შეხვედრაზე ხაზი გაესვა პოლიტპატიმრისა და პოლიტიკური დევნილის სტატუსის მქონე ადამიანების სრული სამართლებრივი რეაბილიტაციის აუცილებლობას.
მიმოხილულ იქნა ქვეყანაში შექმნილი პოლიტიკური მდგომარეობა და აღინიშნა, რომ დაუყოვნებლივ, ობიექტურად უნდა იქნას გამოძიებული 2011 წლის მაისის მოვლენები და აუცილებლად უნდა წარსდგეს მართლმსაჯულების წინაშე ყველა ის პირი, რომელმაც დაგეგმა და განახორციელა 26 მაისის სისხლიანი სადამსჯელო სპეცოპერაცია.
ყოფილმა პატიმრებმა ხაზი გაუსვეს, რომ ცინიკურია იმ ორგანიზაციის მხრიდან, დღეს პოლიტიკურ დევნაზე საუბარი, რომელმაც ქვეყანაში ჩამოაყალიბა მოძალადე რეჟიმი და ათასობით ადამიანი უსამართლოდ გამოგვამწყვდია ციხეში.
დამსწრე საზოგადოებამ პოზიტიურად შეაფასა მთავრობის ინიციატივა სპეციალური კომისიის შექმნის თაობაზე, რომელიც განიხილავს რეჟიმის მიერ რეპრესირებული ჩვენი თანამოქალაქეების საჩივრებს და იმედი გამოთქვა, რომ აღნიშნული კომისია უმოკლეს ვადებში შეუდგება მუშაობას ქვეყანაში სამართლიანობის აღდგენის მიზნით.
როგორც პოლიტპატიმარმა გია სალუქვაძემ აღნიშნა, აუცილებელია თითოეული პოლიტპატიმრის საქმე გამოძიებულ იქნას მთავარი პროკურატურის ცენტრალური აპარატის მიერ, ხოლო მასზე პროცესუალური ზედამხედველობა განახორციელოს მთავარმა პროკურორმა, ვინდაიდან სისტემაში სხვადასხვა საპასუხისმგებლო თანამდებობებს სამწუხაროდ დღემდე იკავებენ ის ადამიანები, რომლებიც უშუალოდ ასრულებდნენ ხელისუფლების უკანონო, პოლიტიკურ დაკვეთებს.
შეხვედრას ასევე ესწრებოდნენ „დემოკრატიული მოძრაობის“ ის წევრები, რომლებიც წლების მაძილზე იყვნენ ნაციონალური რეჟიმის მსხვერპლნი და უკანონოდ, პოლიტიკური ნიშნით, რეჟიმის პიროიბებში, ამნისტიის მიღებამდე, უკვე მოიხადეს სასჯელი. როგორც მათ განაცხადეს, ყველა მათგანმა უკვე მიმართა საქართველოს პარლამენტის ადამიანის უფლებათა დაცვის კომისიას, მათთვის პოლიტპატიმრის სტატუსის მინიჭების თაობაზე.
გამოთქმულ იქნა მოსაზრება, რომ პოლიტპატიმართა რიგებიდან უნდა შეიქმნას შიდაპარტიული ჯგუფი, რომელიც კოორდინაციას გაუწევს როგორც პოლიტპატიმრისა და პოლიტიკური დევნილის სტატუსის მქონე, ასევე სტატუსის არმქონე „დემოკრატიული მოძრაობის“ პოლიტიკურად რეპრესირებულ წევრებს, ვინაიდან უფრო ეფექტურად და ორგანიზებულად წარიმართოს ბრძოლა მათი კანონიერი უფლებების აღდგენისათვის.
ნინო ბურჯანაძემ თანაპარტიელებს მადლობა გადაუხადა რეჟიმის წინააღმდეგ შეუპოვარი ბრძოლისათვის რაც მათ საკუთარი სიცოცხლისა და ჯანმრთელობის და ოჯახების უსაფრთხოების რისკის ფასად გასწიეს და აღნიშნა, რომ სწორედ ამ თავდაუზოგავმა ბრძოლამ სამშობლოს გადარჩენისათვის, გადატეხა რეჟიმი და უზრუნველყო ქვეყანაში 1 ოქტომბრის მშვიდობიანი ცვლილებები.
_ „ჩვენ, ყველანი ერთად აუცილებლად მივაღწევთ იმას, რომ ის ადამიანები, რომლებმაც დაგეგმეს და მონაწილეობა მიიღეს, როგორც ჩვენი პარტიის დისკრედიტაციაში, ასევე ჩვენი თანაპარტიელების და თანამოქალაქეების უკანონო მასიურ დაპატიმრებებში, აუცილებლად აგებენ პასუხს დამოუკიდებელი სასამართლოს წინაშე კანონის სრული სიმკაცრით. ჩვენ არ გვინდა რევანში, ჩვენი ამოცანაა ქვეყანაში აღარ არსებობდეს დაუსჯელობის სინდრომი და უზრუნველყოფილ იქნას კანონის უზენაესობის პრინციპი. მხოლოდ ესაა იმის გარანტია, რომ ჩვენი სამშობლო და ჩვენი თანამოქალაქეები აღარასოდეს გახდნენ უსამართლობისა და თავგასულ ხელისუფალთა მსხვერპლნი. მხოლოდ ამ პრინციპებით შეიქმნება თავისუფალი, დემოკრატიული და ძლიერი საქართველო.“ _ აღნიშნა ბურჯანაძემ.
