მაშინდელი პრემიერ მინისტრის, ნიკა გილაურის განმარტებით, კომპანიას საქართველოს 27 რაიონში, “100 ახალი საავადმყოფოს” პროექტის ფარგლებში, ახალი საავადმყოფოები უნდა აეშენებინა.
“ეს არის ახალი ხელშეკრულება, რომლის მიხედვითაც კომპანიას უძრავი ქონება მხოლოდ აუდიტორულად დამოწმებული წინასწარ განსაზღვრული ინვესტიციის გახორციელების შემდეგ გადაეცემა”, _ განაცხადა მაშინ ნიკა გილაურმა.
თუმცა, ეს განცხადება განცხადებად დარჩა. “აიჰოპმა” აღებული ვალდებულებები ვერ შეასრულა და 2010 წლის ივლისში, კომპანია “100 ახალი საავადმყოფოს” პროექტს, საქართველოს მთავრობის გადაწყვეტილებით, ჩამოაშორეს. ამის შესახებ, იმდროინდელმა შრომის, ჯანმრთელობისა და სოციალური დაცვის მინისტრმა ალექსანდრე კვიტაშვილმა პარლამენტის ჯანმრთელობის დაცვისა და სოციალურ საკითხთა კომიტეტის სხდომაზე განაცხადა:
_ “აიჰოპს” სახელმწიფოს წინაშე ნაკისრი ყველა ვალდებულება გაუუქმდა. თუმცა, თუ კომპანია დაფინანსების წყაროს მოიძიებს და პროექტის გახორციელებაში მონაწილეობის სურვილს გამოთქვამს, მთავრობა მასთან თანამშრომლობისთვის მზად იქნება, _ აღნიშნა კვიტაშვილმა.
სწორედ ამ განცხადების შემდეგ გახდა ცნობილი, რომ მთავრობას “100 ახალი საავადმყოფოს” პროექტი ჩაუვარდა და საზოგადოებას ჯანდაცვის სისტემის დასარეგულირებლად ახალი პროექტი შესთავაზეს. გამოაცხადეს ტენდერი, რომლის თანახმად, გამარჯვებულ სადაზღვევო კომპანიებს ახალი ობიექტების მშენებლობა დაევალათ. ტენდერში გამარჯვებული ფირმებიდან, ერთ-ერთი იყო შპს “ადითი”, რომელიც, როგორც გავარკვიეთ, მთავრობის მიერ გაკრიტიკებული “აიჰოპის” შვილობილი კომპანიაა. “ადითმა” მოახერხა და საავადმყოფოები საქართველოს 9 ქალაქში შეიძინა _ მათ შორის, ჩოხატაურსა და ლანჩხუთში. უცნობია, რა გადაიხადა ებრაულმა კომპანიამ საავადმყოფოებში და რა ვალდებულებები აქვს აღებული მას სახელმწიფოს წინაშე. მიუხედავად მრავალგზის მცდელობისა, “ადითთან” დადებულმა ხელშეკრულებამ მზის სინათლე ამ დრომდე ვერ იხილა.
“ადითმა” საავადმყოფოებში შესვლისთანავე მედპერსონალს ხელფასები გაუნახევრა; ბოლოს კი კადრებიც მინიმუმამდე დაიყვანა. გამონაკლისი არც ჩოხატაური აღმოჩნდა. 2011 წლის 31 დეკემბერს, შპს “ადითმა” ჩოხატაურის საავადმყოფოდან 25 თანამშრომელი გაუშვა, დარჩენილებს კი ხელშეკრულებები შეუცვალა.
ეს ის პერიოდია, როცა იმდროინდელი ჯანდაცვის მინისტრი, ალექსანდრე კვიტაშვილი ამტკიცებდა, რომ 2011 წლის 31 დეკემბრიდან “ვერც ერთი საავადმყოფო, რომელიც სახელმწიფოს მიერ დადგენილ მინიმალურ სტანდარტებს ვერ დააკმაყოფილებს, ვერ მოემსახურება სახელმწიფოს მიერ დაზღვეულ პაციენტებს”.
მაგრამ როგორც გაირკვა, ეს არ შეეხო ჩოხატაურს, სადაც საავადმყოფოს მფლობელ კომპანიას ინფრასტრუქტურის განახლებაზე საერთოდ არ უზრუნია. ამას მედპერსონალის უხელფასობაც დაერთო, რის გამოც, ბოლო ორი წელია, თითქმის ყოველ მესამე თვეს, ჩოხატაურის საავადმყოფოს თანამშრომლები იფიცებიან.
გასული წლის დასაწყისში, “გურია ნიუსთან” საუბრისას, იმდროინდელი ჯანდაცვის მინისტრი, ანდრია ურუშაძე, რომელიც ჩოხატაურის საავადმყოფოს, გვიან ღამით ეწვია, ამბობდა, რომ 2012 წლის იანვრის ბოლოს, საავადმყოფოს ყველა პრობლემა მოუგვარდებოდა:
_ “ადითი” კერძო კომპანიაა და ჩვენ მათ საქმიანობაში ჩარევის უფლება არ გვაქვს. თუმცა, არ უარვყოფ, რომ ჩოხატაურის საავადმყოფოში პრობლემებია; ვფლობთ ყველა ინფორმაციას და იანვრის ბოლომდე ეს საკითხი მოგვარდება, _ ამბობდა მაშინ ურუშაძე.
