როგორც ჩვენთვის იყო ცნობილი, მათ აქცია უნდა გაემართათ, თუმცა, შეკრებილ მოსახლეობასთან მისულმა სოფლის დეპუტატმა ავთანდილ სურგულაძემ და სოფლის სპეციალისტმა გელა ლომჯარიამ კატეგორიულად უთხრეს მათ, რომ აქცია არ გაემართათ და ოზურგეთის რაიონული პროკურორის მოადგილესთან მალხაზ სირაძესთან შეხვედრა მოთხოვეს.
საქმე ეხება რამდენიმე წლის წინ, სოფელ ჭანიეთში ყოფილ მეპაიეთა ქონების დაბრუნებას მოსახლეობისთვის.
კოლმეურნეობის პერიოდში, ჭანიეთის მოსახლეობას სარგებლობის უფლებით ჰქონდა ე.წ. “ლეკიანის” ტერიტორიაზე 50 ჰექტარზე მეტი მიწის ფართობი. პრივატიზაციის პერიოდში, როგორც ჭანიეთის მოსახლეობა აცხადებს, თითოეულ ოჯახს საკუთრებაში გადაეცა მიწის ფართობი არა უმცირეს 1 ჰექტრისა, ხოლო “ლეკიანში” არსებულ სახნავ-სათესი ფართობი, რომელიც ხალხს ჰქონდა სარგებლობის უფლებით, შემდეგ სოფელში შექმნილ შპს “ჭანიეთის” საკუთრებაში გადავიდა. როგორც მოსახლეობა აცხადებს, ამის შემდეგ მათ მიწები ჩამოერთვათ, რომელიც, შემდგომ, რამდენიმე პიროვნებამ გაყიდა. აღნიშნულ საქმესთან დაკავშირებით, როგორც თავად აცხადებენ, წლებია გამოძიება მიმდინარეობს, თუმცა, რა ხდება საქმის ირგვლივ, არ იციან.
_ დახურეს, ალბათ, რადგან ეს არ “აწყობდათ” მაშინ ვიღაცეებს,_ ამბობენ ჭანიეთელები.
საქმის ადვოკატი რეზო გობრონიძე ამბობს, რომ აღნიშნული შპს უკანონოდ დაფუძნდა და საქმეში იკვეთება თაღლითობის ნიშნები, რომელზეც პროკურატურას დღემდე პასუხი არ გაუცია.
“პროკურორის მოადგილემ, მალხაზ სირაძემ მოგვცა გარანტია, რომ ამ საქმეზე გამოძიება დაიწყებოდა _ დავიწყეთ ხელახლა და უმოკლეს ვადაში მოგცემთ პასუხსო. ამდენ ხანს რატომ არ გამოიძია მან ეს საქმე? ახლა იგივე პროკურორები არიან და ახლა გვპირდებიან, რომ, თურმე, საქმეს შეისწავლიან. ახლა თუ აქვს უფლება, ესე იგი ადრეც ჰქონდა და არ გააკეთა. რაშია საქმე? აღარ მოვატყუნებინებთ თავს. წაართვეს ხალხს მიწები, საყანე ფართობები და თვითონ მანქანები და სიმდიდრე შეიძინეს, უკვე 23 წელიწადია ჩვენი მიწების დაბრუნებაზე ვბრძოლობთ, სოფლის კუთვნილი მიწა მოხმარდეს მოსახლეობას, ჩვენ არ ვითხოვთ დამნაშავებიის დასჯას, ჩვენ გვინდა მიწები დაუბრუნდეს ხალხს.”
“ჩვენ ადრე ყველა მასალა გადავეცით სამართალდამცავებს _ სოფლის, მიწის ნაკვეთების, ქონების და თაღლითობის შესახებ. რამდენიმე წელია ეგ საქმე პროკურატურას თაროზე აქვს შემოდებული, საერთოდ არ აინტერესებს, პასუხი დღემდე არ არსებობს. ამიტომ შევიკრიბეთ დღეს პროკურატურთან, რომ შეიცვლა დრო, ხელისუფლება და, იქნებ, დღეს მაინც დაიწყონ ამ საქმის ხელახალი გამოძიება და წართმეული მიწები უკან დაუბრუნდეს ხალხს,” _ აცხადებდნენ პროკურატურასთან შეკრებილი ჭანიეთის მცხოვრებნი.
