ასეთ პირობებში ახლობლის სახლში რამდენიმე წელია ვცხოვრობთ და აქედანაც როდის გვკრავენ ხელს, არ ვიცით! იქნებ, ოზურგეთის გამგეობამ დროებითი თავშესაფარი მოგვცეს?!” _ ითხოვს “გურია ნიუსთან” საუბარში ოზურგეთელი ირმა ვასაძე.
ირმა ვასაძე მეუღლესთან და მცირეწლოვან შვილთან ერთად, რომელიც შეზღუდული შესაძლებლობების მქონეა, უმძიმეს პირობებში, ახლობლის სახლში, დროებით შეკედლებული, რამდენიმე წელია ცხოვრობს.
_ არასოდეს მიმიმართავს ხელისუფლებისთვის _ არ მიყვარს მათხოვრობა. იმისაც მეშინია, რომ როცა მათთან დახმარების სათხოვნელად მივალ, ან უარით არ გამომისტუმრონ, ან ტყუილად დაპირების ამარა არ დავრჩე. ჩემი პრობლემების შესახებ პირველად თქვენთან, ჟურნალისტებთან ავლაპარაკდი. იქნებ, თქვენი გაზეთის საშუალებით გაიცნონ ჩემი ოჯახის მდგომარეობა და რაიმე დახმარება აღმომიჩინონ, _ ამბობს ქალბატონი ირმა, _ მე და ჩემი მეუღლე უმუშევრები ვართ. ცხოვრებას ისიც გვიმძიმებს, რომ ჩვენი მცირეწლოვანი შვილი მძიმე ავადმყოფობით _ დაუნის სინდრომითაა ავად. ბავშვს პენსია არ მისცეს იმის გამო, რომ ასეთ დიაგნოზიანთან შედარებით ერთი უპირატესობა აქვს _ გადაადგილება შეუძლია, მოძრაობს და აქტიურია, მაგრამ ლაპარაკით ვერ ლაპარაკობს. სისტემატიურად დამყავს ნევროპათოლოგთან, ლუარა მექვაბიშვილთან, მისი მეთვალყურეობის ქვეშაა. მან პენსიის დანიშვნაზე თავიდანვე უარი გვითხრა _ პარალიზებული არაა და ასაკის პირობაზე ოდნავ აქვს ჩამორჩენაო.
სახლი, სადაც ახლა დროებით ვცხოვრობთ, ჩვენი არაა და აქედან როდის გამოგვიშვებენ, არ ვიცით. ნახეთ, რა პირობებში ვართ _ ზაფხულში მორიელებთან ერთად ვცხოვრობთ, მთელი ზამთარი კი თაგვებთან და ვირთხებთან ერთად გავატარეთ; ყველა მხრიდან წყალი ჩამოდის, გვეშინია, იატაკი არ ჩავარდეს. როგორ და საიდან ვთბებოდით, ვერ აგიწერთ. ყველაზე მეტად ის მიჭირს, რომ შვილს ვერ ვეხმარები _ ყოველდღიური მეთვალყურეობა, მკურნალობა სჭირდება და ვერ ვტოვებ, რომ სადმე გავიდე და ვიმუშაო.
ბავშვთა ნევროპათოლოგი ლაურა მექვაბიშვილი “გურია ნიუსთან” საუბარში ამბობს, რომ ისეთ ბავშვებს, რომლებსაც არ აქვთ მოტორული დარღვევა, არ აქვთ დამბლა ან მძიმე ეპილეფსია, ნევროლოგიურ კაბინეტში პენსია არ ენიშნებათ:
_ ბავშვი არის დაავადებული დაუნის დაავადებით. ეს არის ქრომოსომული პათოლოგია, რომელიც გულისხმობს გონებრივი განვითარების შეფერხებას და სხვადასხვა ეტაპობრივ პათოლოგიებს. ზოგჯერ თან ახლავს მოტორული განვითარების შეფერხებაც. ვუმკურნალეთ და ამჟამად დადის. რა თქმა უნდა გონებრივად არ არის თავისი ტოლების დონეზე და მეტყველებაც უჭირს, მაგრამ არ აქვს კიდურების დამბლა და ეპილეფსია. ასე რომ, ჩვენს მონაცემებს არ აკმაყოფილებს. ბავშვებს, რომლებსაც აქვთ გონებრივი შეფერხება, პენსიას უნიშნავს ფსიქიატრი. ოზურგეთში, ფსიქიატრს შესაბამისი ლიცენზია არ აქვს, რომ 18 წლამდე ასაკის ბავშვებს დაუნიშნოს საპენსიო დახმარება. ამიტომ, ეს კონტიგენტი პენსიის დასანიშნად თბილისში მიდის.
ოზურგეთის მუნიციპალიტეტის გამგებლის მოადგილე მიხეილ გოგოტიშვილი “გურია ნიუსთან” საუბარში ამბობს, რომ მუნიციპალიტეტში დევს 600 უსახლკარო ოჯახის განცხადება: _ მოგვმართოს აღნიშნულმა ოჯახმა დახმარებისთვის. შესაბამისად, გამოყოფილი კომისია შეისწავლის ვითარებას და შეძლებისდაგვარად, დახმარებასაც აღმოუჩენს.
