ახლახან, გურიის რეგიონის ქორეოგრაფიის მოღვაწეთა კავშირის თავმჯდომარედ ოზურგეთის წმიდა ნინოს სახელობის სასულიერო გიმნაზიის ბაზაზე არსებული ანამბლ “ზენაარის” ხელმძღვანელი მელისი ნადირიძე აირჩიეს. წლების განმავლობაში, ეს თანამდებობა სახელმწიფო ქორეოგრაფიული ანსამბლის, “გურიას” ხელმძღვანელს ქორეოგრაფ ჯუმბერ დუნდუას ეკავა.
ზემოთ ხსენებული ორგანიზაცია არსებობის 20 წელს ითვლის. დაარსების დღიდან, ცენტრალურ ოფისს საქართველოს დამსახურებული ქორეოგრაფი თენგიზ სუხიშვილი ხელმძღვანელობდა, შემდეგ თენგიზ ურთმელიძე, ახლა კი სათავეში რეზო ჭანიშვილი ჩაუდგა. არჩევნები ჩატარდა რეგიონებშიც, გურიის ყოფილმა ქორეოგრაფიის მოღვაწეთა კავშირის თავმჯდომარემ ჯუმბერ დუნდუამ უარი თქვა კენჭისყრაზე. როგორც თვითონ თქვა, ასაკიც აღარ უწყობდა ხელს. ნადირიძეს კონკურენტი არ ჰყოლია.
“გურია ნიუსი” ახალარჩეულ თავმჯდომარეს შეხვდა და სამომავლო პერსპექტივებზე ესაუბრა.
_ 20 წელზე მეტია, რაც ქორეოგრაფიაში ვმუშაობ. მუშაობა დავიწყე სოფელ ნატანებში _ კულტურის სახლთან არსებულ ანსამბლს ვხელმძღვანელობდი. 15 წელზე მეტია, რაც “ზენაარის” ხელმძღვანელი ვარ. ახლახან ამირჩიეს გურიის ქორეოგრაფ მოღვაწეთა კავშირის ხელმძღვანელად. ეს ორგანიზაცია 20 წელია, რაც არსებობს. რაღაც დონეზე მუშაობდა გურიის რეგიონული კავშირიც, მაგრამ ვფიქრობ, რომ არაეფექტურად. ქორეოგრაფ მოღვაწეთა კავშირის გურიის ორგანიზაცია წლების განმავლობაში უფუნქციოდ იყო, რადგან ხსენებული კავშირის ცენტრალურ და რეგიონულ ორგანიზაციებს შორის არ იყო საქმიანი თანამშრომლობა. გადავწყვიტეთ, რომ ყველაფერი ეს შევცვალოთ კარგი მუშაობით.
_ რა იგულისხმება კარგ მუშაობაში?
_ ღვაწლმოსილი ქორეოგრაფების საპატივცემულოდ კონცერტების მოწყობა, ფესტივალების ჩატარება. ორგანიზაციამ რომ იარსებოს, აუცილებლად საწევროები უნდა შედიოდეს, უნდა მოხდეს კავშირში ანსამბლების გაერთიანება, რა თქმა უნდა, ნებაყოფლობით. თებერვლამდე, ალბათ, გაწევრიანება დასრულდება და შემდეგ დაიგეგმება, თუ რა ღონისძიებების ჩატარება იქნება საჭირო. აუცილებლად უნდა გვქონდეს კავშირი კულტურის სამინისტროსთან. ჩვენს გეგმებს გავაცნობთ ცენტრალურ ხელისუფლებას და რაც მთავარია, უნდა ვიყოთ ერთად.
_ რა პრიორიტეტები ექნებათ ქორეოგრაფიულ ჯგუფებს, რომლებიც ამ კავშირში გაერთიანდებიან?
_ პირველ რიგში, მოეწყობა შეხვედრები, უფრო ხშირად შევხვდებით გურიის ქორეოგრაფებს, მოვისმენთ მათ შეხედულებებს, შევიმუშავებთ სამოქმედო გეგმას. ორგანიზაციის გასავითარებლად აუცილებლად გვჭირდება რეგიონული კავშირის ოფისი, ამაზეც ვიზრუნებთ და ვფიქრობ, ყველაფერი გამოგვივა.
_ თქვენი შეხედულებით ქორეოგრაფიის გასავითარებლად, რეგიონში მომუშავე ქორეოგრაფებს სამუშაო პირობები აქვთ?
_ წინასწარ ვერაფერს ვიტყვი. გურიაში სულ 23 ქორეოგრაფი მუშაობს, თუმცა, ქორეოგრაფი _ ეს ცოტა ხმამაღალი ნათქვამია, უფრო პედაგოგებს დავარქმევდი, უმცირესი გამონაკლისის გარდა. შემუშავებული იქნება სასწავლო პროგრამების ნორმები და თითოეული პედაგოგის თუ ქორეოგრაფის ნამუშევარი შეფასდება პროფესიონალების მიერ. საჭიროების შემთხვევაში, ისინი მიიღებენ შესწორებებს და მითითებებს. ვთვლი, რომ გურიაში ქორეოგრაფიის კარგი სკოლაა. შეგვიძლია, უფრო უკეთესი გვქონდეს და ამისთვის უნდა ვიზრუნოთ. სამუშაო პირობები ქორეოგრაფებისთვის, ალბათ, დამაკმაყოფილებელია.