ამ განცხადებას რეაგირება არ მოყოლია, ისევე როგორც გასული წლის მაისში, მინისტრის ზურაბ ჭიაბერაშვილის დაპირებას, რომელიც ჩოხატაურის საავადმყოფოში სუნმაც კი შეაწუხა:
_ სახელმწიფოს ინტერესი, ჩვენი, ყველასი ინტერესია, რომ ახალი კლინიკები იყოს. სამწუხაროდ, ამ კონკრეტულმა ინვესტორმა რამდენიმე რაიონი ჩაგვიგდო. გურიაში, ლანჩხუთი და ჩოხატაურია მათ შორის. მე ლანჩხუთშიც ვიყავი. იქაც ველაპარაკე მედპერსონალს. სამწუხაროდ, ინვესტორს ვალდებულება აქვს, რომ 2013 წლის პირველ აპრილამდე გააკეთოს რაღაც, მაგრამ ეჭვი მეპარება, ამ დარჩენილ დროში მათ რამე გააკეთონ. ამიტომაც, რვა რაიონს, სადაც “ადითია”, მათ შორის ლანჩხუთსა და ჩოხატაურს, არ დავტოვებთ უყურადღებოდ, _ აღნიშნა ჩვენთან საუბრისას ჭიაბერაშვილმა და დასძინა, რომ “ადითის” თანამშრომლების ხელფასების პრობლემებზეც გამგებლებსაც და სამინისტროსაც ყოველთვიურად უწევთ საუბარი:
“ყველა იმ ინვესტორის მიერ, რომლებიც გვყავს, მთელ საქართველოში იხსნება ახალი კლინიკები, ყველგან გადავდივართ სრულიად ახალ დონეზე. თუმცა, როგორც აღვნიშნე, არის რამდენიმე რაიონი, სადაც გვიღალატა ინვესტორმა და ვართ ამ მდგომარეობაში. ჩვენი ამოცანაა, რომ ამ რაიონებში დავიწყოთ ახალი კლინიკების მშენებლობა და მივიდეთ იქამდე, რომ ექიმებს ნორმალური სამუშაო პირობები ჰქონდეთ, ამ პერიოდში არ იყოს სახელფასო დავალიანებები”, _ განაცხადა იმდროინდელმა მინისტრმა.
მართალია, ხელისუფლება შეიცვალა, თუმცა ჩოხატაურის საავადმყოფოში არაფერი შეცვლილა. უფრო მეტიც, ბოლო 2 თვის განმავლობაში ჩოხატაურის საავადმყოფოს მედპერსონალი, ხელფასების დარიგების მოთხოვნით რამდენჯერმე გაიფიცა. სწორედ გაფიცვის გამო ჩამოვიდა ჩოხატაურში ჯანდაცვის სამინისტროს საგანგებო სიტუაციის კოორდინაციისა და რეჟიმის სამსახურის უფროსი, ზურაბ უტიაშვილი:
_ ჩემთვის ყველაფერი ცნობილია, თქვენი პრობლემის შესახებ საავადმყოფოს დირექტორი თემურ კოროშინაძე გვატყობინებს. გაფიცვით საქმე არ მოგვარდება. ჩვენ კანონის ფარგლებში უნდა ვიმოქმედოთ, რისთვისაც ცოტა დაცდა მოგვიწევს. იანვრიდან თითოეული თქვენგანი იგრძნობს ცვლილებებს და ეს ცვლილება სასიკეთო იქნება, როგორც მედპერსონალისთვის, ასევე პაციენტებისთვის. მე გპირდებით, რომ ოქტომბრის ანაზღაურებას რამდენიმე დღეში მიიღებთ. მოვითხოვოთ ხელშეკრულებით გათვალისწინებული პირობების შესრულება; თუ არა, ვიმოქმედოთ კანონით და მივმართოთ სასამართლოს, _ თქვა ჩოხატაურში ჩამოსულმა უტიაშვილმა.
უტიაშვილის სტუმრობის შემდეგ, დაიმედებულმა პერსონალმა გაფიცვა შეწყვიტა, თუმცა, 31 დეკემბრიდან საავადმყოფო ისევ გაფიცვის რეჟიმზე გადავიდა.
