“პრეზიდენტის საჩუქარი საგადასახადომ წამართვა”

ნინო კილაძე “გურია ნიუსთან” საუბარში აღნიშნავს, რომ სამედიცინო პოლისი ოჯახის წევრებს მას შემდეგ მოეხსნათ, რაც მან შპს “ლაბაში”, სულ რაღაც 15 დღე იმუშავა. მისი “გამდიდრების” შესახებ გურიის სოციალურ სააგენტოს გურიის საგადასახადო სამსახურიდან შეატყობინეს და დახმარებაც მოუხსნეს.
“ფულადი დახმარება სამი წელია მომიხსნეს, თუმცა, პოლისით ვსარგებლობდი. ჩემი ოჯახის სარეიტინგო ქულა 57 850 იყო. არ მივსულვარ სააგენტოში, არ შემიტანია განცხადება _ ვკმაყოფილდებოდი იმითაც, რომ პოლისი მქონდა. ნოემბრის ბოლოს შემამოწმეს, 2 დეკემბერს შეავსეს დეკლარაცია. ახლა გავიგე, რომ 70 280 ქულა მომენიჭა. ფულად დახმარებას როცა ვიღებდი, 47 ათასი ქულა მქონდა. მას შემდეგ, არაფერი შემიძენია, პირიქით, უკან მიდის ჩვენი ცხოვრება. უმძიმეს მდგომარეობაში ვცხოვრობ, ყველა კვირაში სასწრაფო სამედიცინო დახმარებას მივმართავ. მჭირდება ექიმი, შრომისუუნარო ვარ, მაქვს ოსტეოქონდროზი და გადავიტანე უმძიმესი ოპერაცია, მეუღლეს მიკროინფარქტი აქვს გადატანილი, არ შეუძლია ფიზიკური მუშაობა. საოპერაციოა. შვილს თვალის პრობლემა აქვს, ერთი ოპერაცია გავუკეთეთ, თუმცა, მეორე ოპერაცია და მკურნალობა ესაჭიროება”, _ გვიყვება თავის გასაჭირს ნინო კილაძე.
_ ჩემს 10 წლის გოგონას წიგნები არ აქვს სრულყოფილად, ერთს ვუყიდე გაჭირვებით, მეორე ბავშვი უწიგნოდ მყავს. სწავლა რომ დაიწყო, გვიან, სექტემბრის ბოლოს მივიყვანე ბავშვები სკოლაში _ საშუალება არ მქონდა და ბავშვებს სათანადოდ ვერ შევუძინე სასწავლო ნივთები და ტანსაცმელი. მუდმივად მაქვს მაღალი წნევა, არ მაქვს საშუალება, ვიყიდო წამლები. ამ პოლისებს ჩემთვის დიდი მნიშვნელობა ჰქონდა _ დღე და ღამე ვტირი, დარდი მკლავს, ექიმთან მაინც ხომ მივდიოდი უფასოდ? არ ვითხოვ სახლის გაკეთებას, არ ვითხოვ ფულად დახმარებას, თუმცა ჩემს სახლს რომ ნახავთ, მიხვდებით, მეკუთვნის თუ არა ეს დახმარება. სახლი ისეთ დღეშია, რომ გაწვიმდება და ქარი ამოვარდება, დილა თუ გაგვითენდება,  არ მგონია. ლოცვით ვიძინებთ და დილით ღმერთს მადლობას ვუხდით, რომ ერთი დღე კიდევ გვაჩუქა. ოთხ სულს ერთ ოთახში გვძინავს, ორ საწოლზე. 16 წლის ბიჭი ჩვენთან წევს, იმის გამო, რომ სხვა ოთახებში ისე წვიმს, როგორც გარეთ. პატარა ეზო მაქვს, არ მყავს შინაური ცხოველები, არ მაქვს არანაირი შემოსავალი, ყანა ვერ დავთესე იმის გამო, რომ სასუქის ფული არ მქონდა.
