ღარიბაშვილმა შეხვედრაზე სამინისტროში გახორციელებულ რეფორმებზე ისაუბრა და სტუდენტებს სამომავლო გეგმები გააცნო. მინისტრმა ქვეყანაში მიმდინარე პოლიტიკურ პროცესებზე ვრცლად ისაუბრა. შეხვედრა კითხვა-პასუხის რეჟიმში წარიმართა.
ირაკლი ღარიბაშვილი: “ჩავატარეთ ტესტირება. ტესტირების შედეგად შეიქმნებოდა საერთო სურათი, თუ სად გვაქვს ნაკლოვანებები, სუსტი მხარეები და კონკრეტულად მოვახდენდით ფოკუსირებას ამ სუსტ მხარეებზე. ტესტირების შემდეგ გამოიკვეთა საპატრულო დეპარტამენტის ათი რიგითი პატრულ-ინსპექტორი, რომლებმაც ძალიან მაღალი შეფასება მიიღეს. ბუნებრივია, ამ ადამიანებმა თავიანთი ცოდნა და შესაძლებლობები უფრო მაღალ თანამდებობებზეც უნდა გამოიყენონ და მე ვფიქრობ, რომ მათ აუცილებლად დავაწინაურებთ. სასამართლოსთან გვაქვს გაუგონარი სირთულეები. მე მართლაც მებრალებიან ის მოსამართლეები, რომლებსაც უწევდათ და ჯერ კიდევ უწევთ დაკვეთების შესრულება. ცუდია, როცა მოსამართლე გქვია და ყოვლად უსამართლო გადაწყვეტილებას ღებულობ. არ შეიძლება პოლიციამ ყაჩაღობის ფაქტზე დაიჭიროს ნიღბიანი, ავტომატიანი დამნაშავე და ის სასამართლომ 5 000 ლარიანი გირაოთი სასამართლო დარბაზიდან გაათავისუფლოს. გამოდის, რომ სასამართლო წახალისებას უკეთებს კრიმინალს, მაგრამ ჩვენ აუცილებლად შევქმნით სამართლიან სასამართლოს.
პირველი დავალება, რაც მე მივეცი საპატრულო დეპარტამენტს იყო ის, რომ არ უნდა იქნეს გარჩევა საზოგადოებაში. დაარღვია წესები? გააჩერეთ და დააჯარიმეთ ყველა, განურჩევლად სტატუსისა და თანამდებობებისა. დროა ყველამ ვისწავლოთ კანონის პატივისცემა.
წინა ხელისუფლების დროს ჰქონდათ შექმნილი სამმართველო, რომელიც ვირუსებს ამზადებდა და შემდეგ პოლიტიკურ ოპონენტებს უგზავნიდა ამ ვირუსებს, იყო საიტების გატეხვა და სხვა მაქინაციები. სამინისტროში ადამიანების პირადი ცხოვრების ამსახველი მთელი არქივი დაგვხვდა. თქვენ წარმოიდგინეთ, საკუთარი გუნდის წევრებს და ნათესავებსაც კი უღებდნენ ვიდეოს. ამაზრზენია ეს ყველაფერი. მე გამოვყოფდი საპატრულო პოლიციის პროექტს, რომელიც არის მართლაც მნიშვნელოვანი და წინგადადგმული ნაბიჯი თანამედროვე მოდერნიზებულ ქართულ პოლიციაში. აქვე მინდა შეგახსენოთ, რომ ეს პროექტი მთლიანად ბატონი ბიძინა ივანიშვილის მიერაა დაფინანსებული ჯერ კიდევ 2004 წელს. ჩვენი გუნდი არ აპირებს ყველაფრის შეცვლას, მაგრამ არის მთელი რიგი საკითხები, რომლებიც გადასახედი და შესაცვლელია. მაგალითად, ე.წ. კუდ-ი, სოდ-ი და სხვა, რომლებიც რეალურად არ ასრულებდნენ მათზე დაკისრებულ მოვალეობას _ ისინი ასრულებდნენ პირდაპირ პოლიტიკურ დაკვეთებს. ეს, რა თქმა უნდა, ჩვენთვის მიუღებელია. პოლიცია უნდა იყოს მხოლოდ საზოგადოებაზე ორიენტირებული, პოლიცია უნდა ემსახურებოდეს თავის ქვეყანას, ხალხს და არა ერთ რომელიმე პოლიტიკურ ჯგუფს ან ინდივიდს. ფაქტია, რომ ბოლო წლებში მომხდარი მოვლენების შემდეგ, საზოგადოებამ ერთგვარად დაკარგა ნდობა პოლიციის მიმართ. მოქალაქეებს კი არ უნდა ეშინოდეთ პოლიციელების, არამედ მათი იმედი უნდა ჰქონდეთ. მე თანამდებობაზე მოსვლის დღიდან მივეცი თითოეულ მათგანს დავალება, რომ იყოს მოქალაქეების მეგობარი, მაგრამ დაუძინებელი მტერი კრიმინალის, ბანდიტიზმის და დანაშაულების. ჩემი ახალი ინიციატივაც, რომ დავიწყებთ სტუდენტების მიღებას სამინისტროში, ემსახურება სწორედ სისტემის გაჯანსაღებას. ჩვენი ქვეყნის მომავალი ხომ პროგრესულად მოაზროვნე ახალგაზრდებზე უნდა გავიდეს.”
მაკა იოსელიანი, GIPA-ს რექტორი: “ინსტიტუტის არსებობის 16 წლის განმავლობაში, ეს არის პირველი შემთხვევა, როცა შინაგან საქმეთა მინისტრი მოვიდა სტუდენტებთან შესახვედრად და ყველა მათთვის საინტერესო შეკითხვას გასცა პასუხი. ჩემი აზრით, ეს არის დიდი პროგრესული ნაბიჯი ამ სფეროში და საკმაოდ მნიშვნელოვანია, რადგან ეს სტუდენტები არიან საქართველოს ხვალინდელი დღე.
სტუდენტებს მოსწონთ შსს ახალი პროგრამა სტუდენტების დასაქმების შესახებ. მათი აზრთ ეს ძალიან მნიშვნელოვანია, რადგან დღეს ახალგაზრდობის დიდი ნაწილი დაუსაქმებელია და როცა იქნება სტაჟირება, ეს ყველაფერი მათ საკუთარი რეალიზების და ცოდნის გაღრმავების საშუალებას მისცემს.”
