მიუხედავად ოფიციალურად გაკეთებული კომენტარებისა, დაზუსტებით არავინ იცის რა შეემთხვა ქვეყნის პირველ პირს.
პუბლიცისტი ვასილ მაღლაფერიძე მიიჩნევს, რომ ამას გასარკვევად, საგარეო საქმეთა სამინისტრომ თურქეთის პოლიციას უნდა მიმართოს:
_ ტრაილერს გადაასწრო არა გადმოასწრო! რა ტრაილერი, რის ტრაილერი?! ეგ საკენკი თავად დამყრელებმა კენკონ.
ორი დღის წინ დავით დარჩიაშვილი ამბობდა, ტრაილერი საიდან მოიგონეთ, ველოსიპედიდან თავისით გადმოვარდაო. ახლა თურმე, ტრაილერს დაურტყამს და ტრაილერის მძღოლი დახმარებია წამოდგომაში! თურმე, ამის დამნახავი იქ არავინ ყოფილა! თურმე, კამერები იქ არ ყოფილა! თქვენ წარმოიდგინეთ და, თურმე, არც პრეზიდენტის დაცვა ყოფილა იქ! საერთოდაც იმ უკაცრიელ და უდაბურ ადგილას ტრაილერი და ველოსიპედისტი პრეზიდენტი ყოფილან მხოლოდ და ისინიც ერთმანეთს შესკდომიან! მოკლედ, იყო და არა იყო რა!
კარგი, ვთქვათ, ესეც დავიჯერეთ, მაგრამ პოლიციაც არ მივიდა შემთხვევის ადგილზე? ოქმი არ შედგა? დამნაშავე არ დადგინდა? რა სურთ დაგვაჯერონ, რომ თურქეთში პამიდორივით გაჭყლიტავ ადამიანს, რომელიც შეიძლება პრეზიდენტიც კი აღმოჩნდეს და ვითომც არაფერი, წახვალ შენს გზაზე?
წარმოგიდგენიათ, მართლა ტრაილერს რომ დაერტყა პრეზიდენტისთვის, რა ამბავი აიწეოდა თურქულ მედიაში?! ასეთი ბედნიერება ჟურნალისტებს ყოველდღე კი არ ეღირსებათ ხოლმე, რომ პრეზიდენტს ტრაილერმა დაარტყას. დაიწყებოდა რეპორტაჟები შემთხვევის ადგილიდან, კომიუტერული გრაფიკით შეადგენდნენ მომხდარის სურათს და იქნებოდა ამის ტელევიზიებში ტრიალი გაუთავებლად! გაარჩევდნენ ექსპერტები, აბა ვისი ბრალი იყო და ვინ რა სიჩქარით მოძრაობდა?!
ახლა ვერსიებს ნუღარ იტყვით, დაიყრებოდა ვერსიები – ვინ შეიძლება მდგარიყო ამ ავარიის უკან, რომელი ქვეყანა თუ პიროვნება?! გარკვეული კითხვები (და სერიოზული ეჭვებიც), პირველ რიგში, გაჩნდებოდა დაცვისა და თანმხლები პირების მიმართ – რატომ აღმოჩნდა პრეზიდენტი სრულიად მარტო?!
შემთხვევა რომ ტრაგიკულად დასრულებულიყო და მძღოლს თუ დავუჯერებთ, ამის დიდი შანსი ყოფილა, წარმოიდგინეთ, თურქეთი რამხელა შარში ეხვეოდა. ვის დააჯერებდი, რომ ეს შემთხვევითობა იყო და არა დაგეგმილი ტერაქტი?! და ჯერა ვინმეს, რომ თურქეთში საგანგებო გამოძიება არ ჩატარდებოდა?
მოკლედ ჩვენ არ ვიძიებთ, არ ვიძიებთ, მაგრამ საგარეო საქმეთა სამინისტრომ თურქეთის პოლიციას მაინც უნდა მოსთხოვოს ოფიციალური ცნობა, რა შეემთხვა საქართველოს პრეზიდენტს თურქეთში! თურქეთის მხარე ვალდებულია, სრული ინფორმაცია მოგვაწოდოს. და თუ საიდუმლოა, გვითხარან, ამასაც გადავიტანთ, _ აღნიშან ჩვენთან საუბრისას მაღლაფერიძემ.
