოს! “მასწავლებელი წინამძღვრობს ერს!” _ ასე შეაფასა პოეტმა იმ ადამიანის ფუნქცია, რომელსაც საქართველოში “მოძღვარს” ეძახდნენ. როცა მოძღვართმოძღვარი იაკობ გოგებაშვილი კუბოში ჩაასვენეს, აღმოჩნდა, რომ რიგიანი ფეხსაცმელი არ ჰქონდა და ძირგახვრეტილი ფეხსამოსის სუდარით დამალვა გახდა საჭირო, მაგრამ მის სახელს, ცხოვრებას, კვალს ასხივოსნებს ღირების შარავანდედი… დღეს კი, დაბალხელფასიან, გაცვეთილფეხსაცმლიან, საარჩევნო კომისიებში “ჩასასმელ” მასწავლებლებს ღირსების აყრაც აშკარად ემუქრებათ!
ამგვარი დირექტივების გაცემა მხოლოდ ჩოხატაურში არ ხდება _ ოზურგეთში რამდენიმე სამსახურს არათუ “გურია ნიუსის” გამოწერა, მისთვის ინფორმაციის მიწოდებაც აუკრძალეს, მიუხედავად იმისა, რომ ეს კანონდარღვევა და დანაშაულია. რესპონდენტები კონკრეტულ სახელებსა და გვარებს, სამსახურებს ასახელებენ. ცენტრალურ ხელისუფლებაზე სრულად დამოკიდებული ადგილობრივი ხელისუფლების ამგვარი ქმედება ცხადს ხდის, რომ ქვეყნის პირველი პირების მიერ დეკლარირებული მედიაგარემოს გაუმჯობესების ახალი კამპანია მხოლოდ ფარსია და საერთაშორისო ორგანიზაციების თვალის ასახვევადაა განკუთვნილი.
ცხადია, ვეცადეთ უშუალოდ გუბერნატორის პოზიციაც გაგვეგო ამ საკითხთან მიმართებაში, თუმცა ჩიტაიშვილმა სატელეფონო ზარებს არ უპასუხა. მხარის პირველმა პირმა ჩვენთან საუბარი არც სმს-შეტყობინების შემდეგ ისურვა. იმ ფონზე, როცა გუბერნატორი არცთუ უნაკლო წარსულის მქონე ადამიანს მოადგილედ ინიშნავს, როცა მისი დანიშნული კადრი ძებნილი ხდება და მისი გუბერნატორობის დროს რამდენიმე რეზონანსული, კორუფციული დანაშაული ხმაურდება, როგორც ჩანს, მწარე სიმართლესა და ჩვენს ზარებს გაურბის.
შეხვედრა ვერც ოსეფაიშვილთან მოვახერხეთ _ ჩვენს ზარს არც მან უპასუხა, ხოლო კაბინეტში რამდენჯერმე მისულებს ადგილზე არ დაგვხვდა; ჩნდება საფუძვლიანი ვარაუდი, რომ უმნიშვნელოვანესი ფუნქციის მქონე _ სოციალური საკითხების გადაწყვეტაზე მომუშავე კომისიის თავმჯდომარე, გაზეთის დასარიგებლად ან სარეკლამო აგენტის მოვალეობის შესასრულებლად იყო გაბრძანებული.
