მისივე თქმით, ომის შემსწავლელი კომისიის ფარგლებში ყველა ის პირი დაიკითხება, ვინც 2008 წლის აგვისტოს მოვლენების შესახებ ინფორმაციას ფლობს. პროკურორი პრეზიდენტის დაკითხვასაც არ გამორიცხავს. აგვისტოს ომის გამოძიების თაობაზე პრეზიდენტი სააკაშვილი აცხადებს: “მე არ ვითანამშრომლებ ამ ანტისახელმწიფოებრივ გამოძიებასთან, რომლის საბოლოო მიზანი არის საქართველოს სახელმწიფოებრიობის შერყევა და პირდაპირ არის მიმართული ჩვენი ტერიტორიული მთლიანობის წინააღმდეგ. ბოლო 48 საათია, რუსეთის მთავარ საინფორმაციო საშუალებებს მორთული აქვს ღრიანცელი, აჟიოტაჟი და ნამდვილი ზეიმი იმასთან დაკავშირებით, რომ საქართველომ საბოლოოდ აღიარა. პოლონეთშიც ამ თემაზე გაუგებრობა, მხრების აჩეჩვა და სკანდალია”.
2008 წლის აგვისტოს ომის გამოძიების თაობაზე ხელისუფლების ინიციატივას გამოეხმაურა გაეროში საქართველოს ყოფილი ელჩი და უშიშროების ყოფილი მდივანი კახა ლომაიაც და “ანტისახელმწიფოებრივად” შეაფასა. ლომაია ამბობს: ” ამის გაკეთება არ შეიძლება. ხელისუფლება უშვებს შეცდომას, რომლის ფასიც საქართველოსთვის, ყველა წინა შეცდომისგან განსხვავებით, განუზომლად დიდი იქნება”.
აგვისტოს ომის საკითხზე ხელახალი გამოძიების დაწყებას “ბრიყვობას” უწოდებს თავდაცვისა და უშიშროების საპარლამენტო კომიტეტის თავმჯდომარის ყოფილი მოადგილე ნიკა რურუა. რურუამ გადაცემა “ღია ეთერში” განაცხადა: “აღნიშნული ნაბიჯით საქართველომ ოკუპირებული ტერიტორიები რუსეთს შესაძლოა დაუკანონოს. ამ ქმედებით საქართველო საბოლოო რაუნდში დაკარგავს თავისი მიწების დაბრუნების იურიდიულ შანსს. ოკუპაცია არის დროებითი. რუსეთს დაპყრობილი ჰქონია ბევრი ქვეყანა, მაგრამ იქიდან გასულა. ასე რომ, ამ ტერიტორიების საბოლოოდ დაკარგვა იქნება დანაშაული”.
პრემიერის განცხადებას “ედპ”-ს ლიდერი ბაჩუკი ქარდავაც გამოეხმაურა, მან თქვა, რომ ბიძინა ივანიშვილის პრო-უსულ ორიენტაციაში ეჭვი აღარ ეპარება და განაცხადა: “ქართული ოცნების” საგარეო-პოლიტიკურ ორიენტაციაში ეჭვები აღარ არსებობს. ივანიშვილი მკვეთრად პრორუსული პოლიტიკოსია და ეს ქვეყანას კატასტროფამდე მიიყვანს, მსგავსი დასკვნების გაკეთების საფუძველს ივანიშვილის განცხადებები მაძლევს, იმასთან დაკავშირებით, რომ 2008 წლის აგვისტოს ომის პროვოცირება ქართულმა მხარემ მოახდინა”.
2008 წლის აგვისტოს ომთან დაკავშირებით, “გურია ნიუსი” მერაბ კოსტავას საზოგადოების თავმჯდომარეს ვაჟა ადამიას ესაუბრა.
_ რას ფიქრობთ აგვისტოს ომის მოვლენების ხელახალი გამოძიების დაწყებაზე, რა შედეგს დააყენებს ეს გამოძიება და იმოქმედებს თუ არა საქართველოს საგარეო და საშინაო იმიჯზე?
