“ხელისუფლება ცდილობს, ის ორგანიზაციები დააფინანსოს მსუყედ, საიდანაც “ატკატი” კეთდება”

ეს განაცხადი ოზურგეთის მუნიციპალიტეტის საკრებულოს ოპოზიციონერ დეპუტატს ლელა ნაცვალაძეს ეკუთვნის, რომელიც, თავისი ოპოზიციონერი კოლეგების მსგავსად, 2011 წლის ბიუჯეტის პროექტს მხარს არ უჭერს. ნაცვალაძე ფიქრობს, რომ არ არის გამორიცხული, ალტერნატიული ბიუჯეტი წარადგინოს ბიუროს სხდომაზე.
_ ოზურგეთის მუნიციპალიტეტმა საკრებულოს წარმოუდგინა 2011 წლის ბიუჯეტის პროექტი, რომელიც უნდა განისაზღვროს 7 855,9 ათასი ლარით. მანვე გაგვაცნო ძირითადი პრიორიტეტები, რომელთა დაფინანსებასაც გეგმავს მუნიციპალიტეტი 2011-2014 წლებში. დოკუმენტებში შავით თეთრზე წერია, რომ პრიორიტეტი მოიცავს ყველა იმ პროგრამასა და ღონისძიებას, რომელიც უზრუნველყოფს ოზურგეთის მუნიციპალიტეტის სოციალურ-ეკონომიკურ აღმავლობას, აგრეთვე თითოეული ოზურგეთელის კეთილდღეობას. დოკუმენტის შემუშავებისას, თურმე, გაუთვალისწინებიათ მოსახლეობის და სხვა ინტერესთა ჯგუფების შენიშვნები და წინადადებები. წარმოდგენილია 6 ძირითადი პრიორიტეტი: მუნიციპალური გზების რეაბილიტაცია; მუნიციპალიტეტის კეთილმოწყობის ღონისძიებების გახორციელება; მუნიციპალიტეტის კომუნალური მეურნეობის განვითარება; სპორტულ-კულტურული ღონისძიებების ხელშეწყობა;  სკოლამდელი განათლების ხელშეწყობა და სოციალური დაცვა, რომლის დასაფინანსებლად გამოყვეს მხოლოდ 645.1 ათასი ლარი.
ჩემთვის გაუგებარია, საზოგადოების რომელი ფენისთვის ან რომელი ჯგუფის ინტერესები იქნა გათვალისწინებული?!
ყველა ცივილიზებულ ქვეყანას ესაჭიროება კეთილმოწყობილი გზები, მოწესრიგებული ინფრასტრუქტურა, განვითარებული კულტურა და სპორტიც, მაგრამ, როცა რაიონს ჰყავს ათიათასობით სოციალურად დაუცველი, სიღარიბის ზღვარს მიღმა მყოფი ადამიანი, ასეულობით ინვალიდი, ამავე რაოდენობის ონკოავადმყოფი, ხუთასამდე ყველა კატეგორიით რეგისტრირებული უსახლკარო მოქალაქე და მათ დასაფინანსებლად 645.1 ათას ლარს ჩადებ ბიუჯეტში, ნათელია, როგორც ზრუნავ თითოეული მოქალაქის კეთილდღეობაზე.
ჩამოვთვლი რამდენიმე მუხლს, რითაც ნათლად დაგანახებთ, რომ 2011 წლის ბიუჯეტი დაწერილია არაკვალიფიციურად და მორგებულია ერთეულთა კერძო ინტერესებს:
_ მუნიციპალიტეტის გამგეობაში შემავალი სამსახურების დაფინანსება 2011 წლის ბიუჯეტში ასახულია 1 161.9 ათასი ლარით; კულტურულ-სპორტული და ახალგაზრდული საქმეთა ღონისძიებები _ 1 797.4 ათასი ლარით; პოლიციის ხარჯი _ 115.0 ათასი ლარით; ინფრასტრუქტურა, მშენებლობა, რეაბილიტაცია, ექსპლუატაცია _ 1 797.4 ლარით, _ აღნიშნა ჩვენთან საუბრისას ლელა ნაცვალაძემ.
მისივე თქმით, წინა ბიუჯეტში გამოყოფილი 80 ათასი ლარიდან მხოლოდ 30 ათასი ლარი მოხმარდა უსახლკაროდ დარჩენილებს, ხოლო 2011 წლის ბიუჯეტში, 500-მდე ოჯახის დასახმარებლად მხოლოდ 45 ათასი ლარი გამოიყო:
_ სამაგიეროდ, არის საბიუჯეტო ორგანიზაციები, რომელთაც კარგი ლობისტები ჰყავთ მთავრობაში და, შესაბამისად, დაფინანსებაც კარგს იღებენ. უფრო მეტიც, რიგი საბიუჯეტო ორგანიზაციების ბიუჯეტი გუბერნატორის კაბინეტში იწერება. არიან ჩინოვნიკები, რომელთა ინტერესის საგანია ამა თუ იმ ორგანიზაციას მოზრდილი ბიუჯეტი ჰქონდეს, რადგან მათი ოჯახის წევრები არიან დასაქმებულები შესაბამის სამსახურებში. მუხლობრივად გაშლილ ბიუჯეტში ნათლად ჩანს “უპატრონო” ორგანიზაციები _ მიუხედავად საქმის კეთებისა, მათ მწირი დაფინანსება აქვთ. ხელისუფლება ცდილობს ის ორგანიზაცია დააფინანსოს მსუყედ, საიდანაც კარგი “ატკატი” კეთდება. მაგალითად, ქალაქისა და სოფლის აღმშენებლობისათვის წინა წელს მილიონები გამოიყო, მაგრამ წელსაც პრიორიტეტი გზა და ინფრასტრუქტურაა.
საბიუჯეტო და სოციალურმა კომისიამ ერთიანი განხილვა მოაწყო, სადაც თითქმის ყველა კომისიის წევრმა დააფიქსირა თავისი აზრი და გადავწყვიტეთ, უკან დაგვებრუნებინა 2011 წლის ბიუჯეტი, მაგრამ საკრებულოს ამ პრინციპულობას ნამდვილად არ მოიწონებდა მხარის გუბერნატორი, რომელიც კომისიის სხდომის დასრულებისთანავე საკრებულოს თავმჯდომარეს ეწვია, ხოლო შემდგომ თავმჯდომარემ საგანგებო შეხვედრა გამართა უმრავლესობის წევრებთან, _ აღნიშნა საუბრის დასასრულს ლელა ნაცვალაძემ.