სამეგრელოში, ახალაიებსა და გუბერნატორ გოროზიას შორის გავლენების გადანაწილება გაუთავებლად მიმდინარეობს. ჩვენი წყაროს ინფორმაციით, თუ ადრე ფოთზე კონტროლს გუბერნატორი ახორციელებდა (მის კადრად მიიჩნევდნენ ქალაქის ყოფილ მერსა და ახლა საკრებულოს თავმჯდომარე ვანო საღინაძეს), ახლა თანდათან როლანდ ახალაიას გავლენა მძლავრობს. სწორედ სამეგრელო-ზემო სვანეთის პროკურორის კადრად თვლიან ქალაქ ფოთის მოქმედ მერს, გოჩა ლემონჯავას.
წყარო იმასაც ამბობს, რომ ზაზა გოროზიას არცთუ კარგი ურთიერთობა აქვს საქართველოს ფეხბურთის ფედერაციის ზუგდიდელ პრეზიდენტთან ზვიად სიჭინავასთან და მათ შორის შავმა კატამ კარგა ხნის წინ გაირბინა. როგორც საფეხბურთო-პოლიტიკური წყაროები ამბობენ, მათ შორის “ცივი ომი” მას შემდეგ დაიწყო, რაც ჯერ კიდევ ბიზნესმენი და ზუგდიდის “ბაიას” მეპატრონე სამეგრელოს მომავალ გუბერნატორად დასახელდა. ჩვენ მაშინ ვწერდით, რომ სახელისუფლებო კულუარებში გოროზიას სიჭინავათი ჩანაცვლება განიხილებოდა. მაშინ ეს ჩანაცვლება არ მოხდა, რასაც, შესაძლოა, ხელი საქართველოს ეროვნული საფეხბურთო ნაკრების წარუმატებლობამ და ნოდარ ახალკაცის გადადგომამ შეუწყო. ზვიად სიჭინავა გუბერნატორობაზე უფრო ფედერაციის პრეზიდენტად ამჯობინეს და “დანიშნეს” კიდეც.
სიჭინავასა და გოროზიას შორის “ომი” ზუგდიდურ კლუბში მომხდარი საკადრო ცვლილებებით გაგრძელდა. მართალია, სიჭინავა ირწმუნება, რომ სფფ-ის პრეზიდენტობის შემდეგ “ბაიას” ხელმძღვანელი აღარ არის და მის საქმიანობაში არ ერევა, მაგრამ ფაქტია, რომ სიჭინავა თავის მიერ შექმნილ და დაფუძნებულ-დაფინანსებულ კლუბს ასე იოლად არ დათმობს. მოკლედ, “ბაიას” მთავარი მწვრთნელი მოუხნეს _ ბესიკ შეროზიას თანამდებობის დატოვება მოუხდა. როგორც წყარო ამბობს, იგი გოროზიამ ფოთში სპეციალურად გადაიყვანა.
ამასთან დაკავშირებით, საფეხბურთო-პოლიტიკურ კულუარებში ორი ვერსია ვრცელდება: პირველის თანახმად, შეროზია გოროზიას კადრად მიიჩნეოდა და სიჭინავამ სპეციალურად მოხსნა; მეორე ვერსიით, “ინტრიგა” არა სიჭინავამ, არამედ გუბერნატორმა ჩააგდო: გოროზიამ სიჭინავას მიერ მოხსნილი შეროზია ფოთის “კოლხეთში” გადაიყვანა და სიჭინავა-“ბაიას” ჯინზე იდეალური პირობებიც შეუქმნა. ფოთელებს ნახევარმილიონიან დაფინანსებას ჰპირდებოდნენ და ეს ზუსტად გუბერნატორის დამსახურება იქნებოდა. ასეთი დაფინანსება “კოლხეთს” მას შემდეგ არ ჰქონია, რაც ფოთის პორტმა კლუბის დაფინანსებაზე ხელი აიღო. ამაში კი ზურაბ ნოღაიდელის ხელს ხედავდნენ _ მაშინ ითქვა, რომ იმ დროს პრემიერმა ნოღაიდელმა პორტის უფროსობა წერილობით გააფრთხილა, ფეხბურთის კლუბს ნუ დააფინანსებთ, თორემ საქმე ცუდად წაგივათო.
ისევ ფოთს და გოროზია-ახალაიას დავუბრუნდეთ. როგორც ჩანს, მერად ვახტანგ ლემონჯავას მოსვლის შემდეგ, მართლაც შემცირდა გუბერნატორის გავლენები უფროსი ახალაიას სასარგებლოდ. შედეგად, დაპირებული ფულიც არ გამოჩენილა და შეროზიაც იძულებული გახდა გუნდიდან წასულიყო. გოროზიაც აღარ გამოჩენილა ფოთის მთავარ სტადიონზე. არადა, დასაწყისში მხურვალედ ქომაგობდა “კოლხეთს”.
დღეს უკვე ფოთელთა სტადიონზე როლანდ ახალაია გამოჩნდა, რამაც ხალხს ეჭვების საფუძველი მისცა _ სად ახალაია და სად ფეხბურთი, ანაც ფოთი და “კოლხეთი”?! ბატონ როლანდს გვერდს არა საღინაძე, არამედ მერი ლემონჯავა უმშვენებდა. აღარ შევუდგებით იმაზე საუბარს, თუ როგორ ქომაგობდა “თავისიანებს” ახალაია (სამართლიანობა მოითხოვს აღინიშნოს, რომ უფროსი ახალაია, ბევრი ჩინოსნისგან განსხვავებით, სამართლიანი და არატენდენციური ქომაგი აღმოჩნდა). მთავარი ისაა, რომ სტადიონზე მისვლით მან დაადასტურა, რომ ფოთში საკუთარი ინტერესები აქვს. გავლენიანმა ჩინოსანმა შუა თამაშისას ფოთში მოღვაწე, წარმოშობით სენაკელ ბიზნესმენს, ზურაბ ცომაიას 500-ლარიანი ჯილდო სიცილ-სიცილით სახალხოდ “თხოვა”: “ზურა, ვისკზე ხომ მპატიჟებდი დღეს? მე დაბალფასიანსაც ვსვამ, მაგრამ შენი ამბავი რომ ვიცი, თავს გამოიდებ და 300-ლარიანზე ნაკლებს არ გამოიტან. 2 ბოთლი ხომ უნდა დავლიოთ? ჰოდა, ჩათვალე, რომ დამპატიჟე და 500 ლარი პრემია იმ ბიჭს გადაეცი (“კოლხეთის” მეკარეზე მიანიშნა, რომელიც საუკეთესოდ თამაშობდა), ნამდვილად ეკუთვნის,” _ უთხრა ბიზნესმენს ახალაიამ.
ჩვენი წყაროს თქმით, ბიზნესმენმა პრემია მართლაც გადასცა მობურთალს: _ აბა, სამეგრელოში მოღვაწე ბიზნესმენი ახალაიას “გადაგდებას” გულში როგორ გაივლებდა?! _ გვითხრა წყარომ.
