მას პასუხი გამგებლის მოვალეობის შემსრულებელმა, ზაზა ურუშაძემ გასცა. თუმცა ამის შემდეგ რედაქციას კახაბერ ასკურავა თავად დაუკავშირდა და ზაზა ურუშაძის კომენტარს გამოეხმაურა. ჩვენ საშვალებას ვაძლევთ მკითხველს მოისმინოს ორივე მხარის ურთიერთბრალდებები და არგუმენტები:
კახაბერ ასკურავა: “წავიკითხე ბატონი ზაზას კომენტარი და მინდა ვთქვა, რომ მან არ იცოდა ამ პროგრამის არსებობის თაობაზე, რაც ინტერნეტის საშუალებით ჩემივე წყალობით გახდა ცნობილი. მერე მოიკითხა და ნახა, რომ ამ პროგრამას ჰქონდა ძალიან დიდი მხარდაჭერა და სერიოზული საქმე აქვს გაკეთებული. გამგებელმა გადაწყვიტა უკვე გაუქმებულის უკან შემობრუნება მას შემდეგ, რაც ეს თქვენ, ჟურნალისტებმა გახადეთ საჯარო. მოხდა ქალბატონი მზია კვირკველიასთვის შტატში ჩასმის და ამ საქმის გაგრძელების შესახებ ინფორმაციის მიწოდება. რაც შეეხება იმას, რომ იქ მკვდარი სულები იყვნენ დარეგისტრირებული, სისულელეა!
“გურია ნიუსში” ზაზა ურუშაძე აცხადებს, რომ წინა ხელისუფლებამ ლანჩხუთი შეჭამაო! ძალიან ცუდია, რომ ცილისწამების გამო დასჯა ამოღებულია ქართული კანონმდებლობიდან. წინააღმდეგ შემთხვევაში მე აუცილებლად პასუხს ვაგებინებდი მას. ერთი ფაქტი დამისახელოს, რომ კახა ასკურავამ ხალხის, ან ბიუჯეტის ფული, თუნდაც ერთი ლარი მოიხმარა! კონკრეტულად, კახა ასკურავაზე მაქვს საუბარი, სხვაზე პასუხს არ ვაგებ! კახა ასკურავას სახლიდან მოუტანია, მაგრამ სახლში არაფერი წაუღია! ამას მთელი რაიონის და რეგიონის გასაგონად ვამბობ! რაც შეეხება მამათს და სასაფლაოებს, უკვე ექვსი წელია საჯარო სამსახურში ვარ და ჩემი დამარხვა ესე ადვილი არ არის, თორემ კარგა ხნის წინ ვიქნებოდი დამარხული.”
ზაზა ურუშაძე ასკურავას ასე პასუხობს: “კარგად ვიცნობდი ამ პროგრამას. გაუგებრობა, რომელიც შეიქმნა ჩემსა და მზია კვირკველიას შორის, გამოიწვია იმან, რომ როდესაც შტატგარეშე სიებს გადავხედე, ეს ადამიანი იყო ხელშეკრულებით აყვანილი და არა შტატიანი თანამშრომელი. მის ნაცვლად იყო გაფორმებული სხვა ადამიანი, ვინმე წილოსანი, მისი ნათესავი. შტატგარეშე ბევრი იყო ასევე, რომლებიც შეიძლება სამსახურში არც კი დადიოდნენ. ამიტომ, როგორც გამგებელმა, ჩავთვალე საჭიროდ, დამეტოვებინა ის თანამშრომლები, რომლებიც საჭირო იქნებიან. ეს ქალბატონ მზიას არ ეხება. ჩვენ ამ პროგრამას რომ ძალიან კარგად ვიცნობთ, იქედანაც ჩანს, რომ რამდენიმე თვის წინ ამ კლუბის ქალბატონებს პირადად შეხვდა და ესაუბრა ჩემი მოადგილე ვახტანგ ზენაიშვილი. გარდა ამისა, ჩვენ არა ერთი დახმარება გაგვიწევია მათთვის.
რა შევჭამეო, კითხულობს ასკურავა? სტადიონს გადახედოს და მიხვდება, რა შეჭამა. სხვა თემებზე ამ ადამიანთან პოლემიკაში შესვლას უკვე აღარ ვაპირებ.
რაც შეეხება ქალბატონ მზია კვირკველიას, მან მადლობა გადაუხადა, როგორც ახალს, ისევე ძველ მთავრობას დახმარებისა და ხელშეწყობისთვის: “ამ საკითხს პოლიტიკურ სარჩულს ნუ დაუდებენ,” _ გვითხრა კვირკველიამ.
