მანვე ყურადღება გაამახვილა საერთო სასამართლოების შესახებ კანონზე, რომელსაც პრეზიდენტმა ვეტო დაადო. თუმცა, მისი მთავარი მესიჯი მაინც ამ პროცესის პოლიტიკურ მხარეს ეხებოდა და მთავარი ადრესატი იუსტიციის მინისტრი, თეა წულუკიანი გახლდათ.
“პირველი, რაც მინდა აღვნიშნო, ამ პროცესის პოლიტიკური ნაწილია. საქართველოს პრეზიდენტმა ვეტო დაადო საერთო სასამართლოების შესახებ კანონს და იცით, რომ პარლამენტი განიხილავს ამ საკითხს. მაგრამ, ეს არის სასამართლოსთან დაკავშირებული პროცესის პოლიტიკური ნაწილი. რატომ დაადო პრეზიდენტმა ვეტო და დაძლევს თუ არა პარლამენტი, ამის შეფასებით ნაწილში ჩვენ არ შევალთ და სასამართლო არ უნდა გახდეს პოლიტიკური მოთამაშე ამ პროცესში.
აქვე აღვნიშნავ, რომ პროექტის წარმოდგენილი დებულებები სრულად არ შეესაბამება ვენეციის კომისიის რეკომენდაციებს, იუსტიციის საბჭოს წევრების უფლებამოსილების შეწყვეტა ამ ფორმით, ნამდვილად არ წაადგება რეფორმას.
ნებისმიერი სისტემის გაუმჯობესება შეიძლება. მე ვაცხადებ, რომ სასამართლოს მოსამართლეთა კონფერენცია გაიმართება ცვლილებების ამოქმედებისთანავე, პირველსავე შესაძლო დღეს.
მინდა მივმართო პოლიტიკოსებს და ვუთხრა, განსაკუთრებით იუსტიციის მინისტრის მისამართით, სასამართლოსთან დაკავშირებული ნებისმიერი განცხადებისგან თავი შეიკავონ და არ ჩაერიონ მოსამართლეთა არჩევის პროცესში. მათ საშუალება უნდა მივცეთ, რომ საკუთარი ინიციატივით დაასახელონ კანდიდატები” _ განაცხადა კუბლაშვილმა.
როგორც ჩანს კოტე კუბლაშვილმა საგანგებო ბრიფინგის მოწყობა თეა წულუკიანის პოლიტმეტრში გაკეთებული განცხადებების შემდეგ გადაწყვიტა.
გადაცემა “პოლიტმეტრში” იუსტიციის მინისტრმა თეა წულუკიანმა განმარტება გააკეთა სასამართლოს რეფორმაზე და მისი და პრემიერის შეხვედრაზე უზენაესი სასამართლოს თავმჯდომარესთან, კოტე კუბლაშვილთან:
“სამწუხაროა, რომ ის სიმბოლური შეხვედრა, რაც ბატონ პრემიერს ჰქონდა კოტე კუბლაშვილთან, სწორად არ იქნა მოსამართლეების ყურამდე მიტანილი და მე მინდა მათ ავუხსნა, რა იყო აზრი ამ შეხვედრის.
მოსამართლეების ყურამდე, ალბათ ისევ უზენაესი სასამართლოს თავმჯდომარის ძალისხმევით, ცრუ ინფორმაცია მივიდა, თითქოს პრემიერმა, ან მე, ან ჩვენი გუნდის რომელიმე წევრმა ვინმეს მივეცით რაღაცა ტიპის გარანტიები. ჩვენ არ ვართ ის ხელისუფლება, ვინც ვინმეს რაღაც გარანტიებს აძლევს და მითუმეტეს იმას, ვინც ამ დღეში ჩააგდო მართლმსაჯულება. არანაირი გარანტიები არ ყოფილა, ამას ვაცხადებ სრული პასუხისმგებლობით. შეხვედრა შედგა მხოლოდ ერთი მიზეზით, სასამართლოს დღეს ჰყავს ის ხელისუფლება, რომელიც ჰყავს და ჩვენ მასთან გავიარეთ პუნქტობრივად ის რეფორმა, რომელზეც მან ბოლოს, ბრჭყალებში, ხელი მოაწერა და დაეთანხმა. მან დღევანდელ კომენტარებშიც თქვა, რომ რეფორმის მოდელი კარგია.” _ განაცხადა წულუკიანმა.
