“თუ მათთან არ ხარ “შეკრული”, სული ამოგხდება!”

თუმცა, ამათგან ტატიანა ზახაროვა-მამუკაშვილი უმძიმეს მდგომარეობაში იმყოფება _ იგი უმძიმესი სენით არის დაავადებული, არ აქვს საცხოვრებელი სახლი და წლებია, ნალიის ქვეშ ცხოვრობს, რომელსაც ფუნდამენტიც კი არ აქვს. მას სახლი 1991 წელს დაეწვა, რასაც ტრაგედიაც მოჰყვა _ ხანძრის დროს, ცეცხლში მეუღლე დაეღუპა. ქალბატონი ტატიანა “გურია ნიუსს” დაუკავშირდა და სატელეფონო საუბარში აღნიშნა, რომ სიკვდილს ყოველ დღე ელის და როცა მოკვდება, დასასვენებელი ადგილიც არ აქვს. როგორც თავად ამბობს, რამდენჯერმე მიმართა დასახმარებლად ადგილობრივ ხელისუფლებას, თუმცა, ყურადღება არასოდეს მიუქცევიათ.

ტატიანა ზახაროვა-მამუკაშვილის “გურია ნიუსი” მას შემდეგ ესტუმრა, რაც მეზობლები დაჟინებით ითხოვდნენ, გადაგვეღო მისი ყოველდღიურობა. იქ მისულებს მეზობლები შემოგვეგებნენ, ჩაწოლილი ტატიანა კი, თურმე, თავის შვილთანაა. როგორც მეზობლები “გურია ნიუსთან” საუბარში ამბობენ, ასეთი გაჭირვებული სოფელ სუფსაში არავინაა.

_ მის სახლს ცეცხლი 1991 წლის დეკემბერში გაუჩნდა. რამდენჯერმე ჩემი ხელით დავაწერინე ხელისუფლების სახელზე განცხადება. ჯერ ნალიის უკან გადატანას ითხოვდა და ერთი ოთახის ამოსაშენებლად თანხის გამოყოფას. 2003 წლიდან მუშაობს აქ სოფლის რწმუნებულად ზვიად ლომაძე _ “ვარდების რევოლუციის” მერე ვერ გააქანეს. მას სთხოვდა დახმარებას, მაგრამ უარს იღებდა _ არ არის ბიუჯეტში საკმარისი თანხაო. ამის შემდეგ 2008 წელს, წინასაარჩევნოდ, რწმუნებული თავად დაპირდა, ახლა დაწერე განცხადება ამ საარჩევნოდ და აუცილებლად მოგცემთ დახმარებასო. მე დავუწერე განცხადება, მაგრამ რა ბედი ეწია იმ განცხადებას, არავინ იცის _ არანაირი რეაქცია არ მოჰყოლია. ამის შემდეგ, 2009 წლის დეკემბერში, დახმარებისთვის ლანჩხუთის გამგეობას მიმართა. იქაც მე ვახლდი, მაგრამ ისევ არაფერი გამოვიდა. 2010 წლის 2 მარტს კიდევ დაწერა განცხადება ზვიად ლომაძის სახელზე. ლანჩხუთის გამგეობაში დაგვაიმედეს კიდევ. არჩევნები მოდიოდა და უარით ვინ გამოგვისტუმრებდა? მაგრამ კვლავ არაფერი. ონკოლოგიურად მძიმე ავადმყოფია და ხომ არიგებდნენ დახმარებას? ამას ერთჯერადი დახმარებაც კი არ მიუღია. ახლა იგი ლოგინსაა მიჯაჭვული და სიკვდილს ყოველდღე ებრძვის. ჩვენ, მისი  მეზობლები, კატეგორიულად მოვითხოვთ, მიაქციონ ყურადღება ამ ქალბატონს და დახმარება გაუწიონ! _  ამბობენ “გურია ნიუსთან” საუბარში ზახაროვას მეზობლები.

მათივე თქმით, ტატიანა სულ წვალობდა: _ სოფელს უყვარს, პატიოსანი ქალია. მხოლოდ სოციალური დახმარება აქვს 30 ლარი და იმასაც ამადლიან _ ხომ გაქვს დახმარება და მაგიც ჩვენი წყალობითო. ბაღებსა და სკვერებში რომ ხარჯავენ უზარმაზარ თანხებს, ასეთს არ უნდა მიხედონ? მთელი ზამთარი შეშა არ ჰქონდა, მეზობლებში თბებოდა, ღმერთის როგორ არ ეშინიათ? ან ჩვენ როგორ ვიწამოთ ღმერთის მაგათ შემხედვარე?

როცა ხელისუფლების წარმომადგენლებს გაჭირვებაზე ესაუბრები, ცინიკურად გიყურებენ და როგორი შთაბეჭდილება გრჩება იცით? “ფეხებზე გვკიდიხართო” _ გიყურებენ და სხვაზე ფიქრობენ. ვინც მაგათ “შეეკვრება”, ისინი ყოველთვის კარგად არიან, თუ მათთან არ ხარ “შეკრული” კი, სული ამოგხდება. რაღაც დროს მაინც მოიკითხავენ მაგათ მიერ დახარჯულ ფულებს და ნახავენ მერე, _ გვითხრეს სუფსაში.

ლანჩხუთის მუნიციპალიტეტის სოფელ სუფსის რწმუნებული ზვიად ლომაძე “გურია ნიუსთან” სატელეფონო საუბარში ადასტურებს, რომ ტატიანა ზახაროვა-მამუკაშვილმა ლანჩხუთის მუნიციპალიტეტის გამგეობას დახმარებისთვის რამდენჯერმე მიმართა, თუმცა დახმარება ჯერ არ მიუღია:

_ ეს ქალბატონი უმძიმეს მდგომარეობაში ცხოვრობს. ფაქტობრივად, მას არ აქვს საცხოვრებელი სახლი და მოხვდა კიდეც უსახლკაროთა დახმარების პროგრამის სიაში. ტატიანამ რამდენჯერმე მიმართა ლანჩხუთის მნიციპალიტეტის გამგეობას განცხადებით დახმარებისთვის. მესმის, სიმსივნით დაავადებულიცაა და ფულად დახმარებასაც საჭიროებს. ჩვენ აუცილებლად დავაყენებთ შუამდგომლობას ლანჩხუთის გამგეობასთან დახმარებისთვის კიდევ ერთხელ (?!).

_ ბატონო ზვიად, ქალბატონი ტატიანა ამბობს, რომ განცხადება ერთხელ, წინასაარჩევნოდ თავად დააწერინეთ და შეჰპირდით, დახმარებას აუცილებლად მიიღებდა, თუმცა როგორც თავად ამბობს და ამას მეზობლებიც ადასტურებენ, ის ამაოდ მოელის ამ დახმარებას.

_კი, ბატონო, იყო ასეთი შემთხვევა _ მე თავად დავაწერინე განცხადება. ოღონდ არჩევნები რა შუაშია, არ ვიცი. უბრალოდ, იმ დროს იყო უსახლკაროთა დახმარების პროგრამა, თუმცა, ეს პროგრამა მალევე გაჩერდა. როცა განახლდება, აუცილებლად მოუწევს.

_ ანუ დამთავრდა არჩევნები და პროგრამაც გაჩერდა?

_ ვერ ვხვდები, არჩევნები რა შუაშია. ჩვენ დავეხმარეთ რამდენიმე ოჯახს. თუ გინდათ, ჩამოგითვლით, _ გვითხრა ლომაძემ.