“იმიტირებული დაკრძალვის აქციები, ვისი მისამართითაც არ უნდა იყოს, არის დაბალი პოლიტიკური კულტურის გამოვლინება, თუმცა მე როგორც ვიცი, ამ აქციაში მონაწილე ადამიანებს არც აქვთ მაგის პრეტენზია. მათი ამოცანა მარტივია _ არჩევნები მორჩა! იქ მეტ-ნაკლებად რაღაც ფუნქცია ჰქონდათ, ახდენდნენ საკუთარი “შესაძლებლობების,” რეალიაზაციას. ახლა ნახეს, მორჩა არჩევნები და არავითარი ფუნქცია არ აქვთ. თანაც, უმეტესი მათგანი, “ოცნების” მთავრობის პირობებში კვლავ დაუსაქმებელია, ამიტომ თანახმანი არიან, მონაწილეობა მიიღონ ნებისმიერი სახის, თუნდაც ყველაზე უნიჭოდ დადგმულ “მასკარადებში”. ამიტომ, უმსგავსობა ის კი არ არის, რომ ესენი ასე იქცევიან, არამედ ის, რომ ვინც მათ უკან დგანან, ამათი საცოდაობით რომ ერთობიან.
_ გუბერნატორს და საერთოდ გუბერნიას, ამ დრომდე არ გაუკეთებია კომენტარი ოზურგეთის გამგებელთან დაკავშირებულ ინცინდენტზე, რაზეც სისხლის სამართლის საქმეა აღძრული. უბრალოდ, არ არის საინტერესო თქვენთვის ეს ამბავი, თუ თვლით, რომ მსგავს მოვლენებზე პოზიციის გამოხატვა თქვენს კომპენტენციაში არ შედის?
_ რაც შეეხება გურიის გუბერნატორს, მე ბატონი ვალერი ჩიტაიშვილის ნაცვლად ვერ გიპასუხებთ. ხოლო ჩემი, როგორც გუბერნატორის მოადგილის პოზიცია, ასეთია: როგორც ჩემთვის ცნობილია, აღნიშნულ საქმესთან დაკავშირებით აღძრულია სისხლის სამართლის საქმე, მიმდინარეობს გამოძიება და გამოძიების დასრულებამდე, ჩვენი განცხადება რომ არ იყოს აღქმული გამოძიების პროცესში ჩარევად, გამოძიების დასრულებამდე თავს შევიკავებთ რაიმე კონკრეტული კომენტარის გაკეთებაზე. თუმცა აღვნიშნავ, რომ მიუხედავად იმისა, რას დაადგენს გამოძიება, საზოგადოებამ უკვე მისცა ფაქტს ნეგატიური შეფასება და ეს არანაკლებ მნიშვნელოვანია.
_ “გურია ნიუსისთვის” მიცემულ ინტერვიუში, ოზურგეთის გამგებელი ამბობს, რომ მესამე სართული ხელს უშლის მუშაობაში და ხელს უწყობს მის წინააღმდეგ აგორებულ პროვოკაციებს. მესამე სართულზე თქვენ ზიხართ. რატომ გაბრალებთ გამგებელი მასზე თავდასხმას?
_ მე ერთხელ უკვე გავაკეთე მის ასეთ გამოხტომებზე კომენტარი. ახლა მხოლოდ იმას დავამატებ, რომ როცა ადამიანი მაღალი რანგის საჯარო მოხელე ხდება, მას უკვე შეგნებული უნდა ჰქონდეს და ერთმანეთისგან არჩევდეს პოლიტიკურ ოპონირებას და პირად მტრობას. პოლიტიკური ოპონირება პირად მტრობას არ ნიშნავს. ეს უნდა ესმოდეს მას, ხოლო პირადი მტრობის მაგალითია, როცა პოლიტიკური ოპონირების ჩარჩოდან შურისძიებასა და ოპონენტის ფიზიკურ ანგარიშსწორებაზე გადადიხარ, ეს ნამდვილად არ არის მისთვის უცხო. საერთოდ, თუ ადამიანი დემოკრატიზმის პრინციპებს აღიარებს და ბუნებით დესპოტი არ არის, არაფერი ექნება გასაყოფი სხვასთან. პოლიტიკა ხომ უპირველესად კომპრომისების ხელოვნებაა. შესაბამისად, მე მიმაჩნია, რომ მასთან არაფერი მაქვს გასაყოფი, თუ ისიც ამ პრინციპებს აღიარებს.
_ ბოლო პერიოდში, განსაკუთრებით დაძაბულ რეჟიმში მიმდინარეობს პოლიტიკური პროცესები გურიაში: მასობრივი გათავავისუფლებები აიპ სამსახურებიდან, პოლიტიკური ზეწოლის ფაქტები, რომელზეც ძირითადად “ნაცმოძრაობის” მხარდამჭერები საუბრობენ და აშკარა დაპირისპირება ახლადდანიშნულ გამგებლებსა და გუბერნიას შორის. როგორია ამ შემთხვევაში თქვენი სტრატეგიული გეგმა და როგორ ფიქრობთ, რამდენად შეძლებთ საქმის კეთებას ამ ფონზე?
