_ მეორე ჯგუფის ინვალიდი ქოხში ცხოვრობს და იმ პერიოდში, ბატონ გივის სოციალური დახმარება მოხსნილი ჰქონდა. სამწუხაროდ, იმ 
რეპორტაჟის შემდეგ, გივი შევარდნაძეს სასწრაფო ოპერაცია ჩაუტარდა და მეორე ფეხიც მოკვეთეს.
გივი შევარდნაძეს ოზურგეთის კლინიკურ საავადმყოფოში ვესტუმრეთ. აღუდგენენ თუ არა სოციალურ დახმარებას, მან ჯერ არ იცის: _ რატომ შემიწყვიტეს დახმარება? ბევრმა ადამიანმა ნახა თქვენი რეპორტაჟი და იციან, მე სადაც ვცხოვრობ. ხანდახან დას მივყვები სახლში. აბა, რა ვქნა? ახლა მეორე ფეხიც არ მაქვს და მოვლა-პატრონობა მინდა.
მისივე თქმით, ადრე, კომუნისტების პერიოდში, საკოლმეურნეო საქმიანობაში აქტიურად იყო ჩართული:
_ ხელისუფლებაც შეიცვალა და დროც, ვეღარ ვიმუშავე. მერე ხანძარმა მთლიანად შთანთქა ჩემი სახლი და ვეღარ შევძელი ახლის აშენება. შემდეგ შვილები საცხოვრებლად სხვა ქალაქებში გადავიდნენ და დავრჩი მარტო. შვიდი წელია, ჯანმრთელობა გამიუარესდა. დახმარება მეძლეოდა და ისიც აღარ მაქვს! ახლა რომ ოპერაცია გავიკეთე, გავიგე, სოცაგენტი ხელმეორედ ამოწმებდა ჩემს ქოხს. რა არის იქ გადასამოწმებელი? სახელმწიფო იმ დახმარებას მიხსნის, რომლითაც პურს ვყიდულობდი? _ საკუთარ გულისტკივილს გვიმხელს გივი შევარდნაძე, რომელსაც სოციალური დახმარება სამი წლის წინ დაენიშნა, ბოლო კუთვნილი თანხა კი ათი თვის წინ მიიღო.
_ რა მექნა? ხანდახან, როდესაც ცუდად ვხდებოდი, ჩემს დასთან გადავდიოდი საცხოვრებლად. როდესაც საავადმყოფოდან გამოვედი, ჩემს დასთან ვცხოვრობდი, რადგან თავს მარტო ვერ მოვუვლიდი და მაგ დროს მოსულა თურმე ჩემთან აგენტი. შემდეგ გავიგე, რომ მომეხსნა დახმარება, რადგან სახლში არ ვიყავი. ბოლოს ისევ ცუდად გავხდი და ახლა, არც ვიცი, რა იქნება.
“გურია ნიუსთან” სოციალური მომსახურების სააგენტოს ოზურგეთის განყოფილების მთავარი სპეციალისტი ნინო ჩხაიძე ამბობს, რომ გივი შევარდნაძეს 2011 წლის იანვრიდან შეუწყდა სოციალური დახმარება:
_ ჩვენთან შემოსულია განცხადება, სადაც აღნიშნულია, რომ შევარდნაძის ოჯახში, მასთან ერთად ცხოვრობს მანანა მინდაძე, რის შემდეგ კვლავ გადამოწმდა მისი ოჯახი. უკვე ცნობილია, რომ მას დაბალი ქულები აქვს და აპრილიდან აღუდგება დახმარება, ასევე, დაემატება ორი თვის კუთვნილი თანხა, _ თქვა ჩვენთან საუბრისას ნინო ჩხაიძემ.
