პროდუქციის იმპორტი ქვეყანაში თურქეთიდან ხორციელდებოდა.
“ეს საკარანტინო დაავადებაა, რომლის შესახებაც იმპორტიორ ქვეყანას ეცნობება. საქართველოში შემოტანილი პროდუქცია კი უკვე დაყადაღებულია და მისი სრული განადგურება მოხდება. ამ ტვირთის ბაზარზე გატანა არ შეიძლება,”– ამბობს საქართველოს სოფლის მეურნეობის მინისტრი დავით კირვალიძე.
მინისტრის განცხადებით, ქვეყანაში სურსათის უვნებლობის კონტროლი გამკაცრდება. ახლა სურსათის ეროვნული სააგენტო ევროკავშირის მოთხოვნების შესაბამისად სურსათის უვნებლობს კოდექსში შესატან ცვლილებებს ამზადებს. “კოდექსზე მუშაობა ძალიან მნიშვნელოვანია, ვინაიდან ეს გახლავთ ევროკავშირთან თავისუფალი ვაჭრობის მოლაპარაკების დაწყების წინაპირობა. ევროკავშირის ექსპერტები საქართველოში იმყოფებიან, ისინი სურსათის უვნებლობის სააგენტოსთან ერთად მუშაობენ. კანონპროექტს დასამტკიცებლად პარლამენტში გაზაფხულზე შეიტანენ. ბევრი კითხვა ისმის, რატომ გვჭირდება ეს? იმიტომ, რომ უხარისხო პროდუქტის მიღებისგან ყველა მომხმარებელი დაცული იყოს. სააგენტომ რამდენიმე შემთხვევა დააფიქსირა და აღრიცხა, როდესაც ბაზარზე შედიოდა არა საქონლის, არამედ ვირისა და ცხენის ხორცი… ადამიანები კონტროლზე თავის არიდებას ცდილობდნენ. კონტროლის გამკაცრება შეიძლება ვიღაცისთვის სასიამოვნო არ იყოს, მაგრამ ეს არის საზოგადოების – თქვენი, ჩვენი არჩევანი. ერთხელ და სამუდამოდ ამას წერტილი უნდა დავუსვათ. რა თქმა უნდა, ჩვენ სათანადოდ აღჭურვილი ლაბორატორია, სამსახური და სათანადოდ დატრეინინგებული პერსონალი გჭირდება… ეს სწორი გზაა და ჩვენ გადახვევას არ ვაპირებთ. მეწარმეს სრული კომფორტი უნდა ჰქონდეს და ზედმეტად არავინ შეაწუხოს, მაგრამ იქ, სადაც საქმე სურსათის უვნებლობას და ადამიანის სიცოცხლეს ეხება, პოზიცია შეუვალი იქნება,”– აღნიშნა დავით კირვალიძემ.
მინისტრის განცხადებით, ყველა კომპანიას მიეცემა გონივრული ვადა იმისათვის, რომ საკუთარი წარმოება ევროკავშირის სტანდარტებთან შესაბამისობაში ეტაპობრივად მოიყვანოს.
“განურჩევლად, ყველა კომპანიას გონივრული ვადა მიეცემა, რომ გადააიარაღოს და საკუთარი წარმოება ევროკავშირის სტანდარტებთან შესაბამისობაში მოიყვანოს. არის სამუშაოები, რომელიც მოკლე დროში შეიძლება შესრულდეს. ეს გახლავთ ელემენტარული სანიტარული ნორმების დაცვა. მეწარმეებს ისეთს არაფერს მოვთხოვთ, რომლის გაკეთებაც შეუძლებელია. გარდა ამისა, ევროკომისია და ევროკავშირის წევრი ქვეყნები გარდამავალ პერიოდში ასეთი მეწარმეებისთვის სათანადო დახმარებას გვთავაზობენ. ყველას შეეწყობა ხელი, რომ ეტაპობრივად იმ სტანდარტებამდე მივიდნენ, რომლის მეშვეობითაც მომხმარებელი დაცული იქნება. კონტროლი შეეხება როგორც ადგილობრივ წარმოებას, ისე იმპორტირებულ პროდუქციას,“ – ამბობს სოფლის მეურნეობის მინისტრი.
დავით კირვალიძის განცხადებით, სურსათის ეროვნული სააგენტოს ბიუჯეტი შარშანდელთან შედარებით. 12 მლნ 700 ათასი ლარით გაიზარდა. გასულ წელს ის 3 მლნ ლარი იყო. წელს კი 15 მლნ 700 ათასი ლარია.
