და გამოევლინა გამარჯვებული კონკურსისა “როგორ დაინახეს გურულებმა ლეხ კაჩინსკის სიკვდილი”. თუმცა, პირველმა ლედიმ მაშინ ჩამოსვლა ვერ მოახერხა. გამარჯვებული გასული კვირის პარასკევს გამოვლინდა.
პრობლემა სახელად _ ფოტოგადაღება
სანდრა ელისაბედ რულოვსი და პოლონეთის რესპუბლიკის ელჩი საქართველოში ურსულა დოროშევსკა ოზურგეთში 12 ნოემბერს, პირველი საათისთვის ჩამოვიდნენ და ოზურგეთის სამხატვრო გალერეაში მივიდნენ. როგორც წესი, პირველი ლედის სტუმრობისას ძალიან მკაცრად არის დაცული “პროტოკოლი”, ჟურნალისტებისთვის აკრძალულია სურათების გადაღება _ თუ დაცვამ შეგნიშნა, რომ სურათი გადაიღე, ეს სურათი აუცილებლად უნდა წაშალო ფოტოაპარატიდან. ასე მოხდა ამჯერადაც _ რულოვსის დაცვის ბრძანებით, ფოტოების გადაღებაზე, უფრო სწორად, არგადაღებაზე კონტროლი ოზურგეთის პოლიციის უფროსს გია ურიდიას და მისმა თანამშრომლებს დაევალათ.
73 წლის ხელებგადაგრეხილი ქალბატონი
ძალოვნებს იმ დღეს მარტო ჟურნალისტების მიმართ არ ჰქონიათ აგრესია _ რედაქციაში ოზურგეთელი, 73 წლის ეთერ ჯაში შეგვეხმიანა, რომელიც ამბობს, რომ სანდრა რულოვსისთვის სამადლობელი უნდა ეთქვა, სამმა ადამიანმა კი ხელი გადაუგრიხა და გალერეას მოაშორა:
_ წლების უკან ვმუშაობდი სხვადასხვა სამსახურში _ საკონსერვო ქარხანაში, აბრეშუმის ფაბრიკაში, ვკრეფდი ჩაის. 25 წელი ვიმყოფებოდი საბინაო აღრიცხვაზე. როცა ჩემი რიგი მოვიდა, ბინა არ მომეცა მარტოხელობის მიზეზით. ამიტომ ვარ დღეს უბინაოდ. ჩემი შრომითი დანაზოგი _ 35 ათასი მანეთი შემნახველ სალაროში წამართვა შევარდნაძის მთავრობამ. რატომ უნდა ვიყო უბინაოდ დღეს 73 წლის ქალი? გაზეთებში დაიწერა ჩემი გაჭირვების შესახებ და საქართველოს პირველი ლედი სანდრა რულოვსი გამომეხმაურა, ჩემთანაც ჩამოვიდა, მაგრამ სახლში არ დავხვდი. უკანონოდ მედავებოდნენ “ენერგო-პრო ჯორჯიას” წარმომადგენლები და უზარმაზარი ვალი დამეწერა. პრობლემა სწორედ სანდრა რულოვსის მეშვეობით გადაიჭრა. მინდოდა პირადად მენახა და მადლობა მეთქვა, მაგრამ ვინ დაგაცადა _ სამხატვრო გალერეასთან მიახლოებულს, სამმა პოლიციელმა ხელები გადამიგრიხა და ასე ხელებგადაგრეხილი გამარიდეს იქაურობას. გული წამივიდა. ახლაც ვერ ვხვდები, რა უნდოდათ, რატომ იკრძალება უბრალო ხალხის მისვლა სანდრა რულოვსთან?! _ კითხულობს ეთერ ჯაში.
დაჯილდოება
ჟურნალისტების შესვლა გალერეაში დიდი ლოდინის შემდეგ მოხდა. სამი საათისთვის ჟიურის თავმჯდომარე სანდრა რულოვსი, ჟიურის წევრები, მხატვარი ვახტანგ მამეიშვილი და ურსულა დოროშევსკა საბოლოოდ შეთანხმდნენ და გამარჯვებულების დასახელება დაიწყეს.
კონკურსში 73 კონკურსანტმა 111 ნამუშევარი წარმოადგინა. მონაწილეთა შორის 29 ადგილობრივი პროფესიონალი მხატვარი, ხოლო 44 _ გურიის რეგიონში არსებული სამხატვრო სკოლის მოსწავლეები იყვნენ. პირველი ადგილი საუკეთესო კომპოზიციისთვის გიორგი დარჩიას ერგო, ასევე საუკეთესო იდეისთვის და ნამუშევრისთვის პირველ ადგილებზე ავთანდილ თავართქილაძე და თემურ ბერძენიშვილი გავიდნენ, რომლებსაც პირველი ლედის მიერ დაწესებული პრიზები გადაეცათ. მეორე და მესამე ადგილის მფლობელებმა დიპლომებთან ერთად, სხვადასხვა სახის საჩუქრები მიიღეს. რაც შეეხება ბავშვების კონკურსს, პირველ სამეულში ერეკლე, ნინო გორდელაძეები და ლუკა ჟღენტი მოხვდნენ, მათთან ერთად სამახსოვრო საჩუქრები გადაეცა 13 ბავშვს. იმ ბავშვებს კი, ვინც ინგლისურ ენას სწავლობს, სანდრა რულოვსმა ინგლისურენოვანი წიგნები აჩუქა. საჩუქრები გურული მხატვრებისგან პირველმა ლედიმ და პოლონეთის ელჩმაც მიიღეს.
შეხვედრის დასასრულს, სანდრა რულოვსმა ჟურნალისტებთან კომენტარი გააკეთა. მისი თქმით, ნამუშევრები ძალიან შთამბეჭდავი იყო.
