“საქმიანი” პოლიციელები, “საქმიანი” რწმუნებული და “უსაქმური” დვაბზუელები

ისინი ამ მილების რეალიზაციიდან მიღებული თანხით ამორტიზებული ელექტრობოძების შეკეთებას აპირებდნენ. როგორც იქაურები ამბობენ, მილებს, დაახლოებით, ხუთი დღის განმავლობაში იღებდნენ მიწიდან. მათი თქმით, საქმის კურსში იყო სოფლის რწმუნებული, თუმცა ოზურგეთში ჩატანილი მილები. მათ პოლიციამ ჩამოართვა. მომხდართან დაკავშირებით, აღძრულია სისხლის სამართლის საქმე. დვაბზუელების თქმით, რამდენიმე წლის წინ მსგავსი მილები მთელმა სოფელმა ამოიღო. ასეთი პრეცედენტი სხვა სოფლებშიც დაფიქსირდა, თუმცა, ხალხისთვის მილები არავის ჩამოურთმევია.

სოფლის მცხოვრებლები “გურია ნიუსთან” უამრავ საეჭვო ვერსიაზე საუბრობენ:

_ ადრე, ალბათ, მთავრობას “აწყობდა” ეს და იმიტომ არ ამბობდნენ არაფერს. ჩვენც გვაინტერესებს, სინამდვილეში რა ხდება, რატომ შეექმნა ამ გაჭირვებულ ხალხს პრობლემა? საქმე ნახეს და დენიკინისდროინდელი მილების გამო, მიწაში ჟანგი რომ ჭამდა, სისხლის სამართლის საქმე აღძრეს! ასეთ მძიმე და ეკონომიკურად გაუსაძლის პირობებში, ხალხის ასე გაწირვა შეიძლება? რომელი კრიმინალები ესენი ნახეს, იპარავდნენ რაიმეს? როგორც ვიცით, სოფლის რწმუნებული იყო საქმის კურსში, ხუთი დღის განმავლობაში თხრიდნენ, იწვალეს, რომ სოფლის ელექტროგაყვანილობა მოეწესრიგებინათ _ მსუბუქი ქარი რომ ამოვარდება, შუქი მაშინვე ითიშება, ხაზები მიწაზეა დაყრილი, ბოძები წაქცეულია. ერთ დღეს შეიძლება, დენმა ვიღაცა შეიწიროს კიდეც. ამ მდგომარეობის გამოსწორება და მოწესრიგება უნდოდათ, პოლიციამ კი საქმე აღძრა, _ ამბობენ დვაბზუელები.

_ რას მიზამენ, ბიძია, დამიჭერენ? _ შეგვეკითხა 73 წლის მამაკაცი, რომელმაც, თურმე, მიწიდან რამდენიმე მილი ამოიღო.

_ რამდენი ლარის ღირებულების იქნებოდა მილები?

_ დაახლოებით, 400 ლარის.

_ თქვენი აზრით, რატომ ჩამოგართვეს?

_ არ ვიცი. მსგავსი ფაქტისთვის არავინ დაუჭერიათ და ჩვენც იმიტომ გავბედეთ. ნახეთ, წაქცევაზეა ელექტროგადამცემი ბოძები. გვინდოდა, შეგვეცვალა, ელექტროსადენები და ელექტროდი გვეყიდა. რამდენჯერ მივმართეთ ენერგოკომპანიას დაგვხმარებოდა, მაგრამ ყურადღება ვინ მოგვაქცია?!

სოფლის გამგებელი საქმის კურსში იყო. ისიც დაიბარეს პოლიციაში და დაკითხეს. ხუთი დღის განმავლობაში ვმუშაობდით და არავის არაფერი უთქვამს. თუ არ შეიძლებოდა მილების ამოღება, ხომ უნდა გავეფრთხილებინეთ ვინმეს? თუ ასე საჯაროდ ჩავდიოდით დანაშაულს, სად იყვნენ აქამდე?

მაგათ რა ენაღვლებათ? საქმე გახსნეს და “კრიმინალები” გვიპოვეს! მთელი სოფელი დადგება ფეხზე.

“გურია ნიუსი” ოზურგეთის მუნიციპალიტეტის სოფელ დვაბზუს რწმუნებულს მიშა ხუჭუას დაუკავშირდა. თუმცა მისი ნახვა, ორი დღის განმავლობაში, ვერ მოხერხდა. როგორც შემდეგ აღნიშნა, სხვა საქმეებით იყო დაკავებული: _ სოფელში სიებს ვადგენ ვაუჩერებისთვის. ვშიშობ, ვინმე არ გამომრჩეს. ვაუჩერების საკითხის მოგვარება უფრო მნიშვნელოვანია ჩემთვის. ბოდიშს გიხდით, დრო არ მაქვს და ვერც ხვალ დაგპირდებით კომენტარის გაკეთებას, _ გვითხრა სატელეფონო საუბარში სოფლის “საქმიანმა” რწმუნებულმა.

ჩვენი წყაროს ინფორმაციით, ამ საქმესთან დაკავშირებით, თბილისიდან დასკვნას ელოდებიან. წყაროს თქმით, ეს იყო “უპატრონო ქონება”, რომელიც, წესით, აუქციონზე უნდა გაიყიდოს. ვინაიდან საქმე ძიებაშია და მილები ნივთმტკიცებაა, მისი რეალიზაცია არ შეიძლება: _ გამოძიების დამთავრების შემდეგ, ჩამორთმეული მილები მუნიციპალიტეტის გამგეობას გადაეცემა, _ ვარაუდობს ერთ-ერთი მაღალჩინოსანი.