“გურია ნიუსი” იუსტიციის უმაღლესი საბჭოს ოფიციალურ ვებ-გვერდზე განთავსებულ მოსამართლე გიგაურის ბიოგრაფიას 2013 წლის 16 თებერვალს გაეცნო და წერილშიც გამოიყენა. გამოცემა სწორედ ამ მონაცემებზე დაყრდნობით წერდა ,რომ მოსამართლე გიგაურს უმაღლესი განათლება არ გააჩნდა
“მაია გიგაური დაიბადა 1980 წლის 31 მარტს ქ. მცხეთაში; 1997 წელს დაამთავრა მცხეთის #1 საშუალო სკოლა; 2002 წელს დაამთავრა თსუ ხელოვნებისა და ჰუმანიტარულ პროფესიათა ფაკულტეტი სამართალმცოდნეობის სპეციალიზაციით; 2004-2005 წლებში მუშაობდა თბილისის საოლქო სასამართლოს სისხლის სამართლის კოლეგიის სხდომის მდივნის და მოსამართლის თანაშემწის თანამდებობებზე; 2005-2009 წლებში მუშაობდა თბილისის სააპელაციო სასამართლოში, მოსამართლის თანაშემწის თანამდებობაზე; 2009-2010 წლებში იყო იუსტიციის უმაღლესი სკოლის მსმენელი; 2010 წლის 6 აგვისტოს დაინიშნა სოხუმისა და გაგრა-გუდაუთის რაიონული სასამართლოს მოსამართლედ; ამავე პერიოდიდან მოსამართლის უფლებამოსილებას ახორციელებს რუსთავის საქა¬ლაქო სასამართლოში.”-ეს გიგაურის ბიოგრაფიის პირველი ვერსიაა,რომელიც ამტკიცებს რომ საშუალო სკოლადამთავრებულმა გიგაურმა პირდაპირ თსუ-ს ხელოვნებისა და ჰუმანიტარულ პროფესიათა ფაკულტეტს მიაშურა და სამწლიანი კურსი გაიარა.
მოსამართლის ბიოგრაფიის ჩასწორებული ვარიანტი კი ასე გამოიყურება:
“მაია გიგაური დაიბადა 1980 წლის 31 მარტს ქ. მცხეთაში.
1997 წელს დაამთავრა მცხეთის №1 საშუალო სკოლა.
2001 წელს დაამთავრა ივანე ჯავახიშვილის სახელობის თბილისის სახელმწიფო უნივერსიტეტის აღმოსავლეთმცოდნეობის ფაკულტეტის ბაკალავრიატის სრული კურსი, ხოლო 2003 დაამთავრა ამავე ფაკულტეტის მაგისტრატურის სრული კურსი და მიენიჭა ფილოლოგიის მაგისტრის აკადემიური ხარისხი.
პარალელურად, 2002 წელს დაამთავრა ივანე ჯავახიშვილის სახელობის თბილისის სახელმწიფო უნივერსიტეტის ხელოვნებისა და ჰუმანიტარულ პროფესიათა ფაკულტეტი სამართალმცოდნის სპეციალობით.
2004-2005 წლებში მუშაობდა თბილისის საოლქო სასამართლოს სისხლის სამართლის კოლეგიის სხდომის მდივნის და მოსამართლის თანაშემწის თანამდებობებზე.
2005-2009 წლებში მუშაობდა თბილისის სააპელაციო სასამართლოში, მოსამართლის თანაშემწის თანამდებობაზე.
2009-2010 წლებში იყო იუსტიციის უმაღლესი სკოლის მსმენელი.
2010 წლის 6 აგვისტოს დაინიშნა სოხუმისა და გაგრა-გუდაუთის რაიონული სასამართლოს მოსამართლედ.
ამავე პერიოდიდან მოსამართლის უფლებამოსილებას ახორციელებდა რუსთავის საქალაქო სასამართლოში.
2012 წლის ოქტომბრიდან არის რუსთავის საქალაქო სასამართლოს მოსამართლე.”