_ აგვისტოს ომის გამოძიების თემის წამოწევა, ერთი შეხედვით, თითქოს ივანიშვილის მიერ “ნაციონალური მოძრაობისა” და სააკაშვილის მიმართ ანგარიშსწორებას ჰგავს. მაგრამ, ეს მხოლოდ გარეგნულად, სიღრმისეულად კი, იგი საქართველოს სახელმწიფოებრიობისა და საერთაშორისო ავტორიტეტის წინააღმდეგ მიმართული უდიდესი საფრთხის შემცველი ცინიკური აქტია! თუ გამოძიება მაინც დაიწყო, ერთმნიშვნელოვნად შეიძლება თქმა იმისა, რომ გამოძიების მსვლელობის პროცესიცა და შედეგებიც, მხოლოდ ჩვენი ქვეყნის ამაოხარ რუსეთის წისქვილზე დაასხამს წყალს! საქმე ის გახლავთ, რომ აგვისტოს ომის პერიპეტიები, ევროკავშირის ეგიდით შექმნილ საგანგებო კომისიის მიერ, რომელსაც შვეიცარიელი დიპლომატი ჰაიდი ტალიავინი ხელმძღვანელობდა, სრულადაა გამოძიებული _ საყოველთაოდაა ცნობილი ტალიავინის კომისიის დასკვნების შესახებ! აგვისტოს ომის მიზეზები და შედეგები, ჰააგის საერთაშორისო სასამართლოსთან მჭიდრო თანამშრომლობით, ასევე გამოიძია საქართველოს პროკურატურამ. ახალი გამოძიების ინიციატორებს ნუთუ არ ესმით, რომ საქართველოს მიმართ სჩადიან უმძიმეს, გამოუსწორებელ დანაშაულს, შეურაცხჰყოფენ და ეჭვქვეშ აყენებენ იმ საერთაშორისო ინსტიტუტებისა და საქართველოს მეგობარ ქვეყანათა ღვაწლს, რომელთა მიერაც იქნა გამოძიებული და შეფასებული აგვისტოს ომის გამომწვევი მიზეზებიცა და შედეგებიც?
_ თქვენი მოსაზრებით, ვინ დაიწყო ომი?
_ არა მხოლოდ პირადად მე, არამედ, მერაბ კოსტავას საზოგადოების მთელი შემადგენლობაა ღრმად დარწმუნებული და შესაბამისი წონადი არგუმენტებიც გააჩნია იმის დასასაბუთებლად, რომ აგვისტოს ომი რუსეთმა გააჩაღა საქართველოს წინააღმდეგ. მერაბ კოსტავას საზოგადოების წევრები ჩვეულებისამებრ, ქართველი ჯარისკაცების მხარდამხარ იბრძოდნენ აგრესორ რუსეთის საოკუპაციო ძალების წინააღმდეგ და არა მონაყოლით, არამედ საკუთარი თვალით იხილეს ყოველივე.
_ ამ თემის ხელახალი გამოძიების რატომ დადგა აუცილებლობა და რას შეცვლის ეს გამოძიება რუსეთ-საქართველოს ურთიერთობაში, ან ხომ არ ნიშნავს ეს, როგორც პრეზიდენტი და მისი გუნდის წევრები ამბობენ, ოკუპანტისთვის კარის ფართოდ გაღებას?
_ ეს გამოძიება დასჭირდათ შემდეგი უმთავრესი მიზნების მისაღწევად: ა) სააკაშვილისა და “ნაციონალური მოძრაობის”, პოლიტიკურ სამარეში გასასტუმრებლად; ბ) საქართველოს დისკრედიტირების გზით, მისი დასავლური ლიანდაგიდან რუსულ ლიანდაგზე _ რუსული გავლენის სფეროში ჩასათრევად; გ) რუსეთის მარიონეტ ივანიშვილის, ერთპიროვნულ, ავტორიტარ მმართველად ჩამოსაყალიბებლად, რათა რუსეთს გაუიოლდეს მისი ხელით ფედერალური საქართველოს მართვა. როგორც ზემოთ მოგახსენეთ, ამ თემის წამოწევა ანტიქართული, ანტისახელმწიფოებრივია და იგი მხოლოდ რუსეთს აძლევს ხელს! შესაბამისად, თუ ხელისუფლება, პრემიერ ივანიშვილის ხელმძღვანელობით ხელს არ აიღებს ამ განზრახვაზე, ეს იქნება კიდევ ერთი საგანგაშო სიგნალი იმისა, რომ ისინი არ თაკილობენ რუსეთის ინტერესების გატარებას საკუთარი სამშობლოს ინტერესების საზიანოდ! ალბათ, ყველას ახსოვს, რუსეთის პრეზიდენტი სააკაშვილს ერთი ადგილით დაკიდებას რომ დაჰპირდა. როგორც ჩანს, პუტინს ახლა ივანიშვილის ხელით მოუნდა ამ სურვილის ასრულება. თუ ყოველივე ეს მართლაც მოხერხდა, შეიქმნება რა ერთპიროვნულ მმართველად, ივანიშვილს, რუსეთის სურვილისამებრ, გზა გაეხსნება საქართველოში ფედერალური ადმინისტრაციულ ტერიტორიული მოწყობის დასამკვიდრებლად! ასეთ შემთხვევაში, საქართველოს ნებისმიერი კუთხე გადაიქცევა ფედერაციის სამართალ-სუბიექტად!
_ 19 აპრილის აქციაზე რას იტყვით?
_ მერაბ კოსტავას საზოგადოება 19 აპრილის აქციაში მონაწილეობას არ გეგმავდა. აგვისტოს ომის თაობაზე, პრემიერ-მინისტრ ბ. ივანიშვილის ცნობილი განცხადების შემდეგ, მერაბ კოსტავას საზოგადოების ხელმძღვანელობა თავს მოვალედ თვლის, საგანგებოდ მოწვეულ გამგეობის სხდომაზე გადახედოს პირვანდელ გადაწყვეტილებას და იმოქმედოს მხოლოდ ჩვენი საერთო ქვეყნის ინტერესებიდან გამომდინარე.