_ გიდასტურებთ, რომ მართლაც მიმდინარეობს აიპ-დან თანამშრომლების გათავისუფლება. ჩემი ინფორმაციით, გათავისუფლებულია დაახლოებით 100-მდე თანამშრომელი. ხოლო რაც შეეხება იმას, რომ ამაზე უფრო “ნაციონალები” საუბრობენ, ესეც ბუნებრივია… რადგანაც ძირითადად გათავისუფლებები ხდება პოლიტიკური ნიშნით. რაც შეეხება გუბერნიის სტრატეგიულ გეგმებს, სახელმწიფო რწმუნებულის-გუბერნატორის ადმინისტრაცია წარმოადგენს პრეზიდენტისა და საქართველოს მთავრობის წარმომადგენლობას ადმინისტრაციულ-ტერიტორიულ ერთეულში, შესაბამისად ჩვენი საქმიანობის ძირითად სფეროს წარმოადგენს მთავრობის სოციალურ-ეკონომიკური პროგრამების კოორდინაცია. ამდენად, სანამ არ იქნება მთავრობისგან კონკრეტული დავალებები, გუბერნია შემოიფარგლება ადმინასტრაციულ-ტერიტორიულ ორგანოებში საქართველოს პრეზიდენტისა და მთავრობის ნორმატიული აქტების აღსრულების ზედამხედველობის კონტროლით. ახალდანიშნულ გამგებლებთან დაკავშირებით გიპასუხებთ, რომ მათ მიერ განხორციელებულ ყველა ქმედებას, რომელიც მოემსახურება ხალხისა და თავიანთი რაიონის ინტერესებს, ჩვენი – გუბერნიის აბსოლუტური მხარდაჭერა ექნება. მაგრამ თუ გაგრძელდება ის პოლიტიკა, რომელიც მხოლოდ ერთი პარტიის ინტერესებს მოემსახურება, რა თქმა უნდა, ამას ჩვენ მხარს ვერ დავუჭერთ. აი, თუნდაც აიპ-ებიდან თანამშრომლების მასობრივ დათხოვნებს.
_ გუბერნიები პრეზიდენტის ყურადღების ქვეშ განსაკუთრებულად მოექცა ამ ბოლოს. ცვლილება შეეხო თითქმის ყველა გუბერნიას და გუბერნატორს, გარდა გურიისა. გაქვთ რაიმე ახალი დავალებები მიღებული, რაც სასწრაფო წესით უნდა განახორციელოთ?
_ გუბერნატორების ცვლილებასთან დაკავშირებით ჩვენ კომენტარს ვერ გავაკეთებთ. ეს პრეზიდენტის პრეროგატივაა და ჩემი მხრიდან ამაზე რაიმე კომენტარის გაკეთება, როგორც მასზე დაქვემდებარებული პირისა, არაკორექტული იქნება. შესაბამისად, დღეს რომ მე ამ სტატუსით კომენტარს გაძლევთ, ამაში უკვე ვლინდება პრეზიდენტის ნება, რომ ამ ეტაპზე ჩვენს საქმიანობასთან დაკავშირებით კითხვის ნიშნები არ არის. რა თქმა უნდა, არსებობს შესაბამისი დავალებები, რაზეც თუ საჭიროდ ჩათვლის, უშუალოდ ხელმძღვანელი პირი ისაუბრებს. თუმცა დამერწმუნეთ, აღმშენებლობითი პროექტებისა და მხარის სოციალურ-ეკონომიკური განვითარების გეგმების გარდა, ჩვენთვის სხვა ამოცანები და პრიორიტეტები არ არსებობს.
_ ოქტომბრის შემდეგ, სახალწლოდაც დარიგდა პრემიები გუბერნიაში, დაახლოებით 18 000 ლარის. თქვენ ფიქრობთ, რომ გუბერნია ისე კარგად მუშაობს, ყოველ მეორე თვეს პრემიებს უნდა იღებდეს?
_ რაც შეეხება პრემიების საკითხს, მიმაჩნია, რომ საკითხის დასმა _ რაში მიიღეთ პრემია, პრემიის მიმღების მისამართით არაკორექტულია, რადგან მუშაკის პრემიების საკითხს წყვეტს ამა თუ იმ დაწესებულების ხელმძღვანელი, რა დროსაც პირველ რიგში მხედველობაში იღებს პირის დამოკიდებულებას სამსახურისადმი. პრემირება არამარტო გაწეული სამსახურისთვის, არამედ თანამშრომლის წახალისების, სტიმულირების და სამუშაო მოტივის ამაღლების ფორმაა. მე, შორსა ვარ იმ აზრისაგან, თქვენ ან ნებისმიერი საღად მოაზროვნე ადამიანი წინააღმდეგი იყოს, რომ საჯარო მოხელეებმა დამსახურების ან თუნდაც სამუშაო მოტივების ამაღლებისთვის პრემია მიიღოს. საერთოდ, არა როგორც საჯარო მოხელის, არამედ ჩემი როგორც უბრალო მოქალაქიის პოზიციაა, რომ არასწორია, როდესაც საზოგადოებაში პრემიის მიღების თემის ნეგატიური კონტექსტში განხილვა ხდება. ჩვენ აქცენტი იმაზე კი არ უნდა გავაკეთოთ, ვინ რამდენი პრემია აიღო, არამედ ბევრი სამუშაო ადგილი იყოს და ყველას ჰქონდეს პრემიის მიღების შესაძლებლობა.
_ ხომ არ გქონიათ ან ხომ არ განგიხორციელებიათ ინიციატივა, რომ წინასაახალწლოდ აღებული პრემიების მცირედი ნაწილით მაინც დახმარებოდით სოციალურად გაჭირვებულებს?
_ ძალიან კარგია ჩვენი ქველი საქმეების გაპიარება რომ განგიზრახავთ, მაგრამ ამ საკითხზე ჩემი ხედვა ასეთია: რასაც მარჯვენა აკეთებს, არ უნდა იცოდეს მარცხენამ და პირიქით, და საერთოდ ვფიქრობ, რომ ხალხის დასანახად და მოსაჩვენებლად, მით უფრო მედიის, თუნდაც პირჯვრის გადაწერა და ან ლოცვა, ჩემთვის მიუღებელია.
