საქართველოს შრომის, ჯანმრთელობისა და სოციალური დაცვის სამინისტროს ინფორმაციით, მკვეთრად გამოხატული შშმ პირთა (I ჯგუფის ინვალიდები) პენსია 100 ლარიდან გაიზრდება 125 ლარამდე. პენსია ეზრდება 21 912 პენსიონერს. აპრილში დამატებით გადასარიცხი იქნება 547 900 ლარი.
1 აპრილიდან ძალოვანი პენსიონერებისთვის და სამოქალაქო ავიაციის მომსახურეთა სახელმწიფო კომპენსაციის ოდენობა გადაანგარიშდება, რისთვისაც ბიუჯეტში 19 მლნ ლარია გათვალისწინებული. სახელმწიფო კომპენსაციის გადაანგარიშება- მატება შეეხო12 500 პირს, აპრილში დამატებით გადასარიცხი იქნება დაახლოებით 1 800 000 ლარი; სულ აპრილში, ზემოთ აღნიშნული ღონისძიებებისათვის ბიუჯეტიდან დამატებით გადასარიცხი თანხა შეადგენს 5 267 660 ლარს.
სამინისტროს პრესსამსახურის ინფორმაციით, 1 ივლისიდან სიღარიბის ზღვარს ქვემოთ მყოფი ოჯახებისთვის (57 ათას ქულამდე მყოფი), ანუ სოციალურად დაუცველი ოჯახის პირველ წევრზე 30 ლარის ნაცვლად გაიცემა 60 ლარი. ხოლო ოჯახის ყოველ მომდევნო წევრზე, არსებული 24 ლარის ნაცვლად გაიცემა 48 ლარი; 2013 წლის1 სექტემბრიდან ყველა პენსიონერისა და პირველი ჯგუფის ინვალიდის პენსია 125 ლარიდან გაიზრდება 150 ლარმდე; შშმ ბავშვთა და II ჯგუფის ინვალიდობის პენსია70 ლარიდან გაიზრდება 100 ლარამდე; მარჩენალდაკარგულების და პოლიტრეპრესირებულების პენსია 55 ლარიდან გაიზრდება 100 ლარამდე.
რაც შეეხება რეგრესის პენსიებს, ანუ შრომითი მოვალეობის შესრულებისას დასახიჩრებულთა პენსიებს, ის წინა მთავრობის მიერ გაიცემოდა მხოლოდ 2007 წლის 1 მარტამდე. 2013 წლის ბიუჯეტში გათვალისწინებულია შესაბამისი რესურსები რეგრესული პენსიის გასაცემად და ეს პროცესი დაიწყება აპრილის თვიდან.
2013 წლის ბიუჯეტის თანახმად, საქართველოს შრომის, ჯანმრთელობის და სოციალური დაცვის სამინისტროს ბიუჯეტი 2 345 000.0 (ორი მილიარდ 345 მილიონ) ლარს მოიცავს.
_ თუკი 2011 წელს სოციალური დაცვისა და საპენსიო უზრუნველყოფისთვის გამოყოფილი იყო 1 მილიარდ 281 მილიონ 301 ათასი ლარი, ხოლო 2012 წელს 1 მილიარდ 379 მილიონ 602 ათასილარი, 2013 წლის ბიუჯეტში სოციალური დაცვისა და საპენსიო უზრუნველყოფისთვის გამოყოფილია 1 მილიარდ 654 მილიონი722 ათასი ლარი, _ აღნიშნულია სამინისტროს მიერ გავრცელებულ განცხადებაში.
