ამ პერიოდს უკავშირდება რამდენიმე ყაჩაღობა და ათობით გაუხსნელი დანაშაული, რომლებიც დღესაც თაროზეა შემოდებული.
ცირეკიძეს, რომელიც გურიაში წამოსვლამდე ქუთაისში მუშაობდა, ბევრი მომჩივანი ჰყავს. ზოგი მათგანი პროკურატურას მიმართავდა, ზოგი _ მედიას, თუმცა, არც ერთ შემთხვევაში ცირეკიძეს პასუხი არ უგია. ამბობდნენ, რომ იგი ყოფილი შინაგან საქმეთა მინისტრის, ვანო მერაბიშვილის ფავორიტი იყო და სწორედ ამას უკავშირებენ, რომ არც ერთ შემთხვევაში, არათუ მისი ბრალეულობა არ გამოკვეთილა, არამედ დასაკითხადაც არავის დაუბარებია.
დავით ცირეკიძემ მოახერხა და საკმაოდ მაღალი თანამდებობა ოქტომბრის არჩევნების შემდეგად შეინარჩუნა _ ის ქუთაისის ციხის უფროსია.
სასჯელაღსრულებისა და იურიდიული დახმარების სამინისტროს პრესსამსახურის ხელმძღვანელის, ირაკლი კორძაიას ინფორმაციით, ცირეკიძე ახალ ხელისუფლებას არ დაუნიშნავს.
მიუხედავად ამისა, ადამიანთა ნაწილს ახალი ხელისუფლების მისამართით ცირეკიძის თანამდებობაზე დატოვების გამო ბევრი კითხვა აქვს, რაც გურიის სამხარეო პოლიციის მთავარი სამმართველოს ყოფილი უფროსის მიმართ არსებულ საკმაოდ ბევრ ბრალდებას უკავშირდება.
ერთ-ერთი ბოლო ბრალდება კი, რომელიც დავით ცირეკიძის მიმართ გაჟღერდა, მამუკა მგალობლიშვილს ეკუთვნის. იარაღის უკანონო შეძენა-შენახვა-ტარების და ყაჩაღობისთვის ბრალდებული ამბობს, რომ დავით ცირეკიძემ მას ყაჩაღობა შესთავაზა.
“გურია ნიუსი” ამ თემაზე გასულ ორშაბათს წერდა. მაშინ ცირეკიძესთან დაკავშირება უშედეგოდ ვცადეთ. სტატიის გამოქვეყნების შემდეგ დავით ცირეკიძე სამინისტროს პრესსამსახურის საშუალებით დაგვიკავშირდა და საქმეზე “საზოგადოების მაღალი ინტერესიდან” გამომდინარე, მცირე ინტერვიუც მოგვცა.
_ ბატონო დავით, თქვენთან დაკავშირება პრობლემა გახდა…
_ რატომ?
_ ძველ ნომერზე გირეკავდით და ვიღაც ზაზამ გვიპასუხა, რომ ეს ნომერი თქვენი აღარ იყო.
_ ის ნომერი გაუქმებულია და იმიტომ.
_ ინტერვიუს ტყუილით ვიწყებთ, რადგან იმ ზაზამ გვითხრა, რომ თქვენ აჩუქეთ ტელეფონის ნომერი…
_ გისმენთ, კითხვები გქონიათ…
_ ბატონო დავით, მამუკა მგალობლიშვილი ამბობს, რომ გურიის სამხარეო პოლიციის მთავარი სამმართველოს უფროსობისას ყაჩაღობას სთავაზობდით. ეს სასამართლო პროცესზე კი თქვა. მგალობლიშვილის თქმით, 40 000-ლარიანი საქმე შესთავაზეთ და მან პროცესზე თქვენთან დაპირისპირებაც კი მოითხოვა.
_ ეს არის დიდი სიცრუე, როცა ასეთ ბრალდებას მიყენებს. დღეს, საბედნიეროდ, მადლობა ღმერთს, ქვეყანაში შეიცვალა სიტუაცია და არსებობს სისტემა _ პროკურატურის, არსებობს საგამოძიებო ორგანოები, რომლებიც ამ ყველაფერს დაადგენენ. არსებობს საქმე, რომელშიც არის იმის ძალიან ბევრი მტკიცებულება, რომ მაგ პიროვნებასთან მასეთი შეთავაზება არ მქონია და სამართლიანად იხდის სასჯელს. ამასთან დაკავშირებით თუკი ვინმე რაიმე პრეტენზია გააჩნია და კითხვები აქვს, შეუძლია მიმართოს მთავარ პროკურატურას. სამართლებრივად მზად ვარ საგამოძიებო ორგანოებთან ვითანამშრომლო, თუკი ამის საჭიროება გახდება.
_ მამუკა მგალობლიშვილს თქვენ რამდენჯერმე შევხვდით, მათ შორის ჩოხატაურში მდებარე ერთ-ერთ სახერხ ქარხანაში და ამის მოწმეებიც არსებობენ…
_ მე საერთოდ არ ვიცნობ მამუკა მგალობლიშვილს, თუ არ ჩავთვლით იმას, რომ ეგ ადამიანი მოხვდა ჩვენი დაინტერესების სფეროში, როგორც კრიმინალი. მაგ საქმეზე რამდენიმე თვის განმავლობაში ვმუშაობდი. არსებობს საქმეში საკმარისი მტკიცებულებები, რომელიც ადასტურებს მგალობლიშვილის ბრალეულობას და იმას, რომ არის დამნაშავე იმ საქმეში, რისთვისაც იხდის სასჯელს.
_ ბატონო დავით, პოლიციის სისტემაში საკმაოდ გამოცდილი კადრი ხართ. იქნებ, აგვიხსნათ რატომ უნდა გააკეთოს ადამიანმა საკუთარი თავის მაკომპრომიტირებელი ჩანაწერი?
_ მე მაგას ვერ აგიხსნით(?!). არსებობს ყველა მტკიცებულება სისხლის სამართლის საქმეში. არის პროკურატურა, რომელმაც გამოიძია ეს საქმე, არსებობს სასამართლო, რომელმაც მიუსაჯა და შეგიძლიათ ეს ყველაფერი პროკურატურის მეშვეობით გავარკვიოთ. ეს არის მაქსიმუმი, რასაც გეუბნებით და ამის მეტს ვერაფერს ვერ გეტყვით.
_ სულ ცოტა ხნის წინ მითხარით, რომ მადლობა ღმერთს არსებობს უკვე პროკურატურის სისტემაო. თქვენი სიტყვებიდან გამომდინარე, იმ დროს, როცა მგალობლიშვილი დააკავეს, სხვანაირი პროკურატურა იყო. ამ საქმემაც იმ პროკურატურის ხელში გამოიარა. ნიშნავს თუ არა ეს, რომ საქმეში არსებულ მტკიცებულებებს არ შეგვიძლია ვენდოთ?
_ მეტს ვერაფერზე გიპასუხებთ. კითხვები თუ ექნება ჩემთან საგამოძიებიო ორგანოებს, მზად ვარ ვითანამშრომლო და მაქსიმალურად გავცე პასუხი.
_ ბატონო დავით, სულ არ გეუხერხულებათ ახალ მთავრობასთან მუშაობა? თქვენ ხომ იმ დროის ჩინოვნიკი ხართ, როცა დღევანდელ ხელისუფლებას დევნიდნენ? _ ამ კითხვაზე ცირეკიძემ პასუხის გაცემა აღარ ისურვა.
