_ “გურია ნიუსში” ამ სათაურით გამოქვეყნებულ წერილს რესპუბლიკური პარტიის წარმომადგენელი, ოზურგეთის მაჟორიტარი დეპუტატის ბიუროს ხელმძღვანელი მარინე სუნგულია გამოეხმაურა.
_ მინდა, ბატონ კოტე შარაშენიძეს რამდენიმე განმარტება შევთავაზო, კერძოდ, ჩემთან დაკავშირებული ამონარიდი პუნქტობრივად განვიხილო და ბატონ კოტეს საყვარელი გამონათქვამებისა არ იყოს, საზოგადოებას მივანდო დასკვნის გამოტანა.
“ქალბატონი მარინე სუნგულიას მხრიდან, რაღაც უაზრო აგრესიები წამოვიდა. ის უაზროდ ჩაერია ჩემს ფუნქციებში, მაჟოროტარი დეპუტატის ბიუროს სახელით უამრავ პრობლემებს მიქმნის…” _ მინდა ბატონ კოტეს შევახსენო, რომ თუ მე სოფლის პროგრამებთან დაკავშირებული საკითხების შესწავლა საზოგადოების მოთხოვნის შესაბამისად დავიწყე, ეს უაზრო აგრესია არ არის. ეს არის ჩემი, როგორც მოქალაქის უფლება, ხოლო როგორც დეპუტატის ბიუროს ხელმძღვანელის _ ვალდებულება. თუ არსებობს საფუძვლიანი ეჭვი დანაშაულებრივი საქმიანობისა საჯარო მოხელის მხრიდან, ვითხოვთ ამ ეჭვის გაქარწყლებას ან დამნაშავე პირთა ადეკვატურ პასუხისმგებლობას.
საინტერესოა, რატომ განიცდის ასე მწვავედ და აღიქვამს, როგორც აგრესიას, ჩემს დაინტერესებას, წინა ხელისუფლების მიერ გახორციელებულ ქმედებებზე? რატომ გადაეფარა ამბრაზურასავით ახალი გამგებელი “ნაციონალური მოძრაობის” მიერ წახალისებულ ამა თუ იმ პროცესს?
რაც შეეხება მაჟორიტარი დეპუტატის ბიუროს, ის იმისთვის არსებობს, რომ საზოგადოებას მიეცეს საშუალება, მოგვმართოს ამა თუ იმ საკითხზე, პრობლემების გადასაჭრელად. ეს პრობლემად კი არ უნდა აღიქვას ბატონმა კოტემ, გამგებლის მოვალეობის შემსრულებელმა, არამედ თვითონაც დაინტერესება და მზადყოფნა უნდა გამოხატოს ხალხის მიერ დასმული შეკითხვების პასუხის გასაცემად.
კერძოდ, რატომ დაინგრა ძველი, ისტორიული პირველი სასულიერო სასწავლებლის შენობა? თუ მე და ოზურგეთელები ამ საკითხით დავინტერესდებით, რატომ არის კოტე შარაშენისათვის იგი “უაზრო აგრესია?” “უაზრო აგრესია” შეიძლება იყოს იმ კითხვაზე პასუხის მოთხოვნა _ რატომ დაგვანგრიეს თავზე წარსული და ისტორია? აქედან გამომდინარე, რთული წარმოსადგენია, “რომელ ფუნქციაში ჩავერიე უხეშად”?!
კოტე შარაშენიძე არ უნდა აღიქმებოდეს, როგორც წინა ხელისუფლების ფარი და აბჯარი. ის ამ დანიშნულების შესასრულებლად არ მოგვიაზრებია გამგებლის პოსტზე თავის დროზე.
რაც შეეხება ჩემ მიერ შერჩეული კანდიდატების თავს მოხვევას, ისინი არა მარტო მე, არამედ კოალიციაში შემავალმა ყველა პარტიამ შეარჩია საარჩევნოდ, ანდო მათ საპასუხისმგებლო და იმ დროისთვის რისკის მატარებელი საქმე _ აქტიური მონაწილეობა წინასაარჩევნო პერიოდში, მხარდამჭერების კონსოლიდაცია, უბნებისა და ხმების დაცვა. ოზურგეთში “ქართული ოცნების” ეფექტური გამარჯვება სწორედ ე. წ. “კანდადატების” შემართებამ და საკუთარ უბნებში თუ საზოგადოებაში რეპუტაციამ განაპირობა. ბატონი კოტე ხალხის იგნორირებით უსამართლობის განცდას არ უნდა ნერგავდეს საზოგადოებაში. მე არ მინდა იმ მოარული ფრაზის დაჯერება, რომ გამგებლის მოვალეობის შემსრულებელი “ნაციონალებთან” “ხორუმს” ცეკვავს და “ოცნების” გასამარჯვებლად თავდადებულთ, მტრებად აღიქვამს. აქვე განვმარტავ: ეს არა მხოლოდ რესპუბლიკური პარტიის წევრებს ეხებათ, არამედ ყველა იმ ადამიანს, რომელთაც ბრძოლა საკუთარი სიცოცხლისა თუ ოჯახების რისკის ფასად გასწიეს; არ აქვს მნიშვნელობა იმას, ისინი კოალიციაში შემავალ რომელ პარტიას მიეკუთვნებიან. დამარცხების შემთხვევაში, ყოველი მათგანი საკუთარი თავით აგებდა პასუხს და ეს გათვითცნობიერებული ჰქონდათ, ხოლო გამარჯვების შემთხვევაში მათი იგნონირება, ჩაგვრის ტოლფასია. ისეთი განცდაა, თითქოს ეს ხალხი დაისაჯა, მაგრამ რატომ კოალიცია “ქართული ოცნების” შტაბის უფროსის ხელით, გაუგებარია.
მე შევთავაზე ბატონ კოტეს, რომ მისი მეთოდებით კი არა, ანუ სოფლის მაღაზიებსა და მოსაცდელებში (ეს მისი სიტყვებია) კი არ უნდა ვეძებოთ დასანიშნი რწმუნებულები, არამედ კოალიციის აქტივისტთა აზრი გავითვალისწინოთ. ამგვარად, ბატონი კოტეს დამოკიდებულება სწორედ რომ საეჭვოა და სანამ იმის ამოცნობაში დავხარჯავთ დროს, რა განზრახვა აქვს ბატონ კოტეს გულში, კარს ადგილობრივი არჩევნები მოგვადგება, სადაც ერთ მხარეს ბატონი კოტე “ნაციონალების” და ე.წ. “მუქი ფერის მოყვარული” ბიჭები იქნებიან, ხოლო მეორე მხარეს ის ძალა, რომელიც უკვე ამდენი წელია ერთი და იგივეს _ უსამართლობას ებრძვის.
მარინე სუნგულია,ოზურგეთის მაჟორიტარი დეპუტატის ბიუროს ხელმძღვანელი
