ჩვენი მკითხველი კარგად არის ინფორმირებული, თუ რამდენი ავარია მოახდინეს ბოლო პერიოდში უცხოელმა მძღოლებმა, რასაც ადამიანთა მსხვერპლიც კი მოჰყვა. ბოლოსწინა შემთხვევა ყველაზე ტრაგიკული აღმოჩნდა _ ავტოსაგზაო შემთხვევამ, რომელიც თურქი მძღოლის დაუდევრობას მოჰყვა, 7 ადამიანის სიცოცხლე ადგილზე შეიწირა. წინა შემთხვევებში კი, თურქულმა ტრაილერმა რამდენიმე ახალგაზრდა იმსხვერპლა.
რაც გასულ კვირაში მოხდა, ყველანაირ ზღვარს სცილდება _ მართალია, მსხვერპლი არ არის, მაგრამ თურქული ტრაილერი, რომელსაც ამ ქვეყნის 30 წლის მოქალაქე მართავდა, არც მეტი, არც ნაკლები _ ეზოში შევარდა და თქვენ წარმოიდგინეთ, სახლშიც შევიდა! დიახ, ორსართულიანი კეთილმოწყობილი სახლი ლამის იყო შუაზე გააპო! ბედად, სახლში არავინ იმყოფებოდა, თორემ ტრაგედია გარდაუვალი იქნებოდა. ის, რაც ნიკოლაიშვილებს შეემთხვათ, ამის გადმოცემა ძნელია.
ამ ავარიის თვითმხილველია ოჯახის წევრი ნანული ნიკოლაიშვილი, რომელმაც საკუთარი თვალით დაინახა, თუ როგორ შეიჭრა მის ეზოში გადაჭარბებული სიჩქარით მიმავალი ტრაილერი და როგორ დაუნგრია სახლი. იგი მეზობლიდან ბრუნდებოდა, როცა სატვირთო მანქანა შენიშნა, ჭიშკრის მხარეს გადავიდა, რომ გზა დაეთმო, ტრაილერის მძღოლმა კი საჭე ვერ დაიმორჩილა, საავტომობილო გზიდან გადავიდა, ეზოში ღობიდან შეიჭრა, საცხოვრებელი სახლის ორივე სართულის წინა ნაწილი მთლიანად ჩამოანგრია და სახლში გაიჭედა. ქალბატონი ნანული უყურებდა, როგორ ინგრეოდა სახლი.
მეზობლებმა სასწრაფო დახმარების ბრიგადა გამოიძახეს, თუმცა ის მძღოლს არ დასჭირვებია, რადგან არ დაშავებულა. სამაგიეროდ, გონი დაკარგა ოჯახის უფროსმა. ჩვენი ინფორმაციით, ალუმინის ფილები ტრაილერს აზერბაიჯანიდან თურქეთში გადაჰქონდა. იმის გამო, რომ ტვირთი სატრანზიტო გახლდათ, საქმეში საბაჟო უწყება ჩაერთო. ჩვენ შემთხვევის ადგილზე მაშინ მივედით, როცა იქ საბაჟო სამსახურის წარმომადგენლები იმყოფებოდნენ. როგორც დაზარალებული ოჯახი აცხადებს, პოლიციას მანქანის საჯარიმო სადგომზე გადაყვანა იმ დღესვე უცდია, მაგრამ ამის ნება ნიკოლაიშვილებს არ დაურთავთ, რადგან სატვირთო მანქანა ისეა სახლში შეჭრილი, რომ გამოიყვანონ, სახლი მთლიანად დაიშლება.
ოჯახი ზარალის ანაზღაურებას ითხოვს _ გარდა მეორე სართულისა, პირველ სართულზე მთლიანად განადგურდა სათავსო, სადაც ოჯახს ახალდაწურული 300 ლიტრი ღვინო და ზამთრისთვის მომზადებული სურსათ-სანოვაგე ჰქონდათ მომარაგებული. ამას გარდა, დაკარგულია ოჯახის უფროსის საპენსიო მოწმობა და ოჯახის წევრთა თანხა _ 2000 ლარამდე.
ჩვენი ინფორმაციით, თურქი მძღოლი ლანჩხუთში დასაქმებულმა თანამემამულემ შეიფარა, რომელსაც პატარა სასადილო აქვს. როგორც ჩვენი წყარო ამბობს, ოჯახთან მძღოლმა სწორედ თანამემამულეები მიაგზავნა და 10 ათას ლარამდე შესთავაზა: _ სამარცხვინო თანხაა, ამას როგორ ავიღებთ? აგვიშენონ ისეთი სახლი, როგორიც გვქონდა. სანამ ამის გარანტიას არ მივიღებთ, მანქანას არ გავატანთ! ზამთარი მოდის და ღია ცის ქვეშ გვტოვებენ? მათ ააშენონ, ფულს არ ვთხოვთ! გვითხრეს, 50 ათასზე მეტი დაჯდებაო და ისინი 10 ათასს იხდიან!!! რომ გაიყვანონ მანქანა, მძღოლი გადავა თურქეთში და მერე ვინ აგვინაზღაურებს ზარალს? _ აცხადებენ დაზარალებულები.
ჩვენთვის ცნობილი გახდა მძღოლის მოსაზრებაც _ მისი თქმით, ოჯახი მას 150 ათას ლარს თხოვს, თუმცა, ჩვენ ისიც შევიტყვეთ, რომ დაზარალებულები თანხაზე საერთოდ უარს ამბობენ და სახლის პირვანდელ სახემდე მიყვანას ითხოვენ, რაც ნამდვილად დაჯდება რამდენიმე ათეული ათასი ლარი.
გურულები პატრულისგან ითხოვენ თხოვენ, ქართველ მძღოლებს რომ არ ინდობენ, უცხოელი მძღოლების თავგასულობა შეაჩერონ!