“ჩვენი ორგანიზაციის თანამშრომლების ხელფასი რეგულარულად რიგდება დაგვიანებით, მუდმივი მოთხოვნისა და საგაფიცვო რეჟიმის დაფიქსირების შემდეგ. აღნიშნული პრობლემის გამო, ხშირად მივმართეთ სხვადასხვა ზემდგომ სამთავრობო ორგანიზაციებს. მიუხედავად ამისა, მდგომარეობა არ შეიცვალა. ბოლო საპროტესტო აქცია 2 თვის ხელფასის და ამასთანავე “სამარცხვინო” კონტრაქტის შეცვლის მოთხოვნით გავმართეთ 8 დეკემბერს. ჯანდაცვის სამინისტროს საგანგებო სიტუაციების დეპარტამენტის უფროსის ბატონი ზ. უტიაშვილის ჩვენთან ვიზიტის და საიმედო დაპირებების შემდეგ, აქცია შევწყვიტეთ. თუმცა, დაპირებები არ შესრულებულა. წინასაახალწლოდ, სავარაუდოდ, არ დაირიცხება და არ აგვინაზღაურდება ოქტომბრის თვის სახელფასო დავალიანება. ამიტომ, გაცნობებთ წინასწარ, რომ თუ ხელფასი არ დარიგდება 28 დეკემბრამდე, 31 დეკემბრიდან ჩვენ შევწყვეტთ მუშაობას და გადავალთ გაფიცვის რეჟიმში”, _ აღნიშნული იყო წერილში, რომელიც საავადმყოფოს თანამშრომლებმა, დირექტორს 28 დეკემბერს გაუგზავნეს.
ამ წერილსაც არ მოჰყოლია რეაგირება და შესაბამისად, ჩოხატაურის საავადმყოფო გაიფიცა, რამაც პრობლემები ავადმყოფებსაც შეუქმნა.
მორიგი დაპირების თანახმად, ნოემბრის თვის ხელფასი ჩოხატაურის საავადმყოფოს თანამშრომლებს დღეს უნდა ჩაერიცხოთ, თუმცა პერსონალი ამბობს, რომ ესეც ტყუილია:
_ ჩვენმა გაფიცვამ პრობლემები შექმნა. დაპირებას დაპირებაზე გვაძლევენ. აღარ ვიცით რა უნდა გავაკეთოთ. ახალი ხელისუფლების იმედი გვქონდა და გვჯეროდა, რომ ბატონი უტიაშვილი დაპირებას აუცილებად შეასრულებდა, მაგრამ შედეგს თავადაც ხედავთ, _ აღნიშნეს ჩვენთან საუბრისას თანამშრომლებმა.
როდის მოგვარდება მრავალწლიანი პრობლემა უცნობია, მით უმეტეს, რომ შპს “ადითის” ხელმძღვანელობა კონტაქტზე არ გამოდის. ინტერნეტში მათი შესახებ არანაირი ინფორმაცია არ იძებნება გარდა იმისა, რომ ყველა რეგიონში, სადაც კომპანია ობიექტს ფლობს, ანალოგიური სიტუაციაა.
აღსანიშნავია ისიც, რომ ჩვენ მიერ მოპოვებული დოკუმენტით ირკვევა, რომ ზურაბ უტიაშვილის მეუღლე ხათუნა კურტანიძე შპს “ადითის” იურისტია. ამას უტიაშვილის 2012 წლის ქონებრივი დეკლარაციაც მოწმობს.
იმის გასარკვევად, როგორ აპირებს დანაპირების შესრულებას ზურაბ უტიაშვილი და მისი მეუღლის სამსახური შეუშლის თუ არა ამაში ხელს, ჯანდაცვის სამინისტროს პრესსამსახურს დავუკავშირდით.
_ ის, რასაც ბატონი ზურა ამ ხალხს დაპირდა შესრულებულია _ ოქტომბრის ხელფასები ჩაირიცხა. რაც შეეხება მომდევნო თვეს, ესეც გაირკვევა, _ აღნიშნა ჩვენთან საუბრისას სოფო გულუამ.
_ ქალბატონო სოფო, ხელფასის ყოველ დაგვიანებაზე ჯანდაცვის სამინისტროდან ვინმე უნდა ჩამოვიდეს თუ ამ პრობლემას ერთხელ და სამუდამოდ დაესმება წერტილი?
_ “ადითი” კერძო კომპანიაა და სამინისტრო ყველაფერს აკეთებს, რაც შესაძლებელია. კერძო კომპანიის შიდა საქმეებში კი ნამდვილად ვერ ჩავერევით.
_ ხელშეკრულება რომ გადაიხედოს არ შეიძლება?
_ ამაზე პასუხის გაცემა ამ წუთს არ შემიძლია, თუმცა ყველაფერი კეთდება, რომ სიტუაცია დალაგდეს.
_ ვინ უნდა დაალაგოს სიტუცია? როგორც გავარკვიეთ ზურაბ უტიაშვილის მეუღლე შპს “ადითის” იურისტია…
_ ეგ ძველი დეკლარაციაა და მისი მეუღლე, ერთი წელია “ადითში” აღარ მუშაობს.
_ დეკლარაცია 2012 წლის 28 მაისს არის შევსებული.
_ დეკლარაცია ივსება წლიდან წლამდე, _ დაგვიზუსტა გულუამ.
