ყველაზე მეტი ხმაური და აჟიოტაჟი პირველ საკითხს, სამანდატო, საპროცედურო და იურიდიულ საკითხთა კომისის დასკვნას, ფრაქცია “ნაციონალური მოძრაობა ძლიერი თვითმმართველობის” რეგისტრაციის განხილვას მოჰყვა.
ამის შემდეგ, ოზურგეთის მუნიციპალიტეტის გამგებელმა კოტე შარაშენიძემ ქალაქის ცენტრის მოწესრიგებასთან დაკავშირებით, სხდომაზე საკმაოდ ხმამაღალი განცხადებები გააკეთა. მისი განცხადებით, ოზურგეთში ბევრი უკანონო მშენებლობა გახორციელდა, რომლის დემონტაჟიც უნდა მოხდეს.
_ ჩვენ ერთი თეთრი არ გვითხოვია ქალაქის მოწყობისთვის. ქალაქში არის უამრავი რამ მოსაწესრიგებელი, არის ძალიან ბევრი და უაზროდ დახარჯული მილიონები, მიადგება წყალმომარაგების უფროსი ტაბატაძე და გადათხრის, გადმოთხრის ყველაფერს, ვინ არის ამაზე პასუხისმგებელი? ვალდებულია რომ ის ასფალტი მან შეაკეთოს. ვინმემ მოიკითხეთ? არავის არ აინტერესებს ოზურგეთში გადათხრილი ქუჩების ამბავი,” _ მიმართა მან მაჟორიტარებს.
კოტე შარაშენიძემ მან ადგილობრივ ბიზნესმენებს ერთგვარი გამაფრთხილებელი სიგნალიც კი მისცა…
_ ქალაქის ტერიტორიაზე გვაქვს ჩვენი ხედვა განაშენიანებისთვის. იცით საერთოდ ამ ქალაქში რა და როგორ გაკეთდა? თუნდაც იმ პსპ-ს უკანონო მშენებლობა ავიღოთ, თუნდაც ის, ბეგია სიორიძის მაღაზიები რომაა უნივერმაღის მიმდებარე ტერიტორიაზე და ათასი რამ. დამახინჯებულია ქალაქი. როცა ახლა ბატონი ბიძინა ივანიშვილი ჩამობრძანდება თავის რეზიდენციაში, მე უკვე დაწყებული მაქვს მოლაპარაკებები, რომ შემოვა ოზურგეთში და მასთან ერთად განვიხილავთ ამ საკითხს. იმ ადამიანებს, ვისაც არასწორად აქვთ გაკეთებული უკანონო მშენებლობები, მოუწევთ დემონტაჟი ამ ყველაფრისა, თუმცა მათ ჩვენ კომპენსაციებს გადავუხდით. ერთხელ და სამუდამოდ უნდა მოწესრიგდეს ქალაქი, რომელიც სიმახინჯის ქალაქად აქციეს, ამ სიტყვის სრული მნიშვნელობით. უკანონო ნებართვებით გაკეთებული მშენებლობები, ერთი და ორი კაცის არ არის ეს ოზურგეთი. ქალაქი არის მოსაწესრიგებელი, მანქანებით ქუჩაში ვერ გაივლი,
ლელა ნაცვალაძე: “ეს ყველაფერი, ამ საკრებულოს დადგენილებითაა გაკეთებული! იმხელა სართული რომ დააშენა ნიკოლაიშვილმა ბინებზე, ვინმე ინტერესდება ამით? რას ჰგავს ქალაქში სანიაღვრე არხები, 7 წელია მაგას ვყვირივარ. თუ იცით, საერთოდ რამდენ ქუჩაზე არაა კანალიზაცია და ხალხი უბედურ დღეშია? გადაწყვეტილებებს თქვენ არ იღებდით ბატონო ალეკო? მაგრამ ნიკოლაიშვილი იყო ამათთვის მამა ღმერთი და რასაც გიბრძანებდათ, იმას აკეთებდით.
მერაბ მჟავია, საკრებულოს იურიდიულ საკითხთა თავმჯდომარე: რას იზამდი, აბა, ლელა მაშინ, სხვანაირად იქნებოდა?
ალეკო მამეშვილი: “მე არ ვიღებდი გადაწყვეტილებებს! დაგეთანხმებით, რომ ბევრია გასაკეთებელი, მაგრამ ის, რომ წინა წლებში არაფერი არ გაკეთებულა, ეს არის ტყუილი. ჰკითხეთ მოსახლეობას, ჩვენ თუ არაფერი გაგვიკეთებია. პსპ-ს მშენებლობისთვის დადგენილება მე არ გამიცია. ვისაც სახლი გადავუხურეთ და ასფალტი დავუგეთ, იმათ ჰკითხეთ. ასეთი დამოკიდებულება არ შეიძლება.
იურიდიული კომიტეტის თავმჯდომარევ, _ მიმართა შარაშენიძემ მერაბ მჟავიას, რატომ არ ავკრძალეთ ქალაქის ცენტრში გაზის მანქანები? _ რატომ არ აიკრძალა აქამდე? _ იმიტომ, რომ მითითებები მოდიოდა ინფრასტრუქტურის სამინისტროდან, დაიძახებდა ერთს რამაზა ნიკოლაიშვილი, ეს გავაკეთოთ ასე და კეთდებოდა ისე. მოიცა რა, დამთავრდა! ახლა გავაკეთებთ ისე, როგორც სჭირდება ჩვენს ოზურგეთს. ვინმე იღებდით ენას, მაშინ როცა ქალაქის სილამაზისთვის ამდენი უკანონო მშენებლობები არ მომხდარიყო?
რას აკეთებს ოზურგეთის მუნიციპალური ტრანსპორტის ცენტრი, იცის ამის შესახებ ვინემ და რამდენი ასეთი, _ განაცხადა შარაშენიძემ.