ჩოხატაურის საგანმანათლებლო რესურსცენტრის ხელმძღვანელი, ხათუნა წილოსანი ოსეფაიშვილის დირექტორებთან შეხვედრას ადასტურებს. მისი საუბრის ჩანაწერიდან ისიც დასტურდება, რომ კონკრეტულ გაზეთზე და მის საქმიანობასთან დაკავშირებულ დეტალებზეც იყო საუბარი:
_ მე პირადად ვისმენდი საუბარს. ზაურ ოსეფაიშვილმა აღნიშნა, რომ სოციალურად დაუცველი მოსწავლეებისთვის გაზეთი უფასო იქნებოდა და მათ ნაწერებსაც უსასყიდლოდ დაეთმობოდა ფართი, _ აღნიშნა წილოსანმა და იმ დირექტორების ვინაობის გამხელა მოგვთხოვა(?!), ვინც ჩვენთან საუბრისას დაადასტურეს, რომ მათ გაზეთის გამოწერა დაავალდებულეს. ქალბატონ ხათუნას შევახსენებთ, რომ საქართველოში დღეს რეალური საშიშროება არსებობს უსაფუძვლოდ დასჯის, სამსახურიდან გათავისუფლების, ანგარიშის უკანონო მეთოდებით გასწორების. გარდა იმისა, რომ ჩვენ ბოლომდე დავიცავთ ადამიანებს, რომლებსაც ღირსება, სამართლიანობის გრძნობა შემორჩათ, საქართველოს კანონმდებლობა გვავალდებულებს არ გავთქვათ წყაროს ვინაობა. აქვე ვადასტურებთ, რომ ყველა ჩანაწერს, მოპოვებულ დოკუმენტს მივაწვდით საერთაშორისო ორგანიზაციებს, საქართველოში აკრედიტებულ საელჩოებს (განსაკუთრებით, ისრაელის საელჩოს, რომლის მფარველობითაც ხშირად მანიპულირებს ოსეფაიშვილი). თავის მხრივ, ამ ორგანიზაციებს ფაქტის დამოუკიდებლად გადამოწმების მრავალი მეთოდი აქვთ და უსაფუძვლო დასკვნებს არ აკეთებენ.
_ რომელი დირექტორი გინახავთ, მე რომ საყვედური მეთქვას?! ვისაც რაც უნდა, იმას ამბობს. შეხვედრაზე შემოვიდა ზაური და თქვა, რომ გაზეთში იქნება ჩანართი, ოღონდ მჭირდება სოციალურად დაუცველი ბავშვების სია, რომლებიც მიიღებენ ამ გაზეთს უფასოდო. დაძალება არ ყოფილა, _ აღნიშნა წილოსანმა და ისიც გვითხრა, რომ თათბირზე გუბერნატორის სახელი არავის უხსენებია.
ამ შეხვედრას გამოხმაურება უკვე სკოლებშიც მოჰყვა. როგორც პედაგოგები ჩვენთან პირად საუბრებში ამბობენ, ზემდგომისგან დავალებით წამოსულმა სკოლის რამდენიმე ხელმძღვანელმა, სკოლებში თათბირები გამართეს და პედაგოგებს გაზეთის გამოწერა დაავალა.
მედიაექსპერტი ზვიად ქორიძე: _ აშკარაა, ასეთი ქმედებით საჯარო მოხელე უპირისპირდება იმ მედიასაშუალებას, რომელიც, დამოუკიდებელია ხელისუფლებისგან. ძალიან ცუდია, როდესაც სარედაქციო პოლიტიკას ვიღაც ჩინოსანი ან საჯარო მოხელე განკარგავს. მივიჩნევ, რომ კომისიის თავმჯდომარის მიერ თათბირზე გაკეთებული განცხადებები და კონკრეტული გაზეთის გამოწერის ან გავრცელების მითითება არაეთიკურიცაა და უკანონოც.
აღსანიშნავია ისიც, რომ მსგავსი დავალდებულებები სკოლებში უცხო ხილი არ გახლავთ. როგორც მოსწავლეთა მშობლებმა გვითხრეს, ჟურნალ “ბატიბუტას”, რომელიც საბავშვო ბაღის და უმცროსი კლასის ასაკობრივი ჯგუფისთვის არის განკუთვნილი, ყოველთვიურად აწერინებენ 5-ე, 6-ე კლასელ მოსწავლეებს და 3 ლარს ახდევინებენ.
წილოსანი უარყოფს, რომ სკოლებში რაიმეს დავალდებულება ხდება. თუმცა, პედაგოგები და სკოლის დირექტორები სახელისუფლებო გამოცემების გამოწერის ან გავრცელების დაძალებასთან ერთად, იმაზეც საუბრობენ, რომ 3-3 კილოგრამი ჰიბრიდული სიმინდის თესლის ყიდვაც გარანტირებული აქვთ, რადგან ასეთია, სამწუხაროდ, მორჩილ უმრავლესობად გადაქცეული, არადა, ყველაზე საპატიო და ღირსეული პროფესიის მქონე პედაგოგების სამსახურში დარჩენისთვის გასაღები ხარკი!
