მას ბრალად მედიის მუშაობაში ხელის შეშლა ედება. სიორიძე 21 მაისს, ბათუმში, ერას მოედანზე გამართული აქციის შემდეგ დააკავეს. “გურია ნიუსის” ფოტოობიექტივმა დაკავების კადრების გადაღება მოახერხა. ასევე, ჩვენმა ობიექტივმა ამ ინციდენტამდე 5 წუთით ადრე, უკვე ბრალდებული, მომიტინგეებიდან ცოტა მოშორებით დააფიქსირა. მანამდე კი, ანუ, ტელევიზიასთან აქციის დარბევამდე და დარბევის შემდეგ, კადრში ჩანს, რომ ის ნაცემია. ის, სხვა დაშავებულებთან ერთად, არაერთ ჟურნალისტს მოუყვა, თუ როგორ გაუსწორდნენ ფიზიკურად.
აჭარის ტელევიზიასთან გადანაცვლებულმა აქციის მონაწილეებმა და ლიდერებმა, ტელევიზიის ხელმძღვანელობას პირდაპირი ეთერის დათმობა მოსთხოვეს. სანამ ლიდერები საკუთარ მოთხოვნებს აყენებდნენ, მიმდებარე ტერიტორიაზე, როგორც სამოქალაქო ფორმაში ჩაცმული მაღალჩინოსანი სამართალდამცავების, ისე ფორმიანი პოლიციელების მობილიზება დაიწყო. აქციის მონაწილეებს პოლიცია ფიზიკურად მას შემდეგ გაუსწორდა, რაც დაუდგენელმა პირებმა ტელევიზიის შენობას ქვები დაუშინეს. პოლიციელები აქციის მონაწილეებს დროშის ტარებითა და სხვადასხვა საგნებით უსწორდებოდნენ, ინციდენტის შემდეგ კი, რამდენიმე პირი დააკავეს. თუმცა, აქედან 7 ბრალდებულს _ ვახტანგ სიორიძეს, გოჩა მუხაშავრიას, დიმა ჭეიშვილს, დათო ფარტენაძეს, ტარიელ ფუტკარაძეს, ანზორ სოლომონიძეს და ხვიჩა გამარჯობაძეს პროკურატურამ ბრალი სისხლის სამართლის კოდექსის 222-ე მუხლის მე-2 ნაწილით და 353-ე მუხლის მე-2 ნაწილით წაუყენა, რაც 2-დან 4 წლამდე და 4-დან 7 წლამდე პატიმრობას ითვალისწინებს. როგორც ზემოთ აღვნიშნეთ, ეს მუხლები მედიის მუშაობაში ხელის შეშლას გულისხმობს.
როგორც “გურია ნიუსს” ადამიანის უფლებათა ცენტის აჭარის ფილიალის ჟურნალისტმა მაკა მალაყმაძემ უთხრა, 23 მაისს, ბათუმის საქალაქო სასამართლო სიორიძესთან ერთად, ექვსი ბრალდებულის აღმკვეთი ღონისძიების შეფარდების საკითხს, 7 საათის განმავლობაში განიხილავდა. როგორც ის ამბობს, პროცესი საკმაოდ ხმაურიანი იყო: _ დაკავებულებისთვის, არ განუმარტავთ მათი უფლებები, თან სიორიძემ თავის სიტყვაში თქვა, რომ “პოლიციის ერთმა თანამშრომელმა გვარი მკითხა, ორი მეტაკა და მანქანაში ჩამაგდეს. შემდეგ სახეში დამარტყესო”. ის დანაშაულს არ აღიარებს. რაც ყველაზე მეტად საყურადღებოა, არც ერთ დაკავებულს სამედიცინო შემოწმება არ ჩატარებია. არც სახალხო დამცველის წარმომადგენელს უნახავს სიორიძე ე.წ. კაპეზეში. პროკურატურამ ბრალდებულთა მიმართ უდანაშაულობის პრეზუმპციაც კი დაარღვია. ყველა მათგანზე თქვეს, რომ მათ “ჩაიდინეს” დანაშაული და არა _ რომ “სავარაუდოდ ჩაიდინეს, _ გვითხრა მაკა მალაყმაძემ.
სიორიძეს ჰყავს მეუღლე და ორი მცირეწლოვანი შვილი. ასევე, აღსანიშნავია, რომ ის II ჯგუფის ინვალიდია. მოსამართლემ არ გაითვალისწინა მისი ჯანმრთელობის მდგომარეობა და მას, ბრალის დამტკიცების შემთხვევაში, 4-7-წლამდე ციხე ემუქრება.
