“მე როდესაც ამ თემაზე ვსაუბრობ, ყოველთვის ხაზს ვუსვამ, რომ ეს აწუხებს საზოგადოებას. რატომ ვგრძნობ ამას? ვგრძნობ დამოკიდებულებას, რომელიც აქვს ადამიანებს ჩემს მიმართ. ამას ვგრძნობ ზუსტად, მაგალითად, იმ წერილებით, რომელსაც მუდმივად ვიღებ სოციალური ქსელის პირად გვერდზე და სატელეფონო ზარების მეშვეობით. როდესაც ამ თემაზე ვსაუბრობ, ყოველთვის ვუსვამ ხაზს, რომ ნეპოტიზმი არ მოუგონია ბიძინა ივანიშვილს და არც “ქართულ ოცნებას”.
ეს არის, ალბათ, თემა, რომელიც მარტო ჩვენს საზოგადოებას კი არ აწუხებს, ევროპაშიც და ამერიკაშიც აწუხებთ, მაგრამ იქ უფრო მეტი მექანიზმი არსებობს, რომ ადამიანები ამისგან იყონ დაცული. რადგან ეს ჩვენი დემოკრატიული საზოგადოება ახლაც განვითარების პროცესშია, დაცვის მექანიზმები არის ნაკლები. მე ვამბობ, რომ “ნაციონალური მოძრაობის” დროსაც იყო ამის ფაქტები, მაგრამ მე მაწუხებს პრინციპი, არცერთ მაღალ თანამდებობის პირს “ნაციონალურ მოძრაობაში” არასდროს უთქვამს, რომ ეს არის კარგი ფაქტი, როგორც მაგალითად, გვითხრა ბიძინა ივანიშვილმა, რომ ეს არის ქართული ხასიათის დამახასიათებელი ნიშან-თვისება და ამიტომ, რა მოხდა მერე.
_ როგორც ჩანს, ამ ცდუნებისგან თავის დაცვა ყველა ხელისუფლებას უჭირს, თქვენც გიჭირდათ…
_ რა თქმა უნდა, ეს არ არის სწორი ფაქტი, ამისგან თავის დაცვა არის ძალიან ძნელი, მაგრამ მთავარი, რაც მე მაწუხებს, არის ის, რომ გადაიქცა პრინციპად. უკაცრავად, რუსულ სიტყვას მოვიშველიებ, “გაპრავებული” ხდება ეს ამბავი პრემიერ-მინისტრის და შინაგან საქმეთა მინისტრის განცხადებების შემდეგ. მე ეს პრინციპი მაწუხებს, თორემ არ ვამბობ, რომ “ნაციონალურ მოძრაობის” მმართველობის დროს ასეთი ფაქტები არ ხდებოდა.
_ პრემიებზე რა აზრის ხართ, ეს თემაც ყოველთვის არის განსჯის საგანი და თქვენ თუ მიიღეთ პრემია?
_ მე მივიღე პრემია 2012 წლის დეკემბრის თვეში, როგორც პარლამენტის ყველა წევრმა. ვიცი, რომ ამ ბიუჯეტში უკვე გადანაწილებული უნდა იყოს ეს პრემიები ხელფასებზე და ალბათ, ასეთი ტიპის პრემიები აღარ იქნება, ხელფასებზე გადანაწილდა.
მე არ მგონია, რომ პარლამენტარების პრემიები მოხვდა ვინმეს თვალში. მე მგონია, რომ ის ოთხჯერადი პრემიები, რომელიც გამოაქვეყნეს, თუნდაც სახელმწიფო კანცელარიაში, აქედან დაიწყო ამბავი. გეთახმებით, რომ უხერხულია, სახელმწიფოში, სადაც ბავშვი შიმშილით კვდება, აიღო პრემია. მაგრამ მე არც წინააღმდეგი ვარ, რომ თუ ვინმემ პრემია აიღო, ამის გამო ჯოხით გამოვეკიდოთ.
_ წინა ხელისუფლების დროსაც უამრავი ფაქტი იყო, როდესაც მოსახლეობა ხელისუფლებისგან დახმარებას ითხოვდა, მაგრამ რეაგირება არ ხდებოდა.
_ მე კომენტარი ჩემს პრემიაზე გავაკეთე. არ შეიძლება, ეს პრემია იყოს გადაჭარბებული, რაღაც ზომას გადაცილებული. მითუმეტეს, იმ ხელისუფლებისგან, რომელიც წინა ხელისუფლების ყველა თეთრს ითვლიდა და დღეს, თითქმის, ერთ თვეში ოთხჯერ იღებს პრემიას.
