ჩოხატაურის მუნიციპალიტეტის 2011 წლის ბიუჯეტი 2 მილიონ 689 ათასი ლარით განისაზღვრა. აქედან, გამგეობასა და საკრებულოში დასაქმებულ 136 საჯარო მოხელეზე 1 032 100 ლარი დაიხარჯება, რაც გასულ წელთან შედარებით, 94 000 ლარით არის გაზრდილი; სოციალურ პაკეტზე 144 600 ლარია გათვალისწინებული, პოლიციისა და კუდ-ის დაფინანსებაზე კი _ 60 ათასი ლარი. როგორც ჩოხატაურის მუნიციპალიტეტის საკრებულოს თავმჯდომარე ანტონ ხუნდაძე ამტკიცებს, ადმინისტრაციული ხარჯი მხოლოდ 40 ათასი ლარით გაიზარდა და ეს მატება ახალი სამსახურების შექმნით არის განპირობებული. ჩოხატაურის მუნიციპალიტეტის გამგეობის საფინანსო სამსახურის უფროსი ზურაბ ჩანტლაძე “გურია ნიუსთან” საუბარში ამბობს, რომ ბიუჯეტიდან პოლიციის დაფინანსება საკუთარი შემოსავლებიდან საქართველოს ორგანული კანონის “ადგილობრივი თვითმმართველობის შესახებ” 49-ე მუხლის მეხუთე პუნქტის, პოლიციის შესახებ კანონის 32-ე მუხლის და საქართველოს საბიუჯეტო კოდექსის 65-ე მუხლის მესამე პუნქტის შესაბამისად ხდება. დაფინანსება ჩოხატაურის პოლიციის სამმართველოს კომუნალურ მომსახურეობას, ტრანსპორტის რემონტსა და მატერიალურ-ტექნიკური ბაზის შენახვას ხმარდება.
ჩანტლაძის თქმით, ჩოხატაურის მუნიციპალიტეტის 2011 წლის ბიუჯეტის მთავარი პრიორიტეტები 2011 წლის სოფლის მხარდაჭერის პროგრამები, ინფრასტრუქტურის განვითარება, მოსახლეობის დასაქმება, სოციალური პროგრამები, საბავშვო ბაღების შეკეთება და ახალი ბაღების გახსნაა, ისევე, როგორც კულტურის და სპორტის შემდგომი განვითარება და ჯანდაცვის სფეროსადმი დახმარების გაზრდა.
მისივე თქმით, ჩოხატაურის მუნიციპალიტეტის გამგეობაში ტერიტორიული ორგანოებისა და სამსახურების ჩათვლით, დასაქმებულია 120 კაცი, სულ მათ შენახვაზე ბიუჯეტით იხარჯება 705.0 ათასი ლარი. გასულ წელს კი ამ დანიშნულებით დაიხარჯა 678.7 ათასი ლარი. ხარჯების ზრდა გამოწვეულია ახალი სამსახურების შექმნით და აქედან გამომდინარე, საშტატო ერთეულის ზრდით:
_ 2010-2014 წლებში უმუშევრობის შემცირება, ძირითადად, გახორციელდება ეკონომიკის ზრდის ხარჯზე. არასწორია ეკონომისტ ლევან ჩხაიძის განმარტება, რომ თითქოს ინფრასტრუქტურული პროექტების მოცულობა მცირეა (22.0 ათასი ლარი) _ იგი შეადგენს 826.5 ათას ლარს, რაზედაც ჩვენ პრესის საშუალებით 2011 წლის ბიუჯეტის განმარტებით ბარათში სისტემურად აღვნიშნავდით. ამას ემატება მუნიციპალური განვითარებისა და სხვა პროექტები და აღნიშნული თანხის მიღება მნიშვნელოვნად გაიზრდება. ჩვენი გაანგარიშებით, ამ პროგნოზებით, დამატებით, მინიმუმ 200-250 კაცი დასაქმდება და არა 3-4 კაცი, როგორც ჩხაიძე ამბობს. კადრების გადამზადებისთვის საჭირო ფინანსები, საჭიროების შემთხვევაში, გამოიყოფა სარეზერვო ფონდიდან. რაც შეეხება წყლით მომარაგების საკითხებს, გასულ წელს ამ დანიშნულებით დაიხარჯა 1.5 მილიონზე მეტი ლარი, ასევე სერიოზული თანხები დაიხარჯება მიმდინარე წელს. ასე რომ, ჩხაიძეს ამ საკითხებში საერთოდ ვერ დავეთანხმებით. ასევე, ვერ დავეთანხმებით მას სხვა საკითხებშიც, თუმცა, კომენტარს მოგვიანებით გავაკეთებთ, _ გვითხრა ზურაბ ჩანტლაძემ.
როგორც ლევან ჩხაიძე ამბობს, ზურაბ ჩანტლაძე საუბრობს მუნიციპალური განვითარების სამომავლო პროექტზე და გასაგებიც არის, რადგანაც ამ ეტაპზე ჩოხატაურის ბიუჯეტში ამ მიმართულებით ფინანსები ჩადებული არ არის. გარდა ამისა, ფინანსთა სამინისტრომ გარკვევით განუმარტა ყველა მუნიციპალიტეტს, რომ სახსრების დამატებით გამოყოფის იმედი ნუ ექნებათ, გადაათვალიერონ ბიუჯეტი და იქ მონახონ რეზერვებიო. ამასთან, წყლის პროექტის გახორციელებაზე საუბრისას ავიწყდებათ, რომ აღნიშნული პროექტი ჩოხატაურის მუნიციპალიტეტის ბიუჯეტიდან არ ფინანსდება:
_ რაც შეეხება კადრების გადამზადებას, აღნიშნულ საკითხზეც მომავალ დროში საუბრობს _ “საჭიროების შემთხვევაში, გამოიყოფა სარეზერვო ფონდიდან”. კადრების გადამზადების საჭიროება დიდი ხანია დგას. ამის ფაქტი ის გარემოებებია, რომელსაც გასულ წელს ჰქონდა ჩოხატაურში ადგილი. ასე რომ, შეფასებას ვაკეთებ არა იმიტომ, რომ ხელისუფლების წარმომადგენლები გაღიზიანდნენ, არამედ იმისთვის, რომ მათ დაინახონ და პოზიტიურად გააანალიზონ გარე თვალით დანახული მუნიციპალიტეტი, _ გვითხრა ლევან ჩხაიძემ.
სტატია მომზადებულია ევრაზიის თანამშრომლობის ფონდის მიერ დაფინანსებული პროექტის “სახალხო ინიციატივები დემოკრატიისთვის” ფარგლებში