რეზო გობრონიძე ადვოკატი: “ადგილობრივი ხელისუფლების წარმომადგენლები ხელს უშლიან ამ საქმის გამოძიებას, რად გინდათ ახლა აქციების გამართვა, აცალეთ ახალ ხელისუფლებასო საქმის კეთებაო. ვის ვაცალოთ და ვინ მოვიდა დღეს? პროკურორები? აქ ის პროკურორები არ არიან, რომლებიც წლების მანძილზე მუშაობდნენ? მაგათი პასუხები არ გვაქვს ორი წელია, რომ გვწერენ დანაშაულის ნიშნები არ იკვეთებაო? ახლა გამოიძიებენ ამ საქმეს? ეს არის სირცხვილი,” _ ამბობს გობრონიძე და დასძენს, რომ როცა გაუქმდა კოლმეურნეობები, მის ბაზაზე პირველად შექმნეს კოოპერატივი, ეს კოოპერატივი შემდეგ გადაკეთეს შპს-დ: “ერთ მშვენიერ დღეს რამდენიმე პიროვნებამ სოფლის “შპს” თავისად გადაიფორმა, ანუ ამ მიწებს დაესაკუთრა. ერთ დღეს შეადგინეს ყალბი ოქმი, ვითომ კრება ჩატარდა, დაისაკუთრეს და შემდეგ გაყიდეს. მოსახლეობაც წლებია ელოდება სამართალდამცავებისგან სიმართლის დადგენას, მაგრამ ამაოდ. ასეთი სისტემა იყო ქვეყანაში, ამ სისტემაში შედიოდნენ ეს პროკურები. ვინმე შეიცვალა ოზურგეთში? ორი წელია იძახის მალხაზ სირაძე, აქ არანიარი დანაშაული არ არისო და ახლა შეიძლება, რომ დადგინდეს სიმართლე? ახლა ხომ ვერ იტყვის, კი, ბატონო, დანაშაული იყოო? მაშინ ვისი პასუხისგების საკითხი უნდა დადგეს? მაშინ ხომ უნდა მიაფარო მას ეს საქმე და წერილები სახეში? ახლა უნდათ, რომ მოერგონ ახალ ხელისუფლებას? დღეს ვიწყებთ გამოძიებასო! კი, ბატონო! დაიწყონ,” _ ამბობს ადვოკატი რეზო გობრონიძე.
ოზურგეთის რაიონული პროკურორის მოადგილე მალხაზ სირაძე “გურია ნიუსთან” აღნიშნავს, რომ ამ საქმესთან დაკავშირებით მოკვლევას ოზურგეთის რაიონული პოლიციის სამმართველო აწარმოებდა. მისი განცხადებით, პროკურატურამ გამოძიება ახლა დაიწყო.
როგორც ჩვენთვის ცნობილია, შპს “ჭანიეთის” დამფუძნებელთაგან მხოლოდ ერთია ცოცხალი. დავით სურგულაძე აცხადებს, რომ კომენტარს არ აკეთებს და არც გააკეთებს.
ოზურგეთის მუნიციპალიტეტის სოფელ ჭანიეთის რწმუნებული დავით მჟავანაძე: “მოსახლეობა შეიკრიბა ყოფილ მეპაიეთა ქონების დაბრუნების თაობაზე. მიმართავენ პროკურატურას საქმის გამოსაძიებლად. როგორც მე ვიცი, საქმე იყო ადრე პროკურატურაშიც, სასამართლოშიც, მაგრამ როგორც მოსახლეობა აცხადებს, ეს საქმე დღემდე არავის გამოუძიებია. დღეს მოითხოვენ საქმეზე ხელახლა გამოძიების დაწყებას შესწავლას.
რაც შეეხება ხელშეშლას აღნიშნული საქმის გამოძიებასთან დაკავშირებით, ჩემგან არანაირ ხელშეშლას არ ჰქონია კავშირი და ვერც ერთი ჩემი თანასოფლელი ვერ დაადასტურებს ამას. პირიქით, ჩემი ინტერესია, რომ მალე მოხდეს ამ საქმის გამოძიება. რაც შეეხება სხვა ხელმძღვანელ პირებს, ამის შესახებ შეგიძლიათ სხვას კითხოთ,” _ აცხადებს დავით მჟავანაძე.
ოზურგეთის მუნიციპალიტეტის სოფელ ჭანიეთის მაჟორიტარი დეპუტატი ავთანდილ სურგულაძე “გურია ნიუსთან” კომენტარს არ აკეთებს.
