რატომ უნდა გადაიხადოს, იუსტიციის სამინისტროს მიერ არასწორად გაცემულ პირადობის მოწმობაში მოქალაქეებმა 30 ლარი და რა გახდა 9 წლის წინ გაცემული პირადობის მოწმობის შეცვლის მიზეზი, ამასთან დაკავშირებით “გურია ნიუსი” სახელმწიფო სერვისების განვითარების სააგენტოს, ზუგდიდის სამსახურის უფროსს ლაშა ტყებუჩავას დაუკავშირდა.
“ეს არის არასწორი ინფორმაცია. მოსახლეობის ნაწილზე არ არის საუბარი. წერილი მიუვიდათ იმ მოქალაქეებს, რომლებსაც პირადობის მოწმობა ჰქონდათ არასწორი მისამართით და ვთხოვეთ, რომ სწორი პირადობის მოწმობა მიეღოთ, რადგან შემოვიდა განცხადებები იმ სახლის მფლობელების მხრიდან, ვის საკუთრებაშიც არის ის სახლი, სადაც მას მისამართად აქვს მითითებული კონკრეტული მისამართი. ეს ჩვენი ყოველდღიურ საქმიანობაა.”
_ პირადობის მოწმობაზე აღნიშნული არასწორი მისამართის გადამოწმება, რომელიც თქვენივე უწყების მიერ არასწორად არის გაცემული, ხომ არ უკავშირდება 2013 წლის საპრეზიდენტო არჩევნებს?
_ არა, არ უკავშირდება. უბრალოდ… მაგალითად, პირადობის მოწმობაში თქვენ გაქვთ ჩემი მისამართი. ბუნებრივია, თქვენი გადასახადი მომდის მე. ასე რომ, მე მიჩნდება უფლება მივმართო სამოქალაქო რეესტრს, პირი რომელიც არასწორად არის მიწერილი ამოვწერო სახლიდან. საუბარია მოქალაქეთა ნაწილზე, ვისაც არასწორი მისამართი აქვს. ამას ჰქვია “საცხოვრისის მესაკუთრის”, ან ფიზიკურ პირთა განცხადება და მოთხოვნა რეგისტრაციის თაობაზე.
როდესაც, ბატონ ლაშას მათი უწყებიდან ბ.კ. მისული წერილზე ვკითხეთ, განგვიმარტა, რომ “აღნიშნულ წერილში მას უწერია მისამართი, რომელზეც არსებობს კერძო საცხოვრებელი სახლი. ასევე ამ სახელით არის კორპუსის სახლის მისამართიც. თუ იქ ცხოვრობთ, უნდა გეწეროთ ბინის ნომერი. ბ.კ. პირადობის მისამართზე არ წერია ბინის ნომერი. უბრალოდ ვთხოვთ, წარმოგვიდგინოს პირადობის მოწმობა. შეიძლება რამე შეცდომაა. ჩვენ თვითონ გავარკვევთ მაგრამ, თუ თქვენ არასწორად გაქვთ პირადობის მოწმობა გეუბნებით, რომ სწორად აიღეთ პირადობის მოწმობა.”
რა ღირს ახალი პირადობის მოწმობის აღება, ამასთან დაკავშირებით ტყებუჩავა “გურია ნიუსთან” აცხადებს: “თუ მოქალაქეს არასწორი პირადობის მოწმობა აქვს ხელზე. ე.ი. არასწორი მისამართით მიღებული და სურს გამოცვალოს პირადობის მოწმობა, სოციალურად დაუცველებისთვის არის უფასო. ხოლო, ვისაც არ აქვს სარეიტინგო ქულა 70 000-ზე ნაკლები, ახალი ელექტრონული პირადობის მოწმობაში გადაიხდის 30 ლარს.”
_ იმ ადამიანებმა, რომლებსაც თქვენი უწყების მიერ გაცემულ პირადობის მოწმობაში არასწორი მისამართი უწერიათ, მაგრამ, არ აქვთ ახალი ელექტრონული პირადობის მოწმობისთვის ასაღები 30 ლარის გადახდის საშუალება, რა უნდა ქნან?
_ მათ შეუძლიათ არ აიღონ პირადობის მოწმობა. წერილში ყველაფერი განმარტებულია. პირიქით, ჩვენ წერილს გიგზავნით, რომ თქვენი რეგისტრაციიდან მოხსნის შესახებ განცხადება შემოვიდა ჩვენს სამსახურში. უბრალოდ გაფრთხილებთ, გეუბნებით, მოდით ჩვენთან, იქნებ გვატყუებს ის მოქალაქე, ვინც წერს ამ განცხადებას. ეს ჩვეულებრივი ადმინისტრაციული წარმოებაა. ყველგან ასე ხდება. ჩვენ, თქვენი ინტერესებიდან გამომდინარე გეუბნებით.
_ ბატონ ლაშა, ეს არასწორი მისამართით გატარებული პირადობა, თქვენს მიერ არის გაცემული.
_ ჩემი პერიოდი არაფერ შუაშია. აქ თუ საქმე ეხება მეორეს ფაქტორს, რატომ აქვს მას არასწორი მისამართი, ადგილზე დადგინდება. ტელეფონით ხომ არ შეიძლება ეს განიმარტოს?
მართალია, ლაშა ტყებუჩავა აცხადებს, რომ ეს შეცდომა წინამორბედი ხელმძღვანელობის პერიოდში მოხდა, მაგრამ ეს არ არის შეღავათი იმ ადამიანებისთვის, რომლებიც უსახსრობის გამო, შესაძლოა პირადობის მოწმობის გარეშე დარჩნენ.
“გურია ნიუსის” კითხვაზე, _ ვისი განკარგულებით ახდენთ ამ აქტივობას, ლაშა ტყებუჩავა აცხადებს:
“ეს რესპუბლიკის მასშტაბით ხორციელდება. ყველა ტერიტორიული სამსახური ახორციელებს. ეს სამსახურის ფუნქციაა მესაკუთრის, ან ფიზიკური პირის განცხადებაზე რეაგირება გააკეთოს. თუ თქვენ, კონკრეტულად სისტემაზე გაინტერესებთ როგორ, რა პროცედურები, ჩვენს პრესსამსახურს დაუკავშირდით.”
“გურია ნიუსი” ამ თემასთან დაკავშირებით, სახელმწიფო სერვისების განვითარების სააგენტოს პრესსამსახურს, ეკა მამალაძეს დაუკავშირდა, რომელსაც ტელეფონი გამორთული აქვს. როგორც კი “გურია ნიუსი” ქალბატონ ეკას დაუკავშირდება ამ თემაზე სახელმწიფო სერვისების განვითარების სააგენტოს კომენტარს შემოგთავაზებთ.