სეზონურად ვმუშაობდი მეზობლად, სათხილეში. მთელი საამქროა მოწმე, რამდენჯერ ცუდად გავმხდარვარ და სასწრაფო გამოუძახებიათ. რადგან იქ ხანდახან ვმუშაობდი, ადგნენ და დახმარება მომიხსნეს.  იმ სათხილეში 20 დღის მეტი არ მიმუშავია. აგენტმა მითხრა, თქვენ, ქალბატონო, შპს “ლაბაში” მუშაობთ, საგადასახადოდან მოვიდა ცნობა ამის შესახებო. ნამდვილად არ მეგონა, თუ ქულები ასე გაიზრდებოდა. შარშან  ჩემს შვილს ძაღლმა უკბინა, პოლისი რომ არ მქონოდა, დამეღუპებოდა. ისეთი მადლობელი ვარ პრეზიდენტის _ ვთვლი, რომ მან გადამირჩინა ბავშვი. ოზურგეთამდე ვერ აღწევს პრეზიდენტის მითითება, რომ აგენტებმა გულისხმიერად იმუშაონ. აგენტი, რომელმაც ჩემი ოჯახი შეამოწმა, არც კი ასულა მეორე  სართულზე, არ დაუთვალიერებია ოთახები. როდის შემოაღწევს სიმართლის შუქი ოზურგეთში? უკიდურეს საპროტესტო ზომას მივმართავ, ამოვიკერავ პირს და დავჯდები სახლის წინ. იქნებ, მაშინ  მაინც მომაქციონ ყურადღება!
მივმართე ვასილ ხომერიკს, მაგრამ კორექტული და ზრდილობიანი უარით  გამომისტუმრა. თან მითხრა, რომ თქვენი ოჯახის შემოსავალი თვეში 40 ლარს შეადგენს, დახმარება არ გეკუთვნით, 40 ლარით უნდა არჩინო ოჯახიო. იმ აგენტს, რომელიც ჩემთან იყო, საგადასახადოს ნებისმიერ თანამშრომელს, ან თუნდაც ბატონ ვასილს, რომლებსაც საკმაოდ მაღალი ხელფასები აქვთ, დღეში ყოფნით 40 ლარი? იმედი მაქვს, რომ თქვენი გაზეთის საშუალებით, პრეზიდენტის ადმინისტრაციამდე მიაღწევს ჩემი ამბავი, _ გვითხრა შეწუხებულმა ქალბატონმა.
სოციალური მომსახურების გურიის საკორდინაციო ცენტრის უფროსი  ვასილ ხომერიკი “გურია ნიუსთან” საუბარში აღნიშნავს, რომ ნინო კილაძის მიერ გაჟღერებული ინფორმაცია სიმართლეს არ შეესაბამება:
_ ჯერ ერთი, ეს ოჯახი დაზღვეულია სადაზღვევო კომპანია “ალფაში”. მეორე:  ინფორმაცია, რომ მე ამ ოჯახის წევრისთვის მეთქვას, პოლისი არ გეკუთვნისო, აბსურდია. ამ ოჯახის ოთხივე წევრის სადაზღვევო პოლისის ხანგრძლივობა 2011 წლის პირველ ივლისამდეა. რა მოხდება 2011 წლის პირველი ივლისის შემდეგ, არ ვიცი. ჯერჯერობით, ოჯახი პოლისით სარგებლობს. მე ოჯახის დეკლარაციაზე კომენტარს ვერ გავაკეთებ, რადგან ეს მისი პირადი ინფორმაციაა.
ჩვენს შეკითხვაზე, არჩენს თუ არა ვასილ ხომერიკი 40 ლარად ოჯახს და მიიღო თუ არა საგადასახადო სამსახურიდან სააგენტომ ინფორმაცია იმის შესახებ, რომ ნინო კილაძე მუშაობდა, რესპონდენტმა პასუხისგან თავი შეიკავა.