მოსამართლის ბიოგრაფიაში ცვლილების აღმოჩენის შემდეგ “გურია ნიუსი” იუსტიციის უმაღლესი საბჭოს პრესსამსახურის ხელმძღვანელ ნათია ვასაძეს დაუკავშირდა. ვასაძე ამბობს, რომ მოსამართლეთა ბიოგრაფიები მუდმივად განახლების რეჟიმშია და გიგაურის შემთხვევა სულაც არ უკავშირდება “გურია ნიუსში” მის შესახებ გასულ ინფორმაციას.
“იცი რა, ეხლა გადავხედე ავტობიოგრაფიას და ძველ ავტობიოგრაფიაში ერთადერთი არ იყო ის, რომ გიგაურმა ჯავახიშვილში დაამთავრა აღმოსავლეთმცდნეობის ფაკულტეტი. საქმე იმაშია, რომ ჩვენს საიტზე მუდმივად ხდება ავტობიოგრაფიების განახლება, როცა მოსამართლე გადაყავთ სხვა სასამართლოში,ზოგს შეიძლება შეეძინოს მეოთხე შვილი და ისიც ხომ უნდა დავამატოთ? მაია გიგაური დაგვიკავშირდა და რადგანაც მისი განათლების შესახებ გამორჩენილი იყო რაღაც, გვთხოვა ჩაგვემატებინა”_ განაცხადა ნათია ვასაძემ.
აღსანიშნავია, რომ მაია გიგაური ამ დროისთვის არც სხვა სასამართლოში გადაუყვანიათ და არც მეოთხე შვილი შესძენია, ასე რომ ძნელი გამოსაცნობი არ არის რამ გამოიწვია გიგაურის ბიოგრაფიის განახლება სწორედ მაშინ, როდესაც მის დიპლომთან დაკავშირებით დიდი აჟიოტაჟია ამტყდარი.
აღსანიშნავია, რომ იუსტიციის უმაღლესი საბჭოს ვებგვერდზე მონაცემების გადაკეთების ან ჩამატების შემთხვევები არაერთია. მაგალითად, ახალგაზრდა იურისტთა ასოციაციამ იუსტიციის უმაღლესი საბჭოს შესახებ მომზადებული მონიტორინგის სამუშაო ვერსია, სადაც საუბარი იყო რომ საბჭო არ ასაჯაროვებდა გადაწყვეტილებებს მოსამართლეთა დისციპლინური სახდელების შესახებ, წინასწარ გადაუგზავნა იუსტიციის საბჭოს. რამდენიმე დღეში საიამ მონიტორინგის შედეგების პრეზენტაცია გამართა, სადაც საბჭოს მდივანმა ვალერი ცერვაძემ განაცხადა რომ კრიტიკას ვერ მიიღებდა რადგან აღნიშნული გადაწყვეტილებები მათ კანონის შესაბამისად განათავსეს ვებგვერდზე. როგორც გაირკვა, მონიტორინგის სამუშაო ვერსიის წაკითხვისთანავე, საბჭომ სახალხოდ გაკრიტიკებისგან თავი დაიზღვია და მონაცემები გაასაჯაროვა.
დაახლოებით ანალოგიურ შემთხვევას ჰქონდა ადგილი, როდესაც იუსტიციის საბჭოს მდივანი ვალერი ცერცვაძე “გურია ნიუსის” ჟურნალისტს უმტკიცებდა, რომ ინფორმაცია სააპელაციო თავმჯდომარის პოსტზე მისი მეორე ვადით არჩევასთან დაკავშირებით ოფიციალურად გამოქვეყნდა მათსავე საიტზე. ჟურნალისტმა მსგავს ინფორმაციას ვერსად მიაგნო. ინფორმაცია იუსტიციის საბჭოს ვებგვერდზე მხოლოდ მას შემდეგ დაიდო, რაც “გურია ნიუსზე” გამოქვეყნდა.